ബിജെപി ദേശീയ അദ്ധ്യക്ഷന്‍ അമിത് ഷാ ഇന്ന് തൃശൂരില്‍. തെരഞ്ഞെടുപ്പ് പ്രചാരണ യോഗത്തില്‍ പങ്കെടുക്കുന്നതിനായാണ് അദ്ദേഹം എത്തുക. എന്‍ ഡി എ സ്ഥാനാര്‍ത്ഥി സുരേഷ് ഗോപിയുടെ തെരഞ്ഞെടുപ്പ് പ്രചാരണത്തില്‍ അദ്ദേഹം പങ്കെടുക്കും.

വൈകിട്ട് 4.30 ന് തൃശൂര്‍ വടക്കുംനാഥ ക്ഷേത്ര മൈതാനത്തു നടക്കുന്ന തെരഞ്ഞെടുപ്പ് യോഗത്തില്‍ അമിത്ഷാ പ്രവര്‍ത്തകരെ അഭിസംബോധന ചെയ്യും.കേന്ദ്രമന്ത്രിമാരായ തവര്‍ ചന്ദ് ഗെഹ് ലോട്ട്,പീയൂഷ് ഗോയല്‍ എന്നിവരും എന്‍ ഡി എ തെരഞ്ഞെടുപ്പ് പ്രചാരണ യോഗങ്ങളില്‍ പങ്കെടുക്കാനായി കേരളത്തിലെത്തും.

ഇന്ന് വൈകിട്ട് 3 ന് വടകരയിലും,6 ന് കാസര്‍കോടും നടക്കുന്ന തെരഞ്ഞെടുപ്പ് യോഗത്തില്‍ ഗെഹ് ലോട്ട് പങ്കെടുക്കും. 17ന് കേരളത്തിലെത്തുന്ന പീയൂഷ് ഗോയല്‍ ആലപ്പുഴയിലും, വയനാടും നടക്കുന്ന പരിപാടികളില്‍ സംബന്ധിക്കും.

ലോക്‌സഭാ തെരഞ്ഞെടുപ്പ് പ്രചാരണങ്ങള്‍ക്കായി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി തിങ്കളാഴ്ച രാത്രി 10.45ഓടെ തിരുവനന്തപുരത്തെത്തി. തിരുവനന്തപുരത്തു നിന്ന് ഹെലികോപ്റ്ററില്‍ കൊല്ലത്തെത്തുന്ന അദ്ദേഹം എന്‍.കെ പ്രേമചന്ദ്രന്റെ പ്രചാരണ പരിപാടിയിലാണ് ആദ്യം പങ്കെടുക്കുക.

9.15 ഓടെ പത്തനാപുരത്തെത്തുന്ന രാഹുല്‍ അണികളെ കണ്ട് സംസാരിച്ച ശേഷം 11മണിക്ക് ആന്‍േറാ ആന്റണിയുടെ പ്രചാരണത്തിന് പത്തനം തിട്ടയിലെത്തും. പിന്നീട് അന്തരിച്ച കേരള കോണ്‍ഗ്രസ് നേതാവ് കെ.എം മാണിയുടെ വീട് സന്ദര്‍ശിക്കും. വൈകീട്ട് മൂന്നിന് ആലപ്പുഴ മുന്‍സിപ്പല്‍ സ്‌റ്റേഡിയത്തില്‍ ഷാനിമോള്‍ ഉസ്മാന്റെ പ്രചാരണ യോഗത്തിലും പങ്കെടുക്കും.

വൈകീട്ട് ആറിന് വീണ്ടും തിരുവനന്തപുരത്തെത്തുന്ന രാഹുല്‍ സെന്‍ട്രല്‍ സ്‌റ്റേഡിയത്തിലെ തെരഞ്ഞെടുപ്പ് പൊതുയോഗത്തില്‍ പങ്കെടുക്കും. ആറ്റിങ്ങല്‍, തിരുവനന്തപുരം മണ്ഡലങ്ങളിലെ പ്രവര്‍ത്തകരാണ് പൊതുയോഗത്തില്‍ പങ്കെടുക്കുക. തുടര്‍ന്ന് കണ്ണൂരിലേക്ക് തിരിക്കും.

17ന് കണ്ണൂര്‍ സാധു ഓഡിറ്റോറിയത്തില്‍ കാസര്‍കോഡ്, കോഴിക്കോട്, കണ്ണൂര്‍ ജില്ലകളില്‍ നിന്നുള്ള യു.ഡി.എഫ് നേതാക്കളുമായി കൂടിക്കാഴ്ചക്ക് ശേഷം രാഹുല്‍ മത്‌സരിക്കുന്ന വയനാട് നിയോജകമണ്ഡലത്തില്‍ പര്യടനത്തിനായി തിരിക്കും.