ഗുരുവായൂര് ക്ഷേത്രത്തില് അഷ്ടമി രോഹിണി ആഘോഷത്തിനായി ഒരുക്കങ്ങള് അവസാന ഘട്ടത്തിലെന്ന് ദേവസ്വം ബോര്ഡ്...
ഗുരുവായൂര് ക്ഷേത്രത്തില് അഷ്ടമി രോഹിണി ആഘോഷത്തിനായി ഒരുക്കങ്ങള് അവസാന ഘട്ടത്തിലെന്ന് ദേവസ്വം ബോര്ഡ്. ക്ഷേത്രത്തിലെത്തുന്ന ഭക്തര്ക്കെല്ലാം സുഖ ദര്ശനമൊരുക്കാനായി ദേവസ്വം നടപടികള് സ്വീകരിച്ചിട്ടുണ്ട്. അന്നേ ദിവസം വി.ഐ.പി / സ്പെഷ്യല് ദര്ശനങ്ങള്ക്ക് നിയന്ത്രണം ഏര്പ്പെടുത്തിയതായും ദേവസ്വം ബോര്ഡ് .
ഭഗവാന്റെ പിറന്നാള് ദിനത്തില് ക്ഷേത്ര ദര്ശനത്തിനെത്തുന്ന എല്ലാ ഭക്തര്ക്കും വിശേഷാല് പ്രസാദ ഊട്ട് നല്കും. പ്രസാദ ഊട്ടിനു മാത്രമായി 24 ലക്ഷം രൂപയുടെ എസ്റ്റിമേറ്റ് ഭരണസമിതി അംഗീകരിക്കുകയും ചെയ്തു. എസ്റ്റിമേറ്റ് തികയാത്ത പക്ഷം ആവശ്യമായത്ര ഭക്ഷണം തയ്യാറാക്കി നല്കാനും അനുമതി നല്കി. അഷ്ടമിരോഹിണി ആഘോഷ നടത്തിപ്പിനായി 36,82,000 രൂപയുടെ എസ്റ്റിമേറ്റിനും ദേവസ്വം അനുമതി നല്കി.
അഷ്ടമിരോഹിണി ദിനത്തില് രാവിലെയും ഉച്ചയ്ക്കും രാത്രിയിലുമുള്ള വിശേഷാല് എഴുന്നെള്ളിപ്പിന് ദേവസ്വം ഗജവീരന് ഇന്ദ്ര സെന് സ്വര്ണ്ണക്കോലമേറ്റും. ഗോപാലകൃഷ്ണന്, വിനായകന് എന്നീ ദേവസ്വം കൊമ്പന്മാര് പറ്റാനകളാകും. രാവിലെയുള്ള കാഴ്ചശീവേലിക്ക് തിരുവല്ല രാധാകൃഷ്ണന് ,ഗുരുവായൂര് സന്തോഷ് മാരാര് & പാര്ടി മേളം ഒരുക്കും.
