ചീറിപ്പാഞ്ഞ് വന്ന സ്വകാര്യബസ് തലകീഴായി മറിഞ്ഞ് ഒരു സ്ത്രീക്കും ഡ്രൈവര്‍ക്കും ഉള്‍പ്പെടെ നിരവധി പേര്‍ക്ക് പരിക്ക്. ഒരാളുടെ നില അതീവഗുരുതരമാണ്. അപകടത്തില്‍ പരിക്കേറ്റവരെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചു. ഇന്ന് രാവിലെ 9.45തോടെ കോഴിക്കോട് തൊണ്ടയാട് ബൈപ്പാസ് ജംഗ്ഷനിലാണ് അപകടം നടന്നത്. കോഴിക്കോട് ഭാഗത്തേക്ക് വരികയായിരുന്ന ആക്‌ട്രോസ് ബസാണ് അപകടത്തില്‍പെട്ടത്. തൊണ്ടയാട് ജങ്ഷനില്‍ സിഗ്‌നല്‍ മറികടക്കാന്‍ അതിവേഗതിയില്‍ വരുന്നതിനിടെ ബസ് നിയന്ത്രണം വിട്ട് ഡിവൈഡറില്‍ കയറുകയായിരുന്നു. തുടര്‍ന്ന് എതിര്‍ദിശയിലൂടെ ലോഡ് കയറ്റി വരികയായിരുന്ന ടിപ്പറിന് പിറകെ ഇടിച്ചാണ് മറിഞ്ഞതെന്ന് ദൃക്‌സാക്ഷികള്‍ പറയുന്നു.

ഇടിച്ച് മറിയും മുമ്പ് റോഡിന് എതിര്‍ഭാഗത്തെ സൂപ്പര്‍മാര്‍ക്കറ്റിന് മുന്നില്‍ നിര്‍ത്തിയിട്ട പിക്കപ്പ് വാനിലും ബസിടിച്ചു. ബസില്‍ കുടുങ്ങിയ യാത്രക്കാരെ ഓടിക്കൂടിയ നാട്ടുകാരാണ് പുറത്തെടുത്തത്. സംഭവമറിഞ്ഞ് പോലീസും ഫയര്‍ഫോഴ്‌സും സ്ഥലത്തെത്തി. വിവിധ ആശുപത്രികളില്‍ നിന്ന് രക്ഷാപ്രവര്‍ത്തനത്തിനായി ആംബുലന്‍സും സ്ഥലത്തെത്തിയിരുന്നു. ബസില്‍ നിന്നൊഴുകിയ ഓയിലും ഡീസലും റോഡില്‍ പരന്നൊഴുകയതിനാല്‍ ഏറെ നേരം ഇതുവഴിയുള്ള ഗതാഗതം തടസപ്പെട്ടു. ഇത് കൂടുതല്‍ അപകടങ്ങള്‍ക്ക് ഇടയാക്കുമോ എന്ന് ആശങ്കയുണ്ടായിരുന്നു. എന്നാല്‍ നാട്ടുകാര്‍ സമയോചിതമായി ഇടപെട്ടു. കോഴിക്കോട് ഭാഗത്ത് നിന്നും മെഡിക്കല്‍കോളജ് ഭാഗത്തേക്കുള്ള സിഗ്‌നല്‍ തെളിഞ്ഞതിനാല്‍ അപകടം നടന്ന റോഡില്‍ കൂടുതല്‍ വാഹനങ്ങളുണ്ടായിരുന്നില്ല. വാഹനങ്ങള്‍ വരുമ്പോഴായിരുന്നു ബസ് നിയന്ത്രണം വിട്ടു മറുഭാഗത്തെ റോഡിലേക്കു കടന്നതെങ്കില്‍ വന്‍ ദുരന്തം ഉണ്ടാകുമായിരുന്നെന്ന് സമീപത്തെ കടക്കാര്‍ പറഞ്ഞു. 

രണ്ടുവര്‍ഷം മുമ്പ് ജൂണ്‍ 20 ന് ഇതേ സ്ഥലത്ത് ബസ് മറിഞ്ഞ് 30 ഓളം പേര്‍ക്ക് പരിക്കേറ്റിരുന്നു. അന്ന് തൊണ്ടയാട് ബസ് മറിഞ്ഞ് 23 പേര്‍ക്കാണ് പരിക്കേറ്റത്. നിയന്ത്രണം വിട്ട ബസ് ഇലക്ട്ിക് പേസ്റ്റിലിടിച്ചാണ് അന്ന് മറിഞ്ഞത്. .എടവണ്ണപ്പാറയില്‍ നിന്നും കോഴിക്കോട്ടേക്ക് പോയ ബസാണ് അപകടത്തില്‍പെട്ടത്. അന്നും തൊണ്ടയാട് ജംക്ഷനില്‍ സിഗ്‌നല്‍ മറികടക്കാന്‍ പാഞ്ഞു വരുന്നതിനിടെയാണ് അപകടം. നിയന്ത്രണംവിട്ട് ഡിവൈഡറില്‍ കയറിയ ബസ് തൊട്ടടുത്ത റോഡിലേക്ക് കടന്ന് മരത്തില്‍ ഇടിച്ചാണ് മറിഞ്ഞത്. ബസില്‍ കുടുങ്ങിയ യാത്രക്കാരെ ഓടിക്കൂടിയ നാട്ടുകാരാണ് പുറത്തെടുത്തത്. ബസുകളുടെ അമിത വേഗമാണ് അന്നത്തെയും ഇന്നത്തെയും അപകടങ്ങള്‍ക്ക് വഴിവെച്ചത്. പലതവണ നാട്ടുകാര്‍ പരാതി നല്‍കിയെങ്കിലും അധികൃതര്‍ സ്വകാര്യബസുകളെ നിയന്ത്രിക്കാന്‍ നടപടി സ്വീകരിച്ചില്ലെന്ന് ആക്ഷേപമുണ്ട്. 

സ്‌കൂള്‍ തുറക്കുന്ന സമയത്ത് സംസ്ഥാനത്തിന്റെ വിവിധഭാഗങ്ങളില്‍ അപകടങ്ങള്‍ ഉണ്ടാകുന്നത് പതിവാണ്. ഇതിന് മുന്‍കരുതലായി ബോധവല്‍ക്കരണവും മറ്റും എല്ലാവര്‍ഷവും നടത്താറുണ്ടെങ്കിലും ആദ്യത്തെ ആഴ്ച പിന്നിടുമ്പോള്‍ ആവേശം ഇല്ലാതാകും. സ്വകാര്യബസുകളുടെ മത്സയോട്ടത്തെ കുറിച്ച് വ്യാപകമായ പരാതിയാണുള്ളത്. കെ.എസ്.ആര്‍.ടി.സി ബസുകളുടെ സര്‍വ്വീസുകള്‍ വെട്ടിച്ചുരുക്കിയതോടെ മത്സരയോട്ടം വ്യാപകമായിട്ടുണ്ട്.