ദമ്ബതികള്‍ക്ക് മര്‍ദനമേറ്റ സംഭവത്തില്‍ പോലീസിന്റെ നടപടിയെ വിമര്‍ശിച്ച് സ്വമേധയാ കേസെടുത്ത് വനിതാകമ്മീഷന്‍ അധ്യക്ഷ എം സി ജോസഫെയിന്‍. പോലീസ് സ്‌റ്റേഷന് തൊട്ടടുത്ത് നടന്ന സംഭവമായിട്ടും പോലീസ് കേസെടുക്കാതെ പ്രതിയെ വിട്ടയച്ചത് അങ്ങേയറ്റത്തെ വീഴ്ച്ചയാണെന്നും വനിതാ കമ്മീഷന്‍ അധ്യക്ഷ പറഞ്ഞു. മര്‍ദനത്തില്‍ പരിക്കേറ്റ ദമ്ബതികള്‍ക്ക് ചികിത്സ നല്‍കാനും ആരും തയ്യാറായില്ല. പ്രതിയെ എത്രയും വേഗം അറസ്റ്റ് ചെയ്യണം. പരിക്കേറ്റ യുവതിയെയും ഭര്‍ത്താവിനെയും കാണണം. ഇക്കാര്യങ്ങള്‍ ചൂണ്ടിക്കാണിച്ച് വയനാട് ജില്ലാ പോലീസ് മേധാവിയോട് സംഭവം സംബന്ധിച്ച് അടിയന്തര റിപ്പോര്‍ട്ട് തേടിയതായും എം സി ജോസഫെയ്ന്‍ പറഞ്ഞു.

ചൊവ്വാഴ്ച്ച രാവിലെ വനിതാ കമ്മീഷന്‍ അധ്യക്ഷ നേരിട്ട് അമ്ബലവയല്‍ പോലീസ് സ്‌റ്റേഷനിലെത്തി സംഭവത്തിന്റെ വിശദാംശങ്ങള്‍  ചോദിച്ചറിഞ്ഞു. കമ്മീഷന്‍ ഡയറക്ടര്‍ വി യു കുര്യാക്കോസും ഒപ്പമുണ്ടായിരുന്നു. തമിഴ്‌നാട് സ്വദേശിയായ യുവതി പരാതി നല്‍കാന്‍ മടിച്ചാലും പോലീസ് പ്രശ്‌നത്തില്‍ ഇടപെടണമായിരുന്നു. ഒരു സ്ത്രീയെയും യുവാവിനെയും മര്‍ദിക്കുന്നത് നോക്കിനിന്ന നാട്ടുകാര്‍ക്കും ധാര്‍മ്മിക ഉത്തരവാദിത്തമുണ്ട്. സ്ത്രീകളെ കയ്യേറ്റം ചെയ്യാനോ വാക്കുകള്‍ കൊണ്ട് അപമാനിക്കാനോ ആര്‍ക്കും അവകാശമില്ലെന്ന് വനിതാ കമ്മീഷന്‍ അധ്യക്ഷ പറഞ്ഞു. ആള്‍ക്കൂട്ട ആക്രമണങ്ങള്‍ക്ക് സ്ത്രീയെ വിധേയയാക്കുന്നത് അങ്ങേയറ്റം അപലപനീയമാണ്. കേരളത്തില്‍ ഇതനുവദിക്കാനാവില്ലെന്നും വനിതാ കമ്മീഷന്‍ അധ്യക്ഷ വ്യക്തമാക്കി.