കേരളത്തില്‍ വോട്ടെടുപ്പ് കഴിഞ്ഞതോടെ ബി.ജെ.പി സംസ്ഥാന അദ്ധ്യക്ഷ പദവിയില്‍ നിന്ന് പി.എസ്. ശ്രിധരന്‍ പിള്ളയെ മാറ്റുമെന്ന അഭ്യൂഹം വീണ്ടും ശക്തമായി. മറ്റിടങ്ങളിലെ തിരഞ്ഞെടുപ്പ് പൂര്‍ത്തിയായിട്ടില്ലാത്തതിനാല്‍ അതുകഴിഞ്ഞശേഷം കേന്ദ്ര നേതൃത്വം ഇക്കാര്യം പരിഗണിക്കുമെന്ന അഭ്യൂഹമാണ് ശക്തമായിരിക്കുന്നത്. മേയ് 19നാണ് അവസാനഘട്ട വേട്ടെടുപ്പ്. 23ന് ഫലപ്രഖ്യാപനം. അതിനുശേഷം തീരുമാനം ഉണ്ടാകുമെന്നാണ് ചല ഭാഗങ്ങളില്‍ നിന്നുണ്ടാവുന്ന പ്രചാരണം. എന്നാല്‍, ഇക്കാര്യം പാര്‍ട്ടി നേതൃത്വം സ്ഥിരീകരിക്കുന്നില്ല.

 അതേസമയം, കേരളത്തില്‍ ലോക്‌സഭയിലേക്ക് ബി.ജെ.പി അക്കൗണ്ട് തുറന്നാല്‍ ശ്രീധരന്‍ പിള്ളയുടെ സ്ഥാനത്തിന് ഇളക്കം തട്ടില്ലെന്നും പറയപ്പെടുന്നു. കഴിഞ്ഞ ജൂലായ് അവസാനമാണ് ശ്രീധരന്‍ പിള്ളയെ സംസ്ഥാന പ്രസിഡന്റായി കേന്ദ്ര നേതൃത്വം നിയോഗിച്ചത്. സംസ്ഥാന പ്രസിഡന്റായിരുന്ന കുമ്മനം രാജശേഖരനെ മേയ് മാസത്തില്‍ മിസോറാം ഗവര്‍ണറായി നിയോഗിച്ചതിനെ തുടര്‍ന്നാണ് രണ്ടു മാസത്തിന് ശേഷം ശ്രീധരന്‍ പിള്ളയ്ക്ക് നറുക്ക് വീണത്. ശ്രീധരന്‍ പിള്ളയെ താത്കാലിക പ്രസിഡന്റായിട്ടാണ് നിയോഗിച്ചിരിക്കുന്നത്.

ശബരിമല പ്രക്ഷോഭ സമയത്തും തിരഞ്ഞെടുപ്പുകാലത്തും ശ്രീധരന്‍ പിള്ള നടത്തിയ ചില പ്രസംഗങ്ങളും പ്രസ്താവനകളും വിവാദത്തിനും പ്രവര്‍ത്തകര്‍ക്കിടയില്‍ ആശയക്കുഴപ്പത്തിനും ഇടയാക്കിയിരുന്നു. ഇതില്‍ കേന്ദ്രനേതൃത്വത്തിന് അതൃപ്തിയുണ്ടായി എന്നാണ് അറിയുന്നത്. എന്നാല്‍, തിരഞ്ഞടുപ്പുകാലമായതിനാല്‍ തുടരട്ടെ എന്നായിരുന്നു തീരുമാനം. ശ്രീധരന്‍ പിള്ളയെ അദ്ധ്യക്ഷ പദവിയില്‍ നിന്ന് മാറ്റണമെന്ന ആവശ്യം പ്രവര്‍ത്തകരുടെ ഭാഗത്തുനിന്നും ഉയര്‍ന്നിരുന്നു. സ്ഥാനാര്‍ത്ഥി നിര്‍ണയ സമയത്തും ശ്രീധരന്‍ പിള്ള നടത്തിയ ചില പ്രസ്താവനങ്ങള്‍ പാര്‍ട്ടിയില്‍ വിവാദത്തിന് വഴിവച്ചിരുന്നു. ഇതെല്ലാമാണ് അദ്ദേഹത്തിന്റെ സ്ഥാന ചലനത്തിന് ഇടയാക്കിയേക്കാമെന്നാണ് അഭ്യൂഹം പരക്കുന്നത്. അതേസമയം, തിരഞ്ഞെടുപ്പില്‍ തിരുവനന്തപുരത്ത് ഉള്‍പ്പെടെ പാര്‍ട്ടി വിജയ പ്രതീക്ഷയിലാണ്. വിജയം നേടാനായാല്‍ അത് സംസ്ഥാന അദ്ധ്യക്ഷന്റെ കൂടി വിജയമാണ്. അങ്ങനെ വന്നാല്‍, കേന്ദ്രനേതൃത്വം വീണ്ടും ശ്രീധരന്‍ പിള്ളയില്‍ വിശ്വാസമര്‍പ്പിക്കുമെന്ന് കരുതുന്നുവരുമുണ്ട്.