ഇലക്ട്രല്‍ ബോണ്ടുകള്‍ വഴി 14 മാസത്തിനിടെ രാഷ്ട്രീയ പാര്‍ട്ടികള്‍ക്ക് സംഭാവന നല്‍കിയത് 5800 കോടി രൂപയെന്ന് വിവരാവകാശ രേഖ. 2018 മാര്‍ച്ച് ഒന്നു മുതല്‍ 2010 മെയ് 10 വരെ 5800 കോടി രൂപയുടെ തെരഞ്ഞെടുപ്പ് ബോണ്ടുകള്‍ വാങ്ങിയതായി എസ്.ബി.ഐ അറിയിച്ചു. ആകെ ബോണ്ടിന്റെ 75 ശതമാനവും ലോക്‌സഭാ തെരഞ്ഞെടുപ്പ് പ്രഖ്യാപിച്ചതിന് ശേഷമാണ് വാങ്ങിയതെന്നും വിവരാവകാശ രേഖ വഴി ലഭിച്ച മറുപടിയില്‍ വ്യക്തമാക്കുന്നു.

4,444.32 കോടി രൂപയുടെ ഇലക്ട്രല്‍ ബോണ്ടുകള്‍ വാങ്ങിയത് 2019 മാര്‍ച്ച് ഒന്നിനും മെയ് 10നും ഇടയിലാണ്. 2018ല്‍ കേന്ദ്ര സര്‍ക്കാര്‍ പ്രഖ്യാപിച്ച ഇലക്ട്രല്‍ ബോണ്ട് പദ്ധതി പ്രകാരം എസ്.ബി.ഐയുടെ തെരഞ്ഞെടുത്ത 29 ശാഖകളിലൂടെ പത്ത് ഘട്ടങ്ങളിലായാണ് ബോണ്ടുകള്‍ വിറ്റത്. ആര്‍.ടി.ഐ വഴി ലഭിച്ച മറുപടി പ്രകാരം 2018 മാര്‍ച്ച് ഒന്നിനും 2019 മെയ് 10നും ഇടയിലായി 5851.41 കോടി രൂപയുടെ തെരഞ്ഞെടുപ്പ് ബോണ്ടുകളാണ് വാങ്ങിയിട്ടുള്ളത്. ഇതില്‍ ആദ്യഘട്ടത്തില്‍ 1407.09 കോടി രൂപയുടെ ബോണ്ടുകള്‍ വാങ്ങിയത് അജ്ഞാതരായ ദാതാക്കളാണ്.

നീമച്ച് ആസ്ഥനമായുള്ള വിവരാവകാശ പ്രവര്‍ത്തകന്‍ ചന്ദ്രശേഖര ഗൗഡാണ് ഇതു സംബന്ധിച്ച് എസ്.ബി.ഐയോട് വിവരം ആരാഞ്ഞത്. 1000, 10,000, ഒരു ലക്ഷം, പത്ത് ലക്ഷം, ഒരു കോടി രൂപ വിലയുള്ള ബോണ്ടുകളാണ് എസ്.ബി.ഐ വഴി വിറ്റത്. അവസാനം നടന്ന പൊതു തെരഞ്ഞെടുപ്പില്‍ ഒരു ശതമാനത്തില്‍ കുറയാതെ വോട്ടു നേടിയ 1951ലെ ജനപ്രാതിനിധ്യ നിയമ പ്രകാരം രാഷ്ട്രീയ പാര്‍ട്ടിയായി അംഗീകരിച്ചിട്ടുള്ള ഏത് പാര്‍ട്ടികള്‍ക്കും തെരഞ്ഞെടുപ്പ് ബോണ്ട് വഴി സംഭാവന സ്വീകരിക്കാമെന്നാണ് പദ്ധതിയുടെ നിബന്ധനയില്‍ പറയുന്നത്. ഇലക്ട്രല്‍ ബോണ്ടുകള്‍ വഴി ലഭിച്ച സംഭാവനകളും, ഇത് നല്‍കിയ വ്യക്തികളുടെ വിവരങ്ങളും തെരഞ്ഞെടുപ്പ് കമ്മീഷന് മുദ്രവെച്ച കവറില്‍ സമര്‍പ്പിക്കാന്‍ ഏപ്രിലില്‍ ഇലക്ട്രല്‍ ബോണ്ടിനെതിരായ ഹര്‍ജി പരിഗണിക്കവെ സുപ്രീം കോടതി നിര്‍ദേശിച്ചിരുന്നു.

കോര്‍പ്പറേറ്റ് കമ്പനികളില്‍ നിന്നും രാഷ്ട്രീയക്കാരില്‍ നിന്നും കോടിക്കണക്കിന് രൂപ രാഷ്ട്രീയ പാര്‍ട്ടികല്‍ സംഭാവന വാങ്ങുന്നതിനെ തുടര്‍ന്നാണ് തെരഞ്ഞെടുപ്പ് ചെലവ് സര്‍ക്കാര്‍ ഏറ്റെടുക്കണമെന്ന് തെരഞ്ഞെടുപ്പ് പരിഷ്‌കരണ റിപ്പോര്‍ട്ടില്‍ വ്യക്തമാക്കിയത്. റിപ്പോര്‍ട്ട് എല്ലാ പാര്‍ട്ടികളും അംഗീകരിച്ചെങ്കിലും ഇതുവരെ അത് വെളിച്ചം കണ്ടിട്ടില്ല. അധികാരത്തിലിരിക്കുന്ന പാര്‍ട്ടികളാണ് ഓരോ വര്‍ഷവും കോടിക്കണക്കിന് രൂപ സംഭാവന വാങ്ങുന്നത്.