ഉച്ചയ്ക്കും രാത്രി വിളക്കിനും പഞ്ചവാദ്യത്തിന് തിമിലയില് ചോറ്റാനിക്കര നന്ദപ്പന് മാരാരും സംഘവും. മദ്ദളം - കലാമണ്ഡലം കുട്ടി നാരായണന് & പാര്ട്ടി, ഇടയ്ക്ക - പല്ലശ്ശന സുധാകരന് & പാര്ട്ടി, കൊമ്പ്- പേരാമംഗലം വിജയന് & പാര്ട്ടി, ഇലത്താളം - പാഞ്ഞാള് വേലുക്കുട്ടി & പാര്ട്ടി എന്നീ കലാകാരന്മാര് അണിനിരക്കും. ഗുരുവായൂര് ശശി മാരാരും സംഘവും സന്ധ്യാതായമ്പക ഒരുക്കും. രാത്രി വിളക്കിന് വിശേഷാല് ഇടയ്ക്ക - ഗുരുവായൂര് ശശി മാരാര്, നാദസ്വരപ്രദക്ഷിണം - നെന്മാറ കണ്ണന്
അതേസമയം ഗുരുവായൂരപ്പന് നേദിച്ച പാല്പായസമുള്പ്പെടെയുള്ള വിശേഷാല് പ്രസാദം ഊട്ട് ആണ് അഷ്ടമിരോഹിണി നാളിലെ പ്രത്യേകത. രസകാളന്, ഓലന്, അവിയല്, എരിശ്ശേരി, പച്ചടി, മെഴുക്കുപുരട്ടി, ശര്ക്കരവരട്ടി, കായ വറവ്, അച്ചാര്, പുളി ഇഞ്ചി,പപ്പടം,മോര്, പാല്പായസം എന്നിവ ഉള്പ്പെടുന്ന വിഭവങ്ങള് ഭക്തര്ക്ക് ധന്യതയേകും. അഷ്ടമി രോഹിണി നാളിലെ വിശേഷാല് പ്രസാദ ഊട്ട് രാവിലെ ഒന്പത് മണിക്ക് ആരംഭിക്കും. ഉച്ചയ്ക്ക് 2 മണിക്ക് പ്രസാദ ഊട്ടിനുള്ള വരി നില്പ്പ് അവസാനിപ്പിക്കും.
അന്ന ലക്ഷ്മി ഹാളിലും അതിനോട് ചേര്ന്നുള്ള താല്ക്കാലിക പന്തലിലും ശ്രീ ഗുരുവായൂരപ്പന് ഓഡിറ്റോറിയത്തിലും അതിന് സമീപമൊരുക്കുന്ന പന്തലിലും പ്രസാദംഊട്ട് നല്കും. അന്ന ലക്ഷ്മി ഹാളിലേക്കുള്ള ക്യൂ സംവിധാനം ക്ഷേത്രക്കുളത്തിന് വടക്കുഭാഗത്തു ഒരുക്കും.തെക്കേ നടയിലെ ശ്രീ ഗുരുവായൂരപ്പന് ആഡിറ്റോറിയത്തിലേക്കുളള ക്യൂ പട്ടര്കുളത്തിന് വടക്ക്ഭാഗത്തായി ഒരുക്കുന്നതാണ്. പ്രസാദ ഊട്ട് ഭക്തര്ക്ക് നല്കാന് ദേവസ്വം ജീവനക്കാര്ക്ക് പുറമെ 150 പ്രഫഷണല് വിളമ്പുകാരെ നിയോഗിക്കുകയും ചെയ്യും .
അഷ്ടമിരോഹിണി നാളില് അഭൂതപൂര്വ്വമായ ഭക്തജന തിരക്ക് പ്രമാണിച്ച് വി. ഐ പി ,സ്പെഷ്യല് ദര്ശനത്തിന് രാവിലെ 6 മുതല് ക്ഷേത്രത്തില് നിയന്ത്രണമുണ്ടാകും. കൂടുതല് ഭക്തര്ക്ക് സുഗമമായ ദര്ശനം സാധ്യമാക്കുന്നതിനാണ് നടപടി. സീനിയര് സിറ്റിസണ് ദര്ശനം രാവിലെ നാലര മണി മുതല് തുടങ്ങി അഞ്ചര മണിവരെയും വൈകുന്നേരം 5 മുതല് 6 വരെയുമാകും. തദ്ദേശീയര്ക്ക് ക്ഷേത്രത്തിലെ നിലവിലുള്ള സമയത്ത് ദര്ശനം അനുവദിക്കും. ബാക്കിയുള്ള സമയങ്ങളില് പൊതു വരിസം വിധാനം മാത്രമാകും. ക്ഷേത്രത്തില് വിശേഷാല് കാഴ്ച ശീവേലി നടക്കുന്നതിനാല് ശയനപ്രദക്ഷിണത്തിനും ദര്ശനത്തിനും നിയന്ത്രണമുണ്ടാകും.
https://www.facebook.com/Malayalivartha
