മകൾക്ക് മത്സരപരീക്ഷയ്ക്ക് പഠിക്കാൻ പുസ്തകം വാങ്ങാൻ പണമില്ലാത്തതിനെ തുടർന്ന്, സാരി ധരിച്ച് നഗ്നപാദയായി മാരത്തൺ ഓടി വിജയിച്ചിരിക്കുകയാണ് ഒരമ്മ. മഹാരാഷ്ട്രയിലെ യിലുള്ള അംബാജൊഗായിയിലാണ് ലോകത്തെമ്പടുമുള്ള അമ്മമാർക്ക് മാതൃകയായ ഈ ഹൃദയസ്പർശിയായ സംഭവം നടന്നത്.47 വയസുകാരിയായ രമാബായി രൺവീറാണ് മൂന്ന് കിലോമീറ്റർ നീണ്ട മാരത്തണിൽ മുപ്പതിനുമേൽ പ്രായമുള്ളവരുടെ വിഭാഗത്തിൽ ഒന്നാം സ്ഥാനം സ്വന്തമാക്കിയത്. എം.പി.എസ്.സി പരീക്ഷയ്ക്കുള്ള പുസ്തകങ്ങൾ വാങ്ങാൻ ആവശ്യമായ 3,200 രൂപ കണ്ടെത്താൻ കഴിയാതെ വിഷമിച്ചപ്പോഴാണ് സമ്മാനത്തുക ലക്ഷ്യമിട്ട് രമാബായി മത്സരത്തിൽ പങ്കെടുത്തത്.

സാരിയുടുത്ത് നഗ്നപാദയായി ഓടിയ ഇവർ വെറും 30 മിനിറ്റുകൊണ്ട് മത്സരം പൂർത്തിയാക്കി മൂവായിരം രൂപ സമ്മാനമായി നേടി.രമാബായിയോടൊപ്പം മാരത്തണിൽ പങ്കെടുത്ത മൂത്തമകൾ പൂജയ്ക്കും സ്വന്തം വിഭാഗത്തിൽ രണ്ടാം സ്ഥാനവും രണ്ടായിരം രൂപയും സമ്മാനമായി ലഭിച്ചു. ഈ തുക മുഴുവൻ ഇളയമകൾ ആരതിയുടെ പഠനത്തിനായി ഉപയോഗിക്കുമെന്നാണ് ഈ അമ്മ പറയുന്നത്. 2012-ൽ ഭർത്താവ് മരിച്ചതിനുശേഷം മറ്റുള്ളവരുടെ കൃഷിയിടത്തിൽ കൂലിപ്പണി ചെയ്ത് കുടുംബം പുലർത്തുന്ന രമാബായിയുടെ ഈ പോരാട്ടവീര്യം ഇപ്പോൾ സോഷ്യൽ മീഡിയയിൽ വലിയ രീതിയിൽ തരംഗമായിരിക്കുകയാണ്.