തെരഞ്ഞെടുപ്പിന് ദിവസങ്ങള്‍ മാത്രം ബാക്കിനില്‍ക്കെ ആലത്തൂര്‍ മണ്ഡലത്തിലെ സ്ഥാനാര്‍ത്ഥിയായ രമ്യ ഹരിദാസ് നിര്‍ണായക നീക്കത്തിലേക്ക്. രമ്യയ്‌ക്കെതിരെ സ്ത്രീവിരുദ്ധ പരാമര്‍ശം നടത്തിയ ഇടതുമുന്നണി കണ്‍വീനര്‍ എ വിജയരാഘവനെതിരെയുള്ള ഹര്‍ജി ഇന്ന് കോടതിയില്‍ സമര്‍പ്പിക്കും. കേസില്‍ പോലീസ് തുടര്‍പടി സ്വീകരിക്കാത്തതിനാലാണ് രമ്യ ഹര്‍ജിയുമായി കോടതിയെ സമീപിക്കുന്നത്.

ആലത്തൂര്‍ ഡിവൈഎസ്പിക്കാണ് രമ്യ ഹരിദാസ് പരാതി നല്‍കിയിരുന്നത്.പൊന്നാനിയില്‍ ഇടതുസ്ഥാനാര്‍ത്ഥി പി വി അന്‍വറിന്റെ തെരഞ്ഞെടുപ്പ് യോഗത്തിലായിരുന്നു വിജയരാഘവന്‍ രമ്യക്കെതിരെ സംസാരിച്ചത്. ആലത്തൂരിലെ സ്ഥാനാര്‍ഥി പെണ്‍കുട്ടി, അവര്‍ ആദ്യം പോയി പാണക്കാട് തങ്ങളെ കണ്ടു. പിന്നെ കുഞ്ഞാലിക്കുട്ടിയെ കണ്ടു. അതോടുകൂടി ആ കുട്ടിയുടെ കാര്യം എന്താകുമെന്ന് എനിക്ക് പറയാന്‍വയ്യ, അത് പോയിട്ടുണ്ട്' എന്നായിരുന്നു വിജയരാഘവന്റെ വാക്കുകള്‍.

രമ്യ ഹരിദാസിന്റെ വരവോടെ സിപിഎം പരാജയം മണത്തു തുടങ്ങി. രമ്യയുടെ പാട്ടും പെരുമാറ്റവും ജനം ഏറ്റെടുത്തു. ആലത്തൂരില്‍ നിന്ന് പാര്‍ലമെന്റിലേക്ക് ഹാട്രിക് വിജയം ലക്ഷ്യമിടുന്ന എല്‍ഡിഎഫ് സ്ഥാനാര്‍ഥി പികെ ബിജുവിനെ നേരിടാന്‍ യുവ വനിതാ സാന്നിധ്യമായി മുപ്പത്തിമൂന്നുകാരിയായ രമ്യ ഹരിദാസിനെയാണ് പാര്‍ട്ടി തിരഞ്ഞെടുത്തത്. 

നിലവില്‍ കോഴിക്കോട് കുന്ദമംഗലം ബ്ലോക്ക് പഞ്ചായത്ത് പ്രസിഡന്റായ രമ്യ കെഎസ്‌യു സംഘടനാ പ്രവര്‍ത്തനത്തിലൂടെയാണ് രാഷ്ട്രീയത്തിലേക്ക് എത്തിയത്. കോഴിക്കോട് കുന്ദമംഗലം കുറ്റിക്കാട്ടൂരിലെ കൂലിപ്പണിക്കാരനായ പിപി ഹരിദാസിന്റെയും രാധയുടെയും മകളാണ് രമ്യ. പൊതുപ്രവര്‍ത്തന രംഗത്ത് ചെറുപ്പംമുതല്‍ സജീവമാണെങ്കിലും ആറ് വര്‍ഷങ്ങള്‍ക്ക് മുമ്പ് രാഹുല്‍ ഗാന്ധി നടത്തിയ ടാലന്റ് ഹണ്ടിലൂടെയാണ് രമ്യ എന്ന നേതാവ് ദേശീയസംസ്ഥാന തലത്തില്‍ ശ്രദ്ധിക്കപ്പെട്ട് തുടങ്ങിയത്. യൂത്ത് കോണ്‍ഗ്രസിന്റെ കോഴിക്കോട് പാര്‍ലമെന്റ് സെക്രട്ടറിയും നിലവില്‍ അഖിലേന്ത്യാ കോര്‍ഡിനേറ്ററുമാണ് രമ്യ. ആലത്തൂര്‍ മണ്ഡലത്തില്‍ ഇത്തവണ കോണ്‍ഗ്രസിന്റെ പ്രതീക്ഷകളെക്കുറിച്ചും രമ്യയ്ക്ക് നൂറ് നാവാണ്. 

