തട്ടകക്കാരുടെ ആര്‍പ്പുവിളികളില്‍ തൃശൂര്‍ പൂരത്തിന് കൊടിയേറി. പ്രധാന പങ്കാളി ക്ഷേത്രങ്ങളായ തിരുവമ്പാടിയില്‍ പതിനൊന്നരയോടെയും പാറമേക്കാവില്‍ 12നും കൊടിയേറി. തൃശൂരിന് ഇനി പൂരക്കാലം... പൂരത്തിന്റെ പ്രധാന പങ്കാളി ക്ഷേത്രങ്ങളായ തിരുവമ്പാടി, പാറമേക്കാവ് ക്ഷേത്രങ്ങളിലും ഘടകക്ഷേത്രങ്ങളിലും കൊടിയേറി. രാവിലെ പതിനൊന്നരയോടെയാണ്

തിരുവമ്പാടി ക്ഷേത്രത്തില്‍ കൊടിയേറിയത്. ശ്രീകോവിലില്‍ പൂജിച്ച കൊടിക്കൂറ തന്ത്രിയും മേല്‍ശാന്തിയും ചേര്‍ന്ന് പുറത്തേക്കെത്തിച്ചു പാരമ്പര്യാവകാശികള്‍ ഭൂമി പൂജ നടത്തി, ചെത്തിമിനുക്കിയ കവുങ്ങിന്‍മരത്തില്‍ ആലിലയും മാവിലയും ദര്‍ഭയും ചേര്‍ത്ത് അലങ്കരിച്ചു. പുറത്തെത്തിച്ച കൊടിക്കൂറ ദേവസ്വം പ്രതിനിധി ദേശക്കാര്‍ക്ക് കൈമാറി. കൊടിമരത്തില്‍ കെട്ടിയുയര്‍ത്തി. 12 ഓടെയാണ് പാറമേക്കാവ് ക്ഷേത്രത്തില്‍ കൊടിയേറിയത്.

ശ്രീകോവിലില്‍ പൂജിച്ച കൊടിക്കൂറ ദേശക്കാര്‍ ഏറ്റുവാങ്ങി പാരമ്പര്യവകാശികള്‍ ഒരുക്കിയ മരത്തില്‍ കൊടികെട്ടി ദേശക്കാര്‍ ചേര്‍ന്ന് ഉയര്‍ത്തി. േദവസ്വം പ്രതിനിധികളും ദേശക്കാരും ചേര്‍ന്നാണ് കൊടിയേറ്റിയത്. മന്ത്രി വി.എസ്.സുനില്‍കുമാറും കൊടിയേറ്റില്‍ പങ്കുചേര്‍ന്നു. ക്ഷേത്രത്തിലെ കൊടിയേറ്റിന് ശേഷം പുറത്തേക്കെഴുന്നെള്ളി വടക്കുന്നാഥ ക്ഷേത്ര മൈതാനിയിലെ മണികണ്ഠനാലിലും, നായ്ക്കനാലിലും, നടുവിലാലിലും, പാറമേക്കാവിലെ പാലമരത്തിലും ദേശക്കാര്‍ കൊടി നാട്ടി.

സിംഹമുദ്രയുള്ള കൊടിക്കൂറയാണ് പാറമേക്കാവ് ഉപയോഗിച്ചത്. അഞ്ചാനപ്പുറത്ത് പുറത്തേക്കെഴുന്നെള്ളിപ്പിന് പെരുനംകുട്ടന്‍മാരാരുടെ പ്രാമാണത്തില്‍ മേളവും അരങ്ങേറി. ബ്രഹ്മസ്വം മഠത്തിലും, വടക്കുന്നാഥ ക്ഷേത്രത്തിലെ കൊക്കര്‍ണി കുളത്തിലും ആറാട്ടിന് ശേഷം ഭഗവതിമാര്‍ തിരിച്ചെഴുന്നെള്ളി.

ബുധനാഴ്ച മുതല്‍ ദേശപ്പറയെടുപ്പിനായി ഭഗവതിമാര്‍ ഇറങ്ങും. ഘടകക്ഷേത്രങ്ങളില്‍ ആദ്യം ലാലൂര്‍ കാര്‍ത്യായനി ക്ഷേത്രത്തിലാണ് കൊടിയേറിയത്. 13നാണ് പൂരം, 11ന് സാമ്പിള്‍ വെടിക്കെട്ട്. 12ന് വിളംബരമറിയിക്കുന്ന വടക്കുന്നാഥ ക്ഷേത്രത്തിന്റെ തെക്കേഗോപുര വാതില്‍ നെയ്തലക്കാവ് ഭഗവതി തുറക്കും. ഓലപ്പടക്കത്തിന് സുപ്രീംകോടതി അനുമതി ലഭിച്ചതോടെ പൂരത്തിന്റെ പ്രതിസന്ധികള്‍ അവസാനിച്ചു. തെച്ചിക്കോട്ട്കാവ് രാമചന്ദ്രന്റെ വിലക്ക് നീക്കാത്തതില്‍ തെക്കേഗോപുരനട തുറക്കുന്നതില്‍ ആശയക്കുഴപ്പം നിലനില്‍ക്കുന്നുണ്ടെങ്കിലും ഇക്കാര്യത്തിലും പരിഹാരമുണ്ടാകുമെന്നാണ് കരുതുന്നത്. പൂരം കൊടിയേറിയതോടെ തൃശൂരിന്റെ മനസാകെ പൂരാവേശത്തിലാണ്. എങ്ങും പൂരക്കാഴ്ചകളുടേതാണ്.