വര്‍ക്കലയില്‍ യുവാവിനെ തട്ടിക്കൊണ്ടു പോയി ക്രൂരമായി മര്‍ദിച്ചു അവശനാക്കി കൊള്ളയടിച്ച കേസില്‍ കൊലക്കേസ് പ്രതിയടക്കം നാലു സദാചാര ഗുണ്ടകളെ വര്‍ക്കല പൊലീസ് അറസ്റ്റ് ചെയ്തു. വര്‍ക്കല ബീച്ചില്‍ താമസിക്കുന്ന സുഹൃത്തിനെ കാണാനെത്തിയ കൊട്ടാരക്കര പുത്തൂര്‍ തേവലപ്പുറം നന്ദനത്തില്‍ പ്രശാന്തിനെയാണ്(35) അഞ്ചു പേരടങ്ങുന്ന സംഘം ക്രൂരമായി മര്‍ദിച്ചത്.

പ്രശാന്തിന്റെ മുതുകിലും കാലിലും മര്‍ദനമേറ്റു. കൂടാതെ സ്വര്‍ണമാല, വിലകൂടിയ മൊബൈല്‍ ഫോണ്‍, പണം എന്നിവയും കവര്‍ന്നു. ഭീഷണിപ്പെടുത്താനായി മോഷണം, അസാന്മാര്‍ഗിക പ്രവര്‍ത്തികള്‍ എന്നിവയ്ക്കു വന്നതാണെന്നു പ്രശാന്തിനെ കൊണ്ടു പറയിക്കുന്ന വിഡിയോയും ചിത്രീകരിച്ചു. വര്‍ക്കല തിരുവമ്പാടി വാറില്‍ വീട്ടില്‍ ജസ്മീര്‍(20), കുരയ്ക്കണ്ണി ഐഷ ഭവനില്‍ ബസാം(20), പുന്നകുളം ചരുവിള വീട്ടില്‍ ആഷിക് (20), തിരുവമ്പാടി ഇസ്മയില്‍ മന്‍സിലില്‍ ബദിന്‍ഷാ(34) എന്നിവരെയാണ് അറസ്റ്റു ചെയ്തത്. ഒരാള്‍ ഒളിവിലാണ്.

തമിഴ്‌നാട് സ്വദേശിയെ 2014-ല്‍, കൊലപ്പെടുത്തിയ കേസില്‍ പ്രതിയാണ് ബദിന്‍ഷാ. സംഭവത്തെ കുറിച്ചു പൊലീസ് പറയുന്നതിങ്ങനെ: മാര്‍ച്ച് 11-ന് രാത്രി 12-ന് സ്‌കൂട്ടറിലെത്തിയ പ്രശാന്ത് ഓടയം അഞ്ചുമുക്കില്‍ സുഹൃത്തിനെ കാത്തു നില്‍ക്കവേയാണ് കാറിലെത്തിയ രണ്ടു പേര്‍ പ്രശാന്തിനെ ചോദ്യം ചെയ്തത്. ഇതിനെതിരെ പ്രശാന്ത് പ്രതികരിച്ചതിനെ തുടര്‍ന്നു സ്ഥലത്ത് കൂടുതല്‍ പേരെ വിളിച്ചു വരുത്തി പ്രശാന്തിനെ ബലമായി കാറില്‍ കയറ്റി തിരുവമ്പാടിയിലെ വിജനമായ സ്ഥലത്തെത്തിച്ചാണ് പുലര്‍ച്ചെ 4.30 വരെ ഇരുമ്പുവടികളും മറ്റും ഉപയോഗിച്ചു ക്രൂര മര്‍ദനം നടത്തിയത്. ഇതിന് ശേഷം രണ്ടര പവന്റെ മാല, 15,000 രൂപ വിലവരുന്ന മൊബൈല്‍ ഫോണ്‍, 7,500രൂപ എന്നിവ കവര്‍ന്നു.

