പി കെ ശശിക്കെതിരെ പരാതി നല്‍കിയ വനിതാ നേതാവിന്റെ രാജി സ്വീകരിക്കേണ്ടന്ന നിലപാടില്‍ ഡിവൈഎഫ്‌ഐ ജില്ലാ നേതൃത്വം. യുവതിയുടെ ആരോപണങ്ങള്‍ ചര്‍ച്ച ചെയ്തതിനു ശേഷം തുടര്‍നടപടികള്‍ സ്വീകരിക്കാം എന്നാണ് ജില്ലാ നേതൃത്വത്തിന്റെ നിലപാട്.

മുതിര്‍ന്ന നേതാക്കള്‍ അനുനയ നീക്കങ്ങള്‍ക്കും ശ്രമം നടത്തുന്നുണ്ട്. ശശിക്കെതിരെ പരാതി നല്‍കിയപ്പോള്‍ സ്ത്രീപക്ഷ നിലപാടെടുത്ത് ഉറച്ചു നിന്നവരെയെല്ലാം തരം താഴ്ത്തിയതില്‍ പ്രതിഷേധിച്ചാണ് ജില്ലാ കമ്മറ്റിയംഗമായ വനിതാ നേതാവ് രാജി നല്‍കിയത്.

യുവതിക്കൊപ്പം നിന്ന ഡിവൈഎഫ്‌ഐ ജില്ലാ സെക്രട്ടേറിയറ്റ് അംഗവും ജില്ലാ പഞ്ചായത്ത് അംഗവുമായ ജിലനേഷ് ബാലനെ ജില്ലാ കമ്മിറ്റിയിലേക്ക് തരം താഴ്ത്തിയിരുന്നു. അതുമാത്രമല്ല നിരന്തരം അപവാദപ്രചാരണം നടത്തിയിരുന്ന ഭാരവാഹിയെ ജില്ലാ സെക്രട്ടേറിയറ്റിലെടുത്തെന്നും ആക്ഷേപമുണ്ട്.
അടുത്ത ആഴ്ച ചേരുന്ന ഡിവൈഎഫ്‌ഐ സംസ്ഥാന കമ്മറ്റിക്ക് ശേഷമേ ഇക്കാര്യം ജില്ലാ കമ്മറ്റി ചര്‍ച്ച ചെയ്യൂ.