'ഓപ്പറേഷന് സിന്ദൂറി'ലെ നേതൃപാടവത്തിലൂടെ ശ്രദ്ധേയനായ വ്യക്തി... അയോധ്യ ശ്രീരാമജന്മഭൂമി തീര്ത്ഥ ട്രസ്റ്റിന്റെ ആദ്യ ചീഫ് എക്സിക്യുട്ടീവ് ഓഫിസറായി (സിഇഒ) റിട്ടയേഡ് എയര് മാര്ഷല് ജിതേന്ദ്ര മിശ്രയെ തെരഞ്ഞെടുത്തു....
അയോധ്യ ശ്രീരാമജന്മഭൂമി തീര്ത്ഥ ട്രസ്റ്റിന്റെ ആദ്യ ചീഫ് എക്സിക്യുട്ടീവ് ഓഫിസറായി (സിഇഒ) റിട്ടയേഡ് എയര് മാര്ഷല് ജിതേന്ദ്ര മിശ്രയെ തെരഞ്ഞെടുത്തു. ഉത്തര്പ്രദേശിലെ ദിയോറിയ ജില്ലയിലെ ഭോപത്പുരയാണ് അദ്ദേഹത്തിന്റെ സ്വദേശം.
ഇന്ത്യന് വ്യോമസേനാ ചരിത്രത്തില് നിര്ണായക അധ്യായം രചിച്ച 'ഓപ്പറേഷന് സിന്ദൂറി'ലെ നേതൃപാടവത്തിലൂടെ ശ്രദ്ധേയനായ വ്യക്തിയാണ് ജിതേന്ദ്ര മിശ്ര. ക്ഷേത്ര ഭരണത്തിന്റെ സുതാര്യതയും കാര്യക്ഷമതയും ലക്ഷ്യമിട്ടാണ് ട്രസ്റ്റ് സിഇഒ പദവിയിലേക്ക് ഇദ്ദേഹത്തെ നിയമിച്ചത്. ഡല്ഹിയില് നിന്നുള്ള മഹേഷ് ഭാഗ്ചന്ദക, അയോധ്യയിലെ മുന് അഡീഷണല് അഡ്വക്കേറ്റ് ജനറല് മദന് മോഹന് പാണ്ഡെ, നിര്മല യാദവ് എന്നിവരെ പുതിയ ട്രസ്റ്റികളായി തെരഞ്ഞെടുക്കുകയും ചെയ്തു.
വ്യോമസേനയില് 38 വര്ഷത്തിലധികം സേവനം അനുഷ്ഠിച്ച ജിതേന്ദ്ര മിശ്ര, വെസ്റ്റേണ് എയര് കമാന്ഡിന്റെ മേധാവിയായാണ് വിരമിച്ചത്. രാജ്യത്തിന്റെ സുരക്ഷാ ചരിത്രത്തില് നിര്ണായകമായ ഓപ്പറേഷന് സിന്ദൂര് സൈനിക നീക്കത്തിന് നേതൃത്വം നല്കിയതില് ഇദ്ദേഹം വഹിച്ച പങ്ക് വളരെ വലുതാണ്. പാകിസ്ഥാന് കേന്ദ്രീകരിച്ചുള്ള ഭീകര ക്യാമ്പുകള്ക്കും സൈനിക കേന്ദ്രങ്ങള്ക്കുമെതിരായ വ്യോമാക്രമണത്തില് സമാനതകളില്ലാത്ത തന്ത്രങ്ങളാണ് അദ്ദേഹം മെനഞ്ഞത്.മികച്ച സേവനത്തിനുമുള്ള അംഗീകാരമായി രാജ്യത്തെ ഏറ്റവും ഉയര്ന്ന യുദ്ധകാല സേവന മെഡലുകളില് ഒന്നായ സര്വോത്തം യുദ്ധ സേവ മെഡല് നല്കി രാഷ്ട്രപതി ദ്രൗപതി മുര്മു അദ്ദേഹത്തെ ആദരിച്ചിരുന്നു.
കാര്ഗില് യുദ്ധകാലത്ത് മിറാഷ് 2000 വിമാനങ്ങളില് ലേസര് നിയന്ത്രിത ബോംബുകള് സജ്ജീകരിക്കുന്നതില് പ്രവര്ത്തിച്ച പരിചയസമ്പത്തും അദ്ദേഹത്തിനുണ്ട്. സൈനിക രംഗത്തെ ഈ ഉയര്ന്ന അച്ചടക്കവും വലിയ ദൗത്യങ്ങള് വിജയകരമായി ഏകോപിപ്പിക്കാനുള്ള കഴിവുമാണ് രാമക്ഷേത്ര ട്രസ്റ്റ് സിഇഒ പദവിയിലേക്കും അദ്ദേഹത്തെ തുണച്ചത്.
https://www.facebook.com/Malayalivartha
