ആലത്തൂര് എം.പി രമ്യ ഹരിദാസിന് കാര് വാങ്ങുന്നതിന് പണപ്പിരിവ് നടത്തിയ സംഭവം; കെ.പി.സി.സി നേതൃത്വം എം.എല്.എയോട് അതൃപ്തി അറിയിച്ചു, വിശദീകരണം കിട്ടിയ ശേഷമായിരിക്കും നടപടിയെന്ന് അറിയുന്നു
കെ.പി.സി.സി പ്രസിഡന്റ് മുല്ലപള്ളി രാമചന്ദ്രന് സൈബര് സഖാക്കള്ക്ക് ലൈക്കടിച്ചെന്ന് ആക്ഷേപിച്ച കോണ്ഗ്രസ് എം.എല്.എ അനില് അക്കരെ പണി ഇരന്ന് വാങ്ങുന്നു. നടപടി എടുക്കുന്നതിന് മുന്നോടിയായി കെ.പി.സി.സി നേതൃത്വം അനില് അക്കരയോട് വിശദീകരണം തേടിയേക്കും. ആലത്തൂര് എം.പി രമ്യ ഹരിദാസിന് കാര് വാങ്ങുന്നതിന് പണപ്പിരിവ് നടത്തിയതിനെ മുല്ലപ്പള്ളി ചോദ്യം ചെയ്തിരുന്നു. ഇതേ തുടര്ന്ന് തനിക്ക് ഇത്തരത്തില് വാങ്ങുന്ന വാഹനം വേണ്ടെന്ന് രമ്യയും അറിയിച്ചു. ഇതോടെയാണ് കാര് വാങ്ങാന് ഇറങ്ങിയ യൂത്ത് കോണ്ഗ്രസുകാര്ക്ക് കട്ട സപ്പോര്ട്ടുമായി നിന്ന അനില് അക്കര എം.എല്.എ ക്ഷുഭിതനായത്. ഇക്കാര്യത്തില് കെ.പി.സി.സി നേതൃത്വം എം.എല്.എയോട് അതൃപ്തി അറിയിച്ചു. വിശദീകരണം കിട്ടിയ ശേഷമായിരിക്കും നടപടിയെന്ന് അറിയുന്നു.
കാര് വാങ്ങാന് നാല് ലക്ഷം രൂപയേ എം.പി എന്ന നിലയില് വായ്പ ലഭിക്കൂ. അതുകൊണ്ടാണ് യൂത്ത് കോണ്ഗ്രസുകാര് പിരിവ് എടുക്കാന് തീരുമാനിച്ചത്. അതിനെതിരെ സി.പി.എമ്മിന്റെ സൈബര് സഖാക്കള് രംഗത്തെത്തി. ഇതേ തുടര്ന്ന് പിരിവെടുത്തതിനെതിരെ കെ.പി.സി.സി പ്രസിഡന്റും രംഗത്തെത്തി. ഇക്കാര്യം പരസ്യമായി പ്രതികരിച്ച പ്രസിഡന്റിന്റെ നിലപാട് ശരിയല്ലെന്നാണ് അനില് അക്കരെ പറയുന്നത്. അത് സൈബര് സഖാക്കള്ക്ക് ലൈക്കടിച്ച പോലെയുള്ള നടപടിയാണ്. മുല്ലപ്പള്ളിയെപ്പോലെ താനും എഐസിസി അംഗമാണ്, മുല്ലപ്പള്ളിക്ക് ഫേസ്ബുക്കില് പ്രതികരിക്കാമെങ്കില് ഞങ്ങള്ക്കുമാകാമെന്നും അനില് അക്കര പറഞ്ഞു. ഇതോടെ പരസ്യവിമര്ശനം അതിര് കടന്നെന്നായി മറ്റ് നേതാക്കള്.
