കേരളാ കോൺഗ്രസ് ചെയര്‍മാനും എംഎൽഎയുമായ കെ എം മാണിയുടെ നിര്യാണത്തെ തുടര്‍ന്ന് ഒഴിഞ്ഞു കിടക്കുന്ന പാലാ സീറ്റിൽ ഷോൺ ജോര്‍ജിനെ മത്സരിപ്പിക്കാനൊരുങ്ങി പി സി ജോര്‍ജ്. എൻഡിഎ മുന്നണിയിലെ ജനപക്ഷം സ്ഥാനാര്‍ത്ഥിയായി മത്സരിപ്പിക്കാനുള്ള നീക്കങ്ങളാണ് പി സി ജോര്‍ജ് ആരംഭിച്ചിരിക്കുന്നത്.

പത്തനംതിട്ട ലോക്സഭാ സീറ്റിലെ ബിജെപി സ്ഥാനാര്‍ത്ഥി കെ സുരേന്ദ്രനെ പിന്തുണച്ചാണ് പി സി ജോര്‍ജ് എൻഡിഎ മുന്നണിയുടെ ഭാഗമായത്. എൻഡിഎ പ്രവേശനം എതിര്‍ത്ത് ഒരു വിഭാഗം നേതാക്കൾ ജനപക്ഷം വിട്ടിരുന്നു. ഇതേതുടര്‍ന്ന് ഇന്ന് ചേരുന്ന നേതൃയോഗം പാര്‍ട്ടിയിൽ അഴിച്ചുപണി നടത്താൻ തീരുമാനിച്ചിട്ടുണ്ട്.

യുഡിഎഫ് മുന്നണിയിലേക്ക് പ്രവേശിക്കാനുള്ള ശ്രമങ്ങള്‍ പി സി ജോര്‍ജ് നടത്തിയിരുന്നു. എന്നാൽ കോൺഗ്രസിലെ ഒരു വിഭാഗം നേതാക്കളുടെ എതിര്‍പ്പിനെ തുടര്‍ന്ന് ശ്രമം പരാജയപ്പെടുകയായിരുന്നു. അതേസമയം പാലായിൽ ഇടതുമുന്നണി സ്ഥാനാര്‍ത്ഥിയായി മാണി സി കാപ്പനെ മത്സരിപ്പിക്കാനുള്ള ചര്‍ച്ചകളും സജീവമാണ്.

കേരള ജനപക്ഷം പിരിച്ചു വിട്ട് കേരള ജനപക്ഷം സെക്കുലർ എന്ന പേരിൽ രാഷ്ട്രീയ പാർട്ടി രൂപീകരിക്കും. പുതിയ പാർട്ടിയിൽ ഷോൺ ജോർജ് ചെയർമാനാകും. രക്ഷാധികാരി സ്ഥാനത്തു മാത്രം തുടരുമെന്നു പി.സി.ജോർജ് എംഎൽഎ അറിയിച്ചു. തിരഞ്ഞെടുപ്പ് കമ്മിഷന്റെ മാനദണ്ഡ പ്രകാരം പാർട്ടി രൂപീകരണം നടത്തുന്നതിന്റെ ഭാഗമായാണു നടപടി.

14 ജില്ലകളിലും 4 അംഗ കമ്മിറ്റിയെ നിയോഗിച്ചു. ഇവർ പഞ്ചായത്തു. തലത്തിൽനിന്നു തുടങ്ങി ഭാരവാഹി നിർണയം നടത്തും. ജൂണിൽ നടപടികൾ ആരംഭിക്കും. പാലായിൽ വരുന്ന ഉപതിരഞ്ഞെടുപ്പിൽ പാർട്ടി സീറ്റ് എൻഡിഎയോട് ആവശ്യപ്പെടുമെന്നും പി.സി. ജോർജ് പറഞ്ഞു.