ഏപ്രിൽ 21 നു പുണ്യദിനമായ ഈസ്റ്റർ ദിനത്തിലുണ്ടായ നാടിനെയൊട്ടാകെ നടുക്കിയ സ്ഫോടന പരമ്പരയ്ക്ക് പിന്നാലെ ശ്രീലങ്കയിൽ വീണ്ടും സ്ഫോടനം . കൊളംബോക്ക് 40 കി.മീ വടക്ക് പുഗോഡ പട്ടണത്തിലാണ് സ്ഫോടനമുണ്ടായത്. പുഗോഡ മജിസ്ട്രേറ്റ് കോടതിക്ക് സമീപത്തെ തുറന്ന പ്രദേശത്താണ് സ്ഫോടനമുണ്ടായിരിക്കുന്നത് .

രാജ്യത്ത് കഴിഞ്ഞ ദിവസമുണ്ടായ ഭീകരാക്രമണത്തിന്റെ മുറിവുണങ്ങും മൻപ് നടന്ന സ്ഫോടനത്തില്‍ ആർക്കും പരുക്കില്ലെന്നു പോലീസ് വക്താവ് റുവാൻ ഗുണശേഖര പറഞ്ഞു. സ്ഫോടനത്തെക്കുറിച്ച് അന്വേഷണം ആരംഭിച്ചതായി പൊലീസ് അറിയിച്ചു. ഈസ്റ്റർ ദിനത്തിൽ നടന്ന സ്ഫോടനങ്ങളിൽ ഉപയോഗിച്ച തരം സ്ഫോടക വസ്തു അല്ല ഉപയോഗിക്കപ്പെട്ടതെന്നാണ് പ്രാഥമിക നിഗമനം. ഈസ്റ്റർ ദിനത്തിൽ ശ്രീലങ്കയിൽ പല സ്ഥലത്തായി ചാവേർ ആക്രമണത്തിൽ 359 പേർ കൊല്ലപ്പെടുകയും 500 പേർക്ക് പരുക്കേൽക്കുകയും ചെയ്‌തിരുന്നു.