ആനയെ കയറ്റിയ ലോറി ഇന്ധനം നിറയ്ക്കാന് എത്തിയപ്പോള് പെട്രോള് പമ്പിന്റെ മേല്ക്കൂരയില് മസ്തകമിടിച്ച് ആനയ്ക്കു പരുക്ക്; ഡ്രൈവര് അറിഞ്ഞില്ല
പെട്രോള് പമ്പിന്റെ കോണ്ക്രീറ്റ് മേല്ക്കൂരയില് മസ്തകം ശക്തമായി ഇടിച്ചതിനെ തുടര്ന്ന് തൃശിവപേരൂര് കര്ണന് എന്ന ആനയ്ക്കു പരുക്ക്. ആനയെ കയറ്റിയ ലോറി ഇന്ധനം നിറയ്ക്കാന് പേട്ട പമ്പില് രാവിലെ പത്തരയോടെ എത്തിയപ്പോഴായിരുന്നു സംഭവം.ലോറിയില് കെട്ടിയ മരക്കുറ്റികള്ക്കുള്ളില് തളച്ചിട്ടതിനാല് ആനയ്ക്ക് കുനിയാന് പറ്റാത്ത സ്ഥിതിയായിരുന്നു.
ആനയുടെ മസ്തകം മേല്ക്കൂരയില് മുട്ടിയത് പമ്പ് ജീവനക്കാരും ഇന്ധനത്തിനെത്തിയ മറ്റു യാത്രക്കാരും പറഞ്ഞപ്പോഴാണ് ഡ്രൈവര് അറിയുന്നത്.
ലോറി ഉടന് പിന്നോട്ടെടുത്ത് കൂടുതല് അപകടം ഒഴിവാക്കി. സംഭവം കണ്ട നാട്ടുകാര് ഓടിക്കൂടി. പൊലീസും ഉടന് സ്ഥലത്തെത്തി. ഡ്രൈവറെ സ്റ്റേഷനിലേക്കു മാറ്റി.
മരട് കൊട്ടാരം ക്ഷേത്ര വളപ്പില് ആനയെ ഇറക്കി ശുശ്രൂഷ നല്കാനായി ലോറി പിന്നീട് മരടിലെത്തിച്ചു. കൊട്ടാരം ജംക്ഷനില് എത്തിച്ച ആന മസ്തകത്തില് ചോരയൊലിച്ചും തുമ്പിക്കൈയില്നിന്നു നീരൊലിച്ചും നില്ക്കുന്നത് കൊടും ചൂടില് നൊമ്പരക്കാഴ്ചയായി.
നാട്ടുകാര് നല്കിയ തണ്ണിമത്തന് ആന ആര്ത്തിയോടെ കഴിച്ചു. പിന്നീട് വെറ്ററിനറി സര്ജന്റെ സൗകര്യത്തിനായി ആനയെ തൃപ്പൂണിത്തുറയിലേക്കു മാറ്റി. ഉച്ചയ്ക്കു ശേഷമെത്തിയ വെറ്ററിനറി സര്ജന് ആനയ്ക്കു മരുന്നു നല്കി. കേസെടുക്കുമെന്നു പൊലീസ് പറഞ്ഞു.
https://www.facebook.com/Malayalivartha
