കൊല്ലം കടയ്ക്കലിൽ മദ്യപിക്കുന്നതിനിടെ ഉണ്ടായ തര്‍ക്കത്തെത്തുടർന്ന് യുവാവ് കൊല്ലപ്പെട്ടു. മുക്കട സ്വദേശി ശ്രീകുമാറിനെ സുഹൃത്ത് ഗോപകുമാറാണ് വിറകു കഷ്ണം കൊണ്ട് തലയ്ക്കടിച്ച് കൊലപ്പെടുത്തിയത്. കൃത്യത്തിന് ശേഷം പ്രതി പൊലീസ് സ്റ്റേഷനിലെത്തി കീഴടങ്ങുകയായിരുന്നു.

ഇന്നലെ രാത്രി പത്തുമണിയോടെയായിരുന്നു സംഭവം.അയല്‍വാസികളും സുഹൃത്തുക്കളുമായ ഗോപകുമാറും ശ്രീകുമാറും പതിവായി ഒരുമിച്ച് മദ്യപിക്കുമായിരുന്നു.ഇന്നലെ രാത്രി ഗോപകുമാറിന്റെ അമ്മുമ്മയുെട വീട്ടിലിരുന്ന് ഇരുവരും മദ്യപിച്ചു. ഇതിനിടയില്‍ വാക്കേറ്റമായി. തര്‍ക്കത്തിനൊടുവില്‍ ഗോപകുമാര്‍ ശ്രീകുമാറിനെ വിറകു കഷ്ണം കൊണ്ട് തലയ്ക്കടിച്ചു.

വീട്ടില്‍ മറ്റാരുമില്ലാത്തിനാല്‍ വിവരം പുറംലോകമറിഞ്ഞില്ല. ഇന്നു രാവിലെ വീടിനു സമീപത്തെ കവലയിലെത്തി ഗോപകുമാര്‍ തന്നെ കൊലപാത വിവരം നാട്ടുകാരോട് പറഞ്ഞു. പിന്നാലെ പ്രതി കടയ്ക്കല്‍ പൊലീസ് സ്റ്റേഷനിലെത്തി കീഴടങ്ങി. ഗോപകുമാറിന്റെ അറസ്റ്റു രേഖപ്പെടുത്തി.