കരാര്‍ ജീവനക്കാര്‍ക്ക് പ്രസവാവധി ഉള്‍പ്പെടെയുള്ള ആനുകൂല്യങ്ങള്‍ക്ക് അര്‍ഹതയുണ്ടെന്ന് സംസ്ഥാന മനുഷ്യാവകാശ കമ്മിഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക്. അവ നിഷേധിക്കുന്നത് മനുഷ്യാവകാശ ലംഘനമാണ്. പ്രസവാവധിയെടുത്തതിന് വര്‍ധിപ്പിച്ച ശമ്പളം നിഷേധിച്ച കേരള സര്‍വകലാശാലയ്‌ക്കെതിരേയാണ് ഉത്തരവ്. പരാതിക്കാരിക്ക് വര്‍ധിപ്പിച്ച ശമ്പളം ഉടന്‍ നല്‍കണമെന്ന് രജിസ്ട്രാറോട് നിര്‍ദേശിച്ചു. കേരള സര്‍വകലാശാലയിലെ സ്വയംഭരണ എന്‍ജിനിയറിങ് കോളേജ് കരാര്‍ ജീവനക്കാരിയാണ് പരാതിക്കാരി.
2003 മുതല്‍ ഇവിടെ ജോലിചെയ്യുന്ന ഇവര്‍ക്ക് 15,000 രൂപയാണ് ശമ്പളം. അഞ്ചുവര്‍ഷം സേവനകാലാവധി പൂര്‍ത്തിയാക്കിയവര്‍ക്ക് 16,000 രൂപ ശമ്പളം നല്‍കാന്‍ 2016 സെപ്റ്റംബറില്‍ സര്‍വകലാശാല തീരുമാനിച്ചിരുന്നു. എന്നാല്‍, 135 ദിവസത്തെ പ്രസവാവധി എടുത്തെന്നപേരില്‍ പരാതിക്കാരിക്ക് ഈ തുക സര്‍വകലാശാല നല്‍കിയില്ല. പ്രസവാവധി സേവനകാലാവധിയുടെ ഭാഗമല്ലെന്നായിരുന്നു സര്‍വകലാശാലയുടെ വാദം.
കരാര്‍ ജീവനക്കാര്‍ക്ക് ഒരുമാസത്തെ കാഷ്വല്‍ അവധിക്കും ശമ്പളമില്ലാത്ത 15 ദിവസത്തെ അവധിക്കും മാത്രമാണ് അര്‍ഹതയെന്ന് സര്‍വകലാശാല കമ്മിഷനെ അറിയിച്ചു. 135 ദിവസത്തെ അവധിയെടുത്തതോടെ പരാതിക്കാരി 15 വര്‍ഷം പൂര്‍ത്തിയാക്കിയിട്ടില്ലെന്നും സര്‍വകലാശാല വാദിച്ചു. കേരള സര്‍ക്കാരും സി.എച്ച്. റാഷിദയും തമ്മിലുള്ള കേസിലും മിനിയും എല്‍.ഐ.സി.യും തമ്മിലുള്ള കേസിലും കരാര്‍ജീവനക്കാര്‍ക്ക് പ്രസവാനുകൂല്യങ്ങള്‍ നിഷേധിക്കരുതെന്ന് ഹൈക്കോടതി ഉത്തരവിട്ടിട്ടുണ്ട്. ഡല്‍ഹി മുനിസിപ്പല്‍ കോര്‍പ്പറേഷനും വനിതാ ജീവനക്കാരും തമ്മിലുള്ള കേസില്‍ ദിവസവേതനക്കാര്‍ക്കും കരാര്‍ ജീവനക്കാര്‍ക്കും പ്രസവാനുകൂല്യങ്ങള്‍ക്ക് അര്‍ഹതയുണ്ടെന്ന സുപ്രീംകോടതി വിധിയും കമ്മിഷന്‍ എടുത്തുപറഞ്ഞു.