യുഎസിലെ കലിഫോർണിയയിലുള്ള മിൽപീറ്റസിലും സാൻ ജോസിലുമായി നടന്ന മലയാളി യുവതികളുടെ ഇരട്ടക്കൊലപാതകത്തിൽ പ്രതി അനില ബേബിക്കെതിരെ ശക്തമായ തെളിവുകൾ പുറത്ത്. തൃശൂർ സ്വദേശിനി അഞ്ജന ഹരി (35), തിരുവനന്തപുരം സ്വദേശിനി ആൻ മേരി മാത്യു (40) എന്നിവർ കൊല്ലപ്പെട്ട കേസിൽ പ്രതിയായ അനിലയുടെ അറസ്റ്റ് മിൽപീറ്റസ് പോലീസ് ഔദ്യോഗികമായി രേഖപ്പെടുത്തിയിട്ടുണ്ട്. പ്രതിക്കെതിരെ മനഃപൂർവമുള്ള നരഹത്യാക്കുറ്റമാണ് ചുമത്തിയിരിക്കുന്നത്.

ലഭിച്ച പ്രധാന തെളിവുകൾ:ശരീരത്തിലെ പരുക്കുകളും രക്തക്കറയും: അഞ്ജന കൊല്ലപ്പെട്ട പാർക്കിങ് ഏരിയയ്ക്ക് സമീപമുള്ള വാൽഗ്രീൻസ് പാർക്കിങ് കേന്ദ്രത്തിൽ നിന്നാണ് അനിലയെ പോലീസ് കസ്റ്റഡിയിലെടുത്തത്. ഈ സമയത്ത് പ്രതിയുടെ കൈകാലുകളിൽ പരുക്കുകളും രക്തക്കറയും കണ്ടെത്തിയിരുന്നു. ഇവ ഡോക്ടർമാരുടെ സഹായത്തോടെ പോലീസ് പരിശോധിച്ചുകഴിഞ്ഞു.

ശാസ്ത്രീയ തെളിവുകൾ (ബ്രേക്ക് പാടുകളുടെ അഭാവം): അഞ്ജനയെ കണ്ടയുടൻ അനില വാഹനം മുന്നോട്ടെടുത്ത് ആക്സിലറേറ്റർ നൽകി ഇടിച്ചുതെറിപ്പിക്കുകയായിരുന്നുവെന്ന് ദൃക്സാക്ഷികൾ മൊഴി നൽകിയിട്ടുണ്ട്. വാഹനം ഇടിക്കുന്നതിന് മുൻപ് റോഡിൽ ബ്രേക്ക് ചെയ്തതിന്റെ യാതൊരുവിധ അടയാളങ്ങളും ഉണ്ടായിരുന്നില്ലെന്ന് ട്രാഫിക് ഡിവിഷൻ പരിശോധനയിൽ കണ്ടെത്തി. ഇതിലൂടെ പ്രതി ബോധപൂർവമാണ് വാഹനം ഇടിച്ചുകയറ്റിയതെന്ന് പോലീസ് സ്ഥിരീകരിച്ചു. ആൻ മേരി മാത്യുവിന്റെ കൊലപാതകത്തിലും പ്രതിക്കെതിരെ ശക്തമായ തെളിവുകൾ പോലീസിന് ലഭിച്ചിട്ടുണ്ട്. ഫ്ലാറ്റിനുള്ളിൽ ആൻ മേരി കത്തിക്കുത്തേറ്റാണ് മരിച്ചത്. തുടർന്ന് അഞ്ജനയെ പാർക്കിങ് ഏരിയയിലേക്ക് വിളിച്ചുവരുത്തി കാറിടിച്ച് കൊലപ്പെടുത്തുകയായിരുന്നു. പ്രതി കുറ്റക്കാരിയാണെന്ന് കോടതി കണ്ടെത്തിയാൽ 25 വർഷം വരെ ജയിൽ ശിക്ഷ ലഭിക്കാൻ സാധ്യതയുണ്ട്.