ആലത്തൂര്‍ ഇടതുപക്ഷത്തിന്റെ കോട്ടയാണെന്ന് പറയാന്‍ സാധിക്കില്ല. കഴിഞ്ഞ തവണ ജയിച്ചെങ്കിലും ഇക്കുറിയും വിജയം ഇടതുപക്ഷത്തിനൊപ്പം നില്‍ക്കണമെന്നില്ല. കാരണം ഇത്തവണ യുഡിഎഫ് പ്രവര്‍ത്തകര്‍ സജീവയമായ ഇടപെടല്‍ മണ്ഡലത്തില്‍ നടത്തുന്നുണ്ട്. അതുകൊണ്ട് തന്നെ ആലത്തൂകാരുടെ മനസ്സും അവരുടെ വോട്ടും യുഡിഎഫിന് അനുകൂലമായി ലഭിക്കുമെന്ന പ്രതീക്ഷയിലാണ് ഞാന്‍ ആലത്തൂരിലേക്ക് വന്നിരിക്കുന്നത്. 

നമ്മുടെ ഭരണഘടനയില്‍ അധിഷ്ഠിതമായ സ്വാതന്ത്ര്യങ്ങളും വിശ്വാസങ്ങളും ആചാരങ്ങളും മുറുകെ പിടിക്കുന്ന അതേ നിലപാടില്‍ തന്നെയാണ് കോണ്‍ഗ്രസ് മുന്നോട്ടുപോകുന്നത്. ശബരിമല വിഷയത്തില്‍ കോണ്‍ഗ്രസ് എടുത്ത നിലപാട് സാധാരണക്കാരായ വിശ്വാസികള്‍ക്കെല്ലാം അറിയാം. വിശ്വാസത്തെ മുറുകെ പിടിക്കാന്‍ കോണ്‍ഗ്രസ് എടുത്ത നിലപാടിനൊപ്പം ജനങ്ങളുടെ മനസ്സ് ഇത്തവണ കോണ്‍ഗ്രസിനും യുഡിഎഫിനുമൊപ്പമായിരിക്കും. 

കോണ്‍ഗ്രസിന്റെ പോഷക സംഘടനയായ യൂത്ത് കോണ്‍ഗ്രസിന്റെ അഖിലേന്ത്യാ കോര്‍ഡിനേറ്ററാണ് ഞാന്‍. ഇത്തവണ ആള്‍ ഇന്ത്യ കോണ്‍ഗ്രസ് കമ്മിറ്റിയുടെ പ്രസിഡന്റ് സ്ത്രീകള്‍ക്ക് മുന്‍തൂക്കം കൊടുക്കുന്ന രീതിയിലേക്കുള്ള പ്രവര്‍ത്തനങ്ങള്‍ക്കാണ് ഊന്നല്‍ നല്‍കുന്നത്. ആ രീതിയില്‍ വലിയൊരു പിന്തുണയാണ് എനിക്ക് തന്നിരിക്കുന്നത്. ഇത് ജനങ്ങള്‍ക്ക് കൊടുക്കുന്ന വലിയ അംഗീകാരമാണ്. 

ഞാനും ഒരു സ്ത്രീയാണ്. കേരളത്തില്‍ ഒരു സ്ത്രീ എന്ന് പറയുന്നവര്‍ക്ക് അവരുടെതായ രീതിയിലുള്ള ശൈലിയും അവരുടേതായ ഒരു തനിമയുമുള്ള സ്വഭാവവുമുണ്ട്. ആ സ്ത്രീ ആരാണെന്നും അവരുടെ ഉദേശലക്ഷ്യങ്ങളെന്താണെന്നും ജനങ്ങള്‍ക്ക് അറിയാം. ആനുകാലിക വിഷയങ്ങളെക്കുറിച്ച് കൃത്യമായ ബോധം ജനങ്ങള്‍ക്കുണ്ട്, പൊതുജനങ്ങളെ ആര്‍ക്കും അങ്ങനെ പറ്റിക്കാനൊന്നും സാധിക്കില്ല. അതുകൊണ്ട് തന്നെ സോളാര്‍ വിഷയം തിരഞ്ഞെടുപ്പില്‍ ഒട്ടും ബാധിക്കില്ല. 

രാഹുല്‍ ഗാന്ധി കൊണ്ടുവന്ന പുതിയ തിരഞ്ഞെടുപ്പ് സംവിധാനത്തിലൂടെ യൂത്ത് കോണ്‍ഗ്രസിന്റെ പാര്‍ലമെന്റ് സെക്രട്ടറി രംഗത്തേക്ക് മത്സരിച്ച ഒരാളാണ് ഞാന്‍. ആ സമയത്ത് പിസി വിഷ്ണുനാഥ് സംസ്ഥാന പ്രസിഡന്റായിരുന്ന സമയത്ത് യൂത്ത് കോണ്‍ഗ്രസിന്റെ ടാലന്റ് ഹണ്ടില്‍ പങ്കെടുക്കാന്‍ ഭാഗ്യം ലഭിച്ചിരുന്നു. വ്യത്യസ്തമായ രീതിയില്‍ യൂത്ത് കോണ്‍ഗ്രസിന്റെ അഖിലേന്ത്യ കമ്മിറ്റി വിവിധ തരം പ്രവര്‍ത്തനങ്ങളില്‍ എനിക്ക് അവസരം തന്നിരുന്നു. ആ രീതിയില്‍ പാര്‍ട്ടിയുടെ കേരള നേതൃത്വവും അഖിലേന്ത്യാ നേതൃത്വവും ഇത്തവണയും ഒരു പരിഗണന നല്‍കിയതില്‍ വളരെയേറെ സന്തോഷമുണ്ട്.