പ്രതിസന്ധി മറികടക്കാനാകാതെ റബര്‍ വ്യാപാരികള്‍ കടകളടയ്ക്കുന്നു. ചെറുകിട വ്യാപാരികള്‍ക്കു വന്‍ നഷ്ടമാണ് ഉണ്ടായിരിക്കുന്നത്. വില 130 രൂപയിലെത്തിയപ്പോള്‍ വ്യാപാരികള്‍ കര്‍ഷകര്‍ കൊണ്ടുവന്ന മുഴുവന്‍ റബറും വാങ്ങിയിരുന്നു. വില കുത്തനെ ഉയര്‍ന്നില്ലെങ്കിലും ഇടിയില്ലെന്ന പ്രതീക്ഷയിലായിരുന്നു വാങ്ങല്‍. എന്നാല്‍, വില പെട്ടെന്ന് ഇടിഞ്ഞത് അപ്രതീക്ഷിത തിരിച്ചടിയായി.
ഇന്നലെ ഇടുക്കി, പാലക്കാട്, കൊല്ലം ജില്ലകളിലെ നിരവധി കടകള്‍ അടച്ചു. കര്‍ഷകരില്‍ നിന്നു വാങ്ങിയ റബര്‍ വില്‍ക്കാനും കൂടുതല്‍ റബര്‍ വാങ്ങാനും കഴിയാതായതോടെയാണ് ഇത്. പ്രതിസന്ധി രൂക്ഷമായാല്‍ കോട്ടയം ജില്ലയിലും കടകള്‍ അടച്ചിടേണ്ടിവരുമെന്നു വ്യാപാരികള്‍ പറയുന്നു.
അതേസമയം, പ്രതിസന്ധിയുടെ പേരില്‍ ചില വ്യാപാരികള്‍ റബറിന്റെ തരംതിരിവ് വര്‍ധിപ്പിച്ചതായി കര്‍ഷകര്‍ക്കു പരാതിയുണ്ട്. കഴിഞ്ഞയാഴ്ച വരെ ആര്‍.എസ്.എസ്. നാല് ഗ്രേഡ് ഇനത്തില്‍ പെടുത്തിയിരുന്ന റബര്‍ ഏതാനും ദിവസങ്ങളായി അഞ്ചാം ഗ്രേഡ് ഇനത്തില്‍പ്പെടുത്തിയാണു വാങ്ങുന്നതെന്നാണു പരാതി.
കമ്പനികള്‍ വിപണിയില്‍ നിന്നു വിട്ടുനിന്നതോടെ ഇന്നലെയും വിലയില്‍ ഇടിവുണ്ടായി. 118 120 രൂപയ്ക്കാണു പേരിനെങ്കിലും വ്യാപാരം നടന്നത്. കൂടുതല്‍ കടയുടമകളും വാങ്ങാന്‍ വിമുഖത കാണിച്ചതായും കര്‍ഷകര്‍ പറയുന്നു. സൂക്ഷിക്കാന്‍ ഇടമില്ലെന്ന കാരണമാണ് ഇന്നലെ മിക്ക കമ്പനികളും പറഞ്ഞത്. അതേസമയം റബര്‍ ബോര്‍ഡ് വില ഇന്നലെയും ഉയര്‍ന്നുതന്നെ നിന്നു. ആര്‍.എസ്.എസ്. നാല് ഗ്രേഡിന്റെ റബര്‍ ബോര്‍ഡ് വില 128.15 രൂപയായിരുന്നു.
ടയര്‍ വ്യവസായികള്‍ക്ക് ഇളവു നല്‍കാതിരിക്കുകയായിരുന്നു ഇതിലും ഭേദമെന്നു കര്‍ഷകര്‍ പയുന്നു. 115 118 നിരക്കില്‍ സ്ഥിരമായി വില്‍ക്കുകയും കച്ചവടം സുഗമമായി നടക്കുകയും ചെയ്യുന്ന അവസരത്തിലാണു ടയര്‍ വ്യവസായികളുമായി ചര്‍ച്ച നടത്തിയതും അധിക വിലയ്ക്കു റബര്‍ സംഭരിക്കുമെന്നു പ്രഖ്യാപിച്ചതും. എന്നാല്‍ വില ഉയര്‍ന്നതുമില്ല, കച്ചവടം നടക്കുന്നുമില്ലെന്ന അവസ്ഥയാണ് ഇപ്പോള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha