ഓരോ പാര്‍ട്ടികളും തങ്ങളുടെ പരാജയം വിലയിരുത്തിക്കൊണ്ടിരിക്കുകയാണ്. കേരളത്തില്‍ തകര്‍ന്നടിഞ്ഞ സിപിഎം വല്ലാത്തൊരവസ്ഥയിലാണ്. അതിനിടെ ചാനല്‍ ചര്‍ച്ചകളിലെ സ്ഥിരം സാന്നിധ്യവും സി.പി.എം നേതാവും സി.ഐ.ടി,യു നേതാവുമായ ആനത്തലവട്ടം ആനന്ദന്‍ രംഗത്തെത്തി. അഹങ്കാരമാണ് കോണ്‍ഗ്രസ് പാര്‍ട്ടിയെ പരാജയത്തിലേക്ക് നയിച്ചതെന്നാണ് പറയുന്നത്. ബി.ജെ.പി ഭരണത്തിന്റെ വൈകല്യങ്ങള്‍ പ്രചരിപ്പിക്കാന്‍ ദേശീയ തലത്തില്‍ പ്രതിപക്ഷ ഐക്യം ഇല്ലാതെ പോയെന്നും അദ്ദേഹം ആരോപിച്ചു. ആലുവയില്‍ സി.ഐ.ടി.യു ജില്ലാ കണ്‍വെന്‍ഷനില്‍ സംസാരിക്കവേയാണ് ആനത്തലവട്ടത്തിന്റെ വിമര്‍ശനം ഉന്നയിച്ചത്.

മോദിയുടെ അഞ്ചു വര്‍ഷത്തെ ഭരണത്തില്‍ കോര്‍പ്പറേറ്റുകളുടെ സ്വത്ത് നാലഞ്ച് ഇരട്ടി വര്‍ദ്ധിച്ചു. കോര്‍പ്പറേറ്റുകള്‍ക്കു മോദി ദാസ്യവേല ചെയ്യുകയാണ്. അതിനായി ഇന്ത്യന്‍ ജനതയുടെ അഭിമാനം പണയം വെയ്ക്കാന്‍ മോദിക്കു മടിയില്ലെന്നും ആനത്തലവട്ടം കുറ്റപ്പെടുത്തി.
വാര്‍ത്താവിനിമയ രംഗം ശത്രുക്കളെ ഏല്‍പ്പിച്ചു കഴിഞ്ഞുവെന്നും ഇന്ത്യന്‍ റെയില്‍വേയും വില്‍ക്കുകയാണെന്നു പറഞ്ഞ അദ്ദേഹം ഇ.എസ്.ഐ കോര്‍പ്പറേറ്റുകള്‍ക്ക് ഒന്നര ശതമാനം കുറച്ച് കൊടുത്തുവെന്നും ആരോപിച്ചു.

അതേസമയം തന്നെ സിപിഎമ്മിന്റെ പരാജയം എന്തുകൊണ്ടാണെന്ന് ആനത്തലവട്ടം വ്യക്തമാക്കണമെന്ന് കോണ്‍ഗ്രസ് നേതാക്കളും ആരോപിക്കുന്നു. ഭക്തര്‍ പാര്‍ട്ടിയില്‍ നിന്നും അകന്ന് പോയതാണ് പരാജയ കാരണമെന്ന് വിലയിരുത്തിയിരുന്നു. 

ശബരിമല വിഷയത്തില്‍ നഷ്ടമായ വിശ്വാസിവോട്ട് തിരികെ കൊണ്ടുവരാന്‍ സിപിഎം കേന്ദ്രകമ്മിറ്റി നിര്‍ദേശം നേരത്തെ തന്നെയുണ്ടായിരുന്നു. ഇതിന് ആവശ്യമായ നടപടികള്‍ കേരള ഘടകത്തിനു തീരുമാനിക്കാം. കേരളത്തില്‍ പാര്‍ട്ടി അനുഭാവികളുടെ വോട്ടുകള്‍ നഷ്ടമായെന്നാണ് കേന്ദ്രകമ്മിറ്റി വിലയിരുത്തിയത്. തോല്‍വി മറികടക്കാന്‍ 11 ഇന കര്‍മപരിപാടിക്കു രൂപം നല്‍കി. നിലവിലെ രാഷ്ട്രീയ അടവുനയവുമായി മുന്നോട്ടുപോകും. പി.ആര്‍. നടരാജനെ സിപിഎം ലോക്‌സഭാ കക്ഷി നേതാവായി നിശ്ചയിച്ചു.ജനകീയ അടിത്തറ വീണ്ടെടുക്കാനാണ് കര്‍മപരിപാടി ആവിഷ്‌കരിക്കുന്നത്. നഷ്ടമായ വോട്ട് ബാങ്ക് തിരിച്ചു പിടിക്കുക എന്നതാണു പ്രധാന ലക്ഷ്യം. 

ഇതിനിടെ സിപിഎം സംസ്ഥാന ഘടകത്തിനെതിരെ വിമര്‍ശനമുയര്‍ത്തി ഭരണപരിഷ്‌കാര കമ്മിഷന്‍ അധ്യക്ഷന്‍ വി.എസ്.അച്യുതാനന്ദന്‍ കേന്ദ്രകമ്മിറ്റിക്കു കത്തു നല്‍കി. വ്യക്തികേന്ദ്രീകൃതമായ വിലയിരുത്തലല്ലാതെ വസ്തുനിഷ്ഠമായ വിലയിരുത്തല്‍ നടത്തണം. എന്തുകൊണ്ട് തിരിച്ചടിയേറ്റുവെന്നു സത്യസന്ധമായി പരിശോധന നടത്തണമെന്നും തൊടുന്യായം കണ്ടെത്തുന്നതിലേക്കു വിശകലനം പരിമിതപ്പെടുത്തരുതെന്നും അദ്ദേഹം കത്തില്‍ ആവശ്യപ്പെട്ടു.

ഇതിനിടെ ഭക്തരെ തിരികെ കൊണ്ടുവരാന്‍ വീടുകള്‍ തോറും പ്രചരണം നടത്താനും പാര്‍ട്ടി തീരുമാനിച്ചിരുന്നു.