കരിഓയില്‍ കേസ് പിന്‍വലിക്കുന്ന കാര്യം പുനപരിശോധിക്കുമെന്ന് മുഖ്യമന്ത്രി
ഹയര്‍ സെക്കന്‍ഡറി മുന്‍ ഡയറക്ടറും ഇപ്പോഴത്തെ വയനാട് കളക്ടറുമായ കേശവേന്ദ്രകുമാറിന്റെ ദേഹത്ത് കെഎസ്‌യു പ്രവര്‍ത്തകര്‍ കരിഓയില്‍ ഒഴിച്ച കേസ് പിന്‍വലിക്കാനുള്ള തീരുമാനം സര്‍ക്കാര്‍ പുനപരിശോധിക്കുന്നു.
വിവാദങ്ങള്‍ ഉണ്ടായ സാഹചര്യത്തില്‍ തീരുമാനം പുനപരിശോധിക്കുമെന്നാണ് മുഖ്യമന്ത്രി വ്യക്തമാക്കിയത്. കേസ് പിന്‍വലിക്കാനുള്ള തീരുമാനമെടുത്തത് നല്ല ഉദ്ദേശത്തോടെയാണെന്നും അദ്ദേഹം പറഞ്ഞു.
ഡല്‍ഹിയില്‍ നടത്തിയ വാര്‍ത്താ സമ്മേളനത്തിനിടെ മുഖ്യമന്ത്രി ഉമ്മന്‍ ചാണ്ടിയാണ് ഇക്കാര്യം അറിയിച്ചത്.
കേസ് പിന്‍വലിക്കാനുള്ള സര്‍ക്കാര്‍ തീരുമാനത്തിനെതിരേ വിവിധ കോണുകളില്‍ നിന്നും പ്രതിഷേധം ഉയര്‍ന്ന സാഹചര്യത്തിലാണ് മുഖ്യമന്ത്രി മലക്കം മറിഞ്ഞത്. സര്‍ക്കാരിലും പാര്‍ട്ടിയിലും വിഷയത്തില്‍ വ്യത്യസ്ത അഭിപ്രായം ഉയര്‍ന്നു വന്നു. കേസുകള്‍ പിന്‍വലിക്കുന്ന കാര്യത്തില്‍ സര്‍ക്കാര്‍ ജാഗ്രത കാണിക്കണമെന്ന് കെപിസിസി അധ്യക്ഷന്‍ വി.എം.സുധീരന്‍ ആവശ്യപ്പെട്ടു.
കേസ് പിന്‍വലിച്ചതു താന്‍ ആഭ്യന്തരമന്ത്രി ആയ ശേഷമല്ലെന്നും ഇക്കാര്യം മുഖ്യമന്ത്രിയുമായി ചര്‍ച്ച ചെയ്യുമെന്നും ആഭ്യന്തരമന്ത്രി രമേശ് ചെന്നിത്തലയും വ്യക്തമാക്കിയിരുന്നു. സര്‍ക്കാര്‍ തീരുമാനത്തിനെതിരേ കേശവേന്ദ്രകുമാറും ഐഎഎസ് അസോസിയേഷനും രംഗത്തുവന്നു. ഐഎഎസുകാര്‍ക്കു നേരേയുള്ള അക്രമങ്ങളുമായി ബന്ധപ്പെട്ട കേസുകള്‍ പിന്‍വലിക്കുന്നത് ഉദ്യോഗസ്ഥരുടെ മനോവീര്യം കെടുത്തുമെന്നും അതിനാല്‍ ഇക്കാര്യം പുനപരിശോധിക്കണമെന്നാവശ്യപ്പെട്ടു സര്‍ക്കാരിനു കത്ത് നല്‍കാനും അസോസിയേഷന്‍ തീരുമാനിച്ചിരുന്നു.
പ്രതിഷേധങ്ങള്‍ വ്യാപകമായതോടെ ആദ്യം തീരുമാനത്തെ ന്യായീകരിച്ച മുഖ്യമന്ത്രി തീരുമാനം പുനപരിശോധിക്കാന്‍ നിര്‍ബന്ധിതനാവുകയായിരുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
