യൂണിവേഴ്സിറ്റി കോളജിലെ എസ്.എഫ്.ഐ അക്രമങ്ങള്ക്കും ഉത്തരക്കടലാസ് മോഷണത്തിനും എതിരെ ഗവര്ണര് പി. സദാശിവം നടപടിയെടുക്കുന്നില്ലെന്ന് ആരോപിച്ച് രൂക്ഷവിമര്ശനവുമായി ബി.ജെ.പി
യൂണിവേഴ്സിറ്റി കോളജിലെ എസ്.എഫ്.ഐ അക്രമങ്ങള്ക്കും ഉത്തരക്കടലാസ് മോഷണത്തിനും എതിരെ ഗവര്ണര് പി. സദാശിവം നടപടിയെടുക്കുന്നില്ലെന്ന് ആരോപിച്ച് രൂക്ഷവിമര്ശനവുമായി ബി.ജെ.പി സംസ്ഥാന വക്താവ് ബി. ഗോപാലകൃഷ്ണന്. ബി.ജെ.പിക്കാര് തന്നെ നിയമിച്ച ഗവര്ണര്ക്കെതിരെയാണ് അതിരൂക്ഷ വിമര്ശനം. സാധാരണ കേരളത്തില് ഗവര്ണര്ക്കെതിരെ നേതാക്കളാരും വ്യക്തിപരമായ വിമര്ശനം നടത്താറില്ല. യൂണിവേഴ്സിറ്റി കോളജിലെ സംഭവങ്ങള് ആധികാരികമായി തെളിഞ്ഞിട്ടും ഗവര്ണര് പാറക്കല്ല് പോലെ ഇരിക്കുകയാണ്. ഇത് കുറ്റകരമായ അനാസ്ഥയാണെന്നും ഗോപാലകൃഷ്ണന് ആരോപിച്ചു. ഗവര്ണര് ആക്ട് ചെയ്യണം. അതിനായില്ലെങ്കില് രാജിവെച്ച് വീട്ടില് പോകണമെന്നും ഗോപാലകൃഷ്ണന് ആവശ്യപ്പെട്ടു.
ഗവര്ണര് കസേരയില് നോക്കുകുത്തിയായി തുടരുന്നത് ജനാധിപത്യത്തിന് നിരക്കുന്നതല്ലെന്നും ബി ഗോപാലകൃഷ്ണന് വിമര്ശിച്ചു. യൂണിവേഴ്സിറ്റി കോളേജിലെ പൂര്വവിദ്യാര്ത്ഥികളായ എസ്എഫ്ഐ നേതാക്കളുടെ പിഎസ്സി പരീക്ഷാ ഫലം പരിശോധിക്കണമെന്നും ആവശ്യപ്പെടുന്നു. പരീക്ഷാ ക്രമക്കേടുകള്ക്കെതിരെ പ്രഖ്യാപിച്ച അന്വേഷണം ഫലപ്രദമാകില്ല. സി.പി.എം നേതൃത്വം നല്കുന്ന സിന്ഡിക്കേറ്റ് നടത്തുന്ന അന്വേഷണം കളവ് കേസ് കള്ളന് അന്വേഷിക്കുന്നത് പോലെയാണ്. കുറ്റവാളികളെ സംറക്ഷിക്കുന്ന സര്ക്കാരാണിത്. പരീക്ഷാ ക്രമക്കേട് പുറത്തുള്ള ഏജന്സി അന്വേഷിക്കണം. അതിനായി ഗവര്ണര് ഇടപെടണമെന്നും ബിജെപി വക്താവ് ആവശ്യപ്പെട്ടു.
ഗവര്ണര് പല കാര്യങ്ങളിലും ഇടപെടുന്നില്ലെന്നും ഗോപാലകൃഷ്ണന് ആരോപിച്ചു. യൂണിവേഴ്സിറ്റി കോളേജിലും ഭരണഘടന സ്ഥാപനമായ പി.എസ്.സിയിലും നിരവധി ക്രമക്കേടുകള് നടന്നെന്ന് ബോധ്യമായിട്ടും സര്വ്വകലാസാല ചാന്സലറായ ഗവര്ണറോ അദ്ദേഹത്തിന്റെ ഓഫീസായ രാജ്ഭവനോ ചെറുവിരല് അനക്കിയിട്ടില്ല. ഗവര്ണ്ണറുടെ കാലാവധി തീരാന് ഒരു മാസംകൂടിയേ ബാക്കിയുള്ളൂ. അതുവരെ ആരെയും പിണക്കാതെ മുന്നോട്ട് പോകാനാണ് അദേഹം ശ്രമിക്കുന്നതെന്നും ബി. ഗോപാലകൃഷ്ണന് ആരോപിച്ചു.
യൂണിവേഴ്സിറ്റി കോളേജിന്റെ ചാന്സലര് കൂടിയായ ഗവര്ണര് അടിയന്തരമായി ഇടപെട്ട് അന്വേഷണം നടത്തണമെന്ന് ബിജെപി ദേശീയ നിര്വാഹക സമിതിയംഗം പി.കെ. കൃഷ്ണദാസ് കഴിഞ്ഞ ദിവസം ആവശ്യപ്പെട്ടിരുന്നു. യൂണിവേഴ്സിറ്റി കോളേജ് മയക്കുമരുന്നിന്റെ കേന്ദ്രമാണ്. അവിടെ നടക്കുന്ന പിഎസ്സി പരീക്ഷകളില് ക്രമക്കേട് നടന്നിട്ടുണ്ടെങ്കില് അതിനെതിരെ നടപടിയെടുക്കണമെന്നും അദ്ദേഹം ആവശ്യപ്പെട്ടിരുന്നു. എന്നാല് സംസ്ഥാന അധ്യക്ഷന് പി.എസ് ശ്രീധരന്പിള്ളയോ, വിദ്യാര്ത്ഥി സംഘടനയായ എ.ബി.വി.പിയോ ഗവര്ണര്ക്കെതിരെ ഇതുവരെ പ്രതികരിച്ചിട്ടില്ല.
https://www.facebook.com/Malayalivartha
