പ്രായംപോലും നോക്കാതെ ഒരു റിട്ടയേര്‍ട് അധ്യാപകനെ തെരുവിലിട്ട് തല്ലി ചതക്കുന്ന വീഡിയൊ ആരെയും സങ്കടപ്പെടുത്തുന്ന ഒന്നാണ്. താല്‍ക്കാലിക മതില്‍ തകര്‍ത്തതുമായി ബന്ധപ്പെട്ട നിസ്സാര തര്‍ക്കത്തിലാണ് റിട്ടയേഡ് അധ്യാപകന്‍ കുന്നത്തുള്ളി വീട്ടില്‍ സുഗുണനെ പത്തോളം വരുന്ന ആളുകള്‍ ക്രൂരമായി മര്‍ദിക്കുന്നത്. ഞായറാഴ്ച വൈകിട്ടു പരിസരവാസികളായ യുവാക്കളാണ് കൂട്ടംകൂടി മര്‍ദിച്ചത്. അവശനിലയില്‍ സുഗുണനെ തൃശൂര്‍ ഗവ: മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കൈ ഒടിഞ്ഞതിനു പുറമേ തലയ്ക്കും ഗുരുതര പരുക്കുണ്ട്. പത്തംഗ സംഘം ആക്രമിക്കുന്നതിന്റെ വീഡിയോ ദൃശ്യങ്ങള്‍ പുറത്തായിട്ടുണ്ട്. സംഭവം കണ്ടുനിന്നവരില്‍ ഒരാളാണ് വീഡിയോ പകര്‍ത്തിയത്. മര്‍ദിക്കുന്ന ദൃശ്യങ്ങളടങ്ങിയ വീഡിയോ മകന്‍ സിജോ പോലീസിനു നല്‍കിയിട്ടും പോലീസ് തണുപ്പന്‍ നയമാണ് സ്വീകരിച്ചതെന്ന് ആക്ഷേപമുണ്ട്.

അന്വേഷണം നടത്തുന്നതുള്‍പ്പെടെ ഒരു നടപടിയുംഉണ്ടായില്ല. മകന്‍ പോലീസിനു നല്‍കിയ പരാതി സ്വീകരിക്കാന്‍ വിസമ്മതിച്ചതായും പറയുന്നു. അധ്യാപകന്റെ വീടിന്റെ മതിലില്‍ ഒരു ഭാഗം ചിലര്‍ കഴിഞ്ഞദിവസം രാത്രി പൊളിച്ചിരുന്നു. വീടിനോടു ചേര്‍ന്നു റോഡരികില്‍ നിന്ന സംഘത്തോട് ഇതു സംബന്ധിച്ചു സുഗുണന്‍ സംസാരിച്ചു. ഇതാണ് പ്രകോപനകാരണമെന്നു പറയുന്നു. ഈ സംഘം ഇദ്ദേഹത്തിനുനേരേ പാഞ്ഞടുക്കുകയായിരുന്നുവെന്നു ദൃക്സാക്ഷികള്‍ പറഞ്ഞു. ചിലര്‍ ക്രൂരമായി വയോധികനെ മര്‍ദിക്കുന്നതു വീഡിയോയിലുണ്ട്. മുഖത്ത് ആഞ്ഞടിച്ചതിനു പുറമേ ചവിട്ടിയും ഉന്തിയും നിലത്തുവീഴ്ത്തുന്ന ദൃശ്യങ്ങളുമുണ്ട്. മുമ്പും പ്രദേശവാസികളില്‍നിന്ന് ദുരനുഭവങ്ങള്‍ ഉണ്ടായിട്ടുണ്ടെന്നു സിജു പറഞ്ഞു. അതേസമയം, സംഭവം വിവാദമായതോടെ പോലീസ് ആശുപത്രിയിലെത്തി സുഗുണന്റെ മൊഴിയെടുത്തു. പ്രമോദ്, സഹോദരന്‍ പ്രകാശന്‍, പ്രകാശന്റെ മകന്‍ പ്രണവ്, അടിയറ രാജു തുടങ്ങി കണ്ടാലറിയാവുന്ന 15 പേര്‍ക്കെതിരേ കേസെടുത്ത് അന്വേഷണം ആരംഭിച്ചതായി എസ്.ഐ. ബിന്ദുലാല്‍ പറഞ്ഞു.

തന്റെ വീടിന്റെ മതില്‍ പൊളിച്ചതു ചോദ്യം ചെയ്തതിന് റിട്ട. അധ്യാപകനെ ഇത്തരത്തില്‍ പത്തോളം പേര്‍ കൂട്ടം ചേര്‍ന്ന് കണ്ണില്‍ ചോരയില്ലാതെ തല്ലി കയ്യൊടിച്ചത്. എളവള്ളി വാകയില്‍ കുന്നത്തുള്ളി സുഗുണനെ (78) അബോധാവസ്ഥയില്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചതെന്നാണ് പോലീസ് നല്‍കിയ സൂചന. ഇദ്ദേഹത്തിന്റെ കൈ ഒടിഞ്ഞതിനു പുറമെ തലയ്ക്കും ഗുരുതര പരുക്കേറ്റിട്ടുണ്ട്. സംഭവം കണ്ടുനിന്നവരിലൊരാള്‍ പകര്‍ത്തിയ വിഡിയോ പൊലീസിനു ലഭിച്ചെങ്കിലും ആദ്യം ആരെയും അറസ്റ്റ് ചെയ്തിട്ടില്ല. പിന്നീട് വീഡിയ വലിയ രീതിയില്‍ പ്രചരിച്ചതോടെയാണ് പോലീസ് നടപടിക്ക് മുതിര്‍ന്നത്.

റിട്ട. അധ്യാപകന്റെ വീട്ടുവളപ്പിലെ മതിലിന്റെ ഒരുഭാഗം ആരോ രാത്രിയില്‍ പൊളിച്ചിരുന്നു. അയല്‍വാസികളായ ചിലര്‍ സംഘം ചേര്‍ന്നു പൊളിച്ചെന്നായിരുന്നു സുഗുണന്റെ സംശയം. മതിലിനോടു ചേര്‍ന്നു റോഡരികില്‍ നിന്നിരുന്ന ഒരുകൂട്ടം ആളുകളോട് ഇക്കാര്യം സുഗുണന്‍ ചോദിച്ചതാണ് പ്രകോപനത്തിനു കാരണമെന്നാണ് നാട്ടുകാര്‍ പറയുന്നത്. സുഗുണനു നേര്‍ക്കു പത്തോളം പേരടങ്ങുന്ന സംഘം ആക്രോശിക്കുന്നതും ഇതില്‍ ചിലര്‍ ക്രൂരമായി മര്‍ദിക്കുന്നതും വിഡിയോ ദൃശ്യങ്ങളില്‍ കാണാം. പലവട്ടം മുഖത്ത് ആഞ്ഞടിക്കുന്നുണ്ട്. കൂട്ടത്തിലൊരാള്‍ പ്രായം പോലും പരിഗണിക്കാതെ ഇദ്ദേഹത്തെ അടിച്ചു നിലത്തു വീഴ്ത്തുന്നതും ദൃശ്യങ്ങളിലുണ്ട്