ലിബിയയിൽ നിന്ന് സജീവ് നാട്ടിലെത്തുന്നത് സൗമ്യ മരിച്ചെന്ന് അറിയാതെ. സജീവ് ലിബിയയില്‍ ജോലിക്കായി പോയിട്ട് ഒരു മാസം പോലുമായിട്ടില്ല. ലിബിയയില്‍നിന്നു തുര്‍ക്കിയിലേക്കെത്തി ജിദ്ദ, അബുദാബി വഴി തിരുവനന്തപുരത്തോ കൊച്ചിയിലോ ആയിരിക്കും സജീവ് എത്തുക. ഇന്നലെ ജോലിസ്ഥലത്തു നിന്നു നാട്ടിലേക്കു തിരിച്ച സജീവിനെ സൗമ്യയുടെ മരണവിവരം അറിയിച്ചിട്ടില്ല. ഗുരുതരമായി പരുക്കേറ്റെന്നാണ് അറിയിച്ചിരിക്കുന്നത്. സജീവ് എത്തിക്കഴിഞ്ഞാല്‍ ഓച്ചിറയില്‍ സ്വകാര്യ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന സൗമ്യയുടെ മൃതദേഹം അന്ത്യകര്‍മ്മങ്ങള്‍ക്കായി കൊണ്ടുപോകും. നാളെത്തന്നെ ചടങ്ങുകള്‍ നടന്നേക്കും.

ശനിയാഴ്ച സിവില്‍ പോലീസ് ഓഫീസര്‍ സൗമ്യ സര്‍വകലാശാല അസിസ്റ്റന്റ് പരീക്ഷയെഴുതിയതിനു ശേഷം ഉച്ചകഴിഞ്ഞ് ഡ്യൂട്ടിക്കായി വള്ളികുന്നം സ്‌റ്റേഷനിലേക്ക് പോകുന്നതിനിടെയാണ് പൊലീസുകാരനായ അജാസ് പ്രണയ നൈരാശ്യം മൂലം വെട്ടി വീഴ്ത്തിയും, തീകൊളുത്തിയും സൗമ്യയെ കൊലപ്പെടുത്തിയത്. സംഭവസ്ഥലത്ത് വെച്ചുതന്നെ സൗമ്യ മരണത്തിന് കീഴടങ്ങി. 40 ശതമാനത്തോളം പൊള്ളലേറ്റ് പ്രതി അജാസ് ആശുപത്രിയില്‍ ചികിത്സയിലാണ്. ഗുരുതരാവസ്ഥയിലാണ് അജാസിന്റെ നിലയെന്നാണ് റിപ്പോര്‍ട്ട്.