കെപിസിസി യോഗത്തിലേക്ക് എംഎല്എമാരെ ക്ഷണിക്കാറില്ല. തൃശൂരില് മാസങ്ങളായി ഡിസിസി പ്രസിഡന്റ് ഇല്ലാത്തത് പാര്ട്ടിയെ തളര്ത്തിയെന്നും അനില് അക്കര മാധ്യമങ്ങളോട് പ്രതികരിച്ചു. അതിന്റെ ഉത്തരവാദിത്തം കെ.പി.സി.സി പ്രസിഡന്റിനാണെന്നും പറഞ്ഞു. യൂത്ത് കോണ്ഗ്രസ് നേതാവ് അഡ്വ. സുനില് ലാലൂരും ഡിസിസി പ്രസിഡന്റിനെ വേണമെന്ന ആവശ്യവുമായി രംഗത്തുവന്നിരുന്നു. അതേസമയം, പകരം സംവിധാനം വരുംവരെ ടി എന് പ്രതാപന് ഡിസിസി പ്രസിഡന്റ് സ്ഥാനത്ത് തുടരുമെന്നാണ് കെ.പി.സി.സി നിലപാട്. രമ്യയ്ക്ക് കാര് വാങ്ങുന്നതിനെ ചൊല്ലിയുണ്ടായ വിവാദത്തില് ഇ.എം.എസിനെ വരെ വലിച്ചിഴച്ച് കോണ്ഗ്രസ് എം.എല്.എ വി.ടി ബല്റാം രൂക്ഷവിമര്ശനം ഏറ്റുവാങ്ങിയിരുന്നു. അങ്ങനെ വിവാദം രൂക്ഷമാകുമെന്ന് മനസ്സിലാക്കിയാണ് മുല്ലപ്പള്ളി ഇടപെട്ടത്.
വാഹനം വാങ്ങാന് യൂത്ത് കോണ്ഗ്രസ് പിരിവ് നടത്തുന്നത് അഴിമതി നടത്താനുള്ള പുതിയ ഉപാധിയാണെന്ന് ആക്ഷേപം ഉയര്ന്നിരുന്നു. കോണ്ഗ്രസ്, യൂത്ത്കോണ്ഗ്രസ് കുടുംബങ്ങളില് നിന്നും പ്രവര്ത്തകരില് നിന്നും മാത്രമാണ് പിരിവ് നടത്തുന്നത് എന്നാണ് നേതൃത്വം നല്കിയ വിശദീകരണം. യൂത്ത് കോണ്ഗ്രസ് ആലത്തൂര് പാര്ലമെന്റ് കമ്മിറ്റിയാണ് സംഭാവന കൂപ്പണ് പുറത്ത് ഇറക്കിയത്. 14 ലക്ഷം രൂപയുടെ വാഹനം വാങ്ങാന് ആയിരം രൂപയുടെ കൂപ്പണ് അച്ചടിച്ച് യൂത്ത് കോണ്ഗ്രസ് മണ്ഡലം കമ്മിറ്റികള് മുഖേനയാണ് പിരിവ് നടത്തുന്നതെന്ന് യൂത്ത് കോണ്ഗ്രസ് നേതൃത്വം പറഞ്ഞത്. ജൂലായ് 25നുള്ളില് ഓരോ മണ്ഡലം കമ്മിറ്റിയും രണ്ട് ലക്ഷം രൂപാ വിതം നല്കണമെന്നായിരുന്നു നിര്ദേശം. എംപിക്ക് പ്രതിമാസം 1.90 ലക്ഷംരൂപ ശമ്പളവും അലവന്സും ലഭിക്കും. പിന്നെന്തിനാണ് പണപിരിവെന്ന് പ്രവര്ത്തകര് ചോദിച്ച് തുടങ്ങി. എംപിയെന്ന നിലയില് സെക്രട്ടറി, സ്റ്റാഫ്, ഓഫീസ് അലവന്സ് എന്നിവ വേറെ ലഭിക്കും. വിമാന, ട്രെയിന്യാത്ര സൗജന്യമാണ്. പാര്ലമെന്റ് കൂടുമ്പോള് ബത്തയും ലഭിക്കും. അതിനാല് പിരിവ് നടത്തുന്നത് ശരിയായ രീതിയല്ലെന്നായിരുന്നു ആരോപണം. \
https://www.facebook.com/Malayalivartha