തുടര്‍ന്നു മോഷണത്തിനും മറ്റും വന്നതാണെന്നു പറയിക്കുന്ന വിഡിയോ ചിത്രീകരിച്ച ശേഷമാണ് ഓടയം അഞ്ചുമുക്കില്‍ തിരികെയെത്തിച്ചത്. അതിനു ശേഷം പ്രതികള്‍ സ്ഥലം വിട്ടു. പുലര്‍ച്ചെയോടെ വര്‍ക്കല പൊലീസ് സ്റ്റേഷനില്‍ എത്തിയ പ്രശാന്തിന്റെ പരാതിയുടെ അടിസ്ഥാനത്തില്‍ തട്ടികൊണ്ടുപോകാന്‍ ഉപയോഗിച്ച കാറിന്റെ വിശദാംശങ്ങള്‍ സംഭവ സ്ഥലത്തെ നിരീക്ഷണ ക്യാമറകളിലൂടെ ഉടനടി കണ്ടെത്തിയാണ് പ്രതികളായ അഞ്ചു പേരില്‍ നാലു പേരെയും അകത്താക്കിയത്.

അസമയത്ത് പാപനാശം, ഹെലിപാഡ്, ഓടയം ബീച്ച് എന്നിവടങ്ങളില്‍ വന്നെത്തുന്ന നിരവധി പേരെ സദാചാര ഗുണ്ടകള്‍ ചമഞ്ഞു പ്രതികള്‍ ക്രൂരമായി മര്‍ദിച്ചതായി തെളിവുണ്ടെന്നു പൊലീസ് പറയുന്നു. ആറ്റിങ്ങല്‍ ഡിവൈഎസ്പി ഫേമസ് വര്‍ഗീസ്, വര്‍ക്കല എസ്എച്ച്ഒ ജി. ഗോപകുമാര്‍, എസ്‌ഐമാരായ ശ്യാംജി, ജയകുമാര്‍, എഎസ്‌ഐ വിജയകുമാര്‍, സീനിയര്‍ സിപിഒമാരായ ഇര്‍ഷാദ്, മുരളീധരന്‍, നവാസ്, സിപിഒ നാഷ് എന്നിവര്‍ അടങ്ങിയ സംഘമാണ് പ്രതികളെ വര്‍ക്കലയില്‍ വിവിധ സ്ഥലങ്ങളില്‍ നിന്നായി പിടികൂടിയത്. സ്വകാര്യ കമ്പനിയിലെ ജീവനക്കാരനാണ് പ്രശാന്ത്.

ഞാന്‍ മോഷ്ടാവാണെന്നും അസാന്മാര്‍ഗിക പ്രവൃത്തികള്‍ക്ക് വേണ്ടി വന്നതാണെന്നും പ്രശാന്തിനെ കൊണ്ടു പറയിക്കുന്ന വിഡിയോകളാണ് ആണ് ഇരയെ ഭീഷണിപ്പെടുത്താന്‍ സംഘം ഉപയോഗിച്ച പ്രധാന ആയുധമെന്നു വര്‍ക്കല എസ്എച്ച്ഒ ജി.ഗോപകുമാര്‍ പറഞ്ഞു. സദാചാര ഗുണ്ടായിസവും കവര്‍ച്ചയും നടത്തി വിലസുന്ന സംഘം ഇരകളെ തപ്പിയെടുത്ത് മര്‍ദിച്ചു വിഡിയോയില്‍ മോഷ്ടാവോ എല്ലെങ്കില്‍ അസാന്മാര്‍ഗിക ആവശ്യത്തിന് എത്തിയെന്നു പറയിപ്പിച്ചാണ് ഇരകളെ ഒതുക്കുന്നത്. വിഡിയോ സമൂഹമാധ്യമങ്ങളില്‍ ഇടുമെന്നു ഭീഷണിപ്പെടുത്തുന്നതോടെ പലരും പരാതിയില്‍ നിന്നു പിന്‍വാങ്ങും. ഇത്തരത്തില്‍ പലരെയും വലയിലാക്കി കവര്‍ച്ച നടത്തി രേഖപ്പെടുത്തി വിടുന്ന സംഭവങ്ങള്‍ മേഖലയില്‍ ഇതിനു മുന്‍പും നടന്നിട്ടുണ്ടാകുമെന്ന നിഗമനത്തില്‍ പൊലീസ് കൂടുതല്‍ അന്വേഷണം നടത്തുന്നുണ്ട്.