രോഗബാധിതനായി വീട്ടില്‍ ചികിത്സയില്‍ കഴിഞ്ഞ ബി.ജെ.പി പ്രവര്‍ത്തകനെ ഭാര്യയുടെ മുന്നിലിട്ട് വെട്ടിക്കൊലപ്പെടുത്തിയ കേസില്‍ അഞ്ച് സി.പി.എം പ്രവര്‍ത്തകര്‍ക്ക് ജീവപര്യന്തം ശിക്ഷ. ഒന്നാം പ്രതി ഊരാങ്കോട് സ്വദേശി പുലപ്പാടി വീട്ടില്‍ എം.അഖിലേഷ് (35), മാണിക്കോത്ത് വീട്ടില്‍ എം.ലിജേഷ് (32), മുണ്ടോത്ത് കണ്ടിയില്‍ എം.കലേഷ് (36), വാഴയില്‍ കെ.വിനീഷ് (25), പി.കെ.ഷൈജേഷ് (28) എന്നിവര്‍ക്കാണ് ജീവപര്യന്തം. രണ്ടും ഏഴും പ്രതികളായ കെ.വിജേഷ്, ചാലി വീട്ടില്‍ സി.ഷബിന്‍ എന്നിവരെ കോടതി വെറുതെ വിട്ടു. ബിജെപി പ്രവര്‍ത്തകന്‍ തലശ്ശേരി ഇല്ലത്തുതാഴെയിലെ സൗപര്‍ണികയില്‍ കെ.വി.സുരേന്ദ്രനെയാണ് (62) വെട്ടിക്കൊലപ്പെടുത്തിയത്. 2008 മാര്‍ച്ച് ഏഴിനായിരുന്നു കൊലപാതകം നടന്നത്. സുരേന്ദ്രന്റ ഭാര്യ സൗമ്യയാണ് കേസിലെ ഏക ദൃക്‌സാക്ഷി.

തടവിന് പുറമേ പിഴയായി 110000 രൂപ ഒടുക്കണം. തലശ്ശേരി ജില്ലാ അഡീഷണല്‍ സെഷന്‍സ് കോടതിയാണ് ശിക്ഷ വിധിച്ചത്. തലശ്ശേരി മൂന്നാം അഡീഷണല്‍ ജില്ലാ സെഷന്‍സ് ജഡ്ജ് പി.എന്‍.വിനോദാണ് വിധി പ്രസ്ഥാവിച്ചത്. വീട്ടിനകത്ത് മാരകായുധങ്ങളുമായി ഇരച്ചെത്തിയ പ്രതികള്‍ സുരേന്ദ്രനെവെട്ടി കൊലപ്പെടുത്തുകയായിരുന്നു. ബിജെപി പ്രവര്‍ത്തകനായിരുന്ന സുരേന്ദ്രന്‍ അസുഖ ബാധിതനായി വിശ്രമ ജീവിതം നയിച്ചു വരുകയായിരുന്നു. വി.എസ് അച്യുതാനന്ദന്‍ സര്‍ക്കാരിന്റെ കാലത്ത് കണ്ണൂരില്‍ ആര്‍.എസ്.എസ് ബിജെപി പ്രവര്‍ത്തകരെ ഇല്ലാതാക്കുക എന്ന ലക്ഷ്യത്തോടെ സിപിഎം നടത്തിയ കൂട്ടക്കൊലപാതകങ്ങളുടെ ഭാഗമായാണ് സുരേന്ദ്രനെയും വെട്ടിക്കൊലപ്പെടുത്തിയതെന്ന് ബി.ജെ.പി ആരോപിക്കുന്നു. 

കണ്ണൂരില്‍ സി.പി.എമ്മും ബി.ജെ.പിയും ആര്‍എസ്എസും തമ്മില്‍ അക്രമം പതിവാണ്. 2018 ജനുവരിയില്‍ എ.ബി.വി.പി പ്രവര്‍ത്തകനായ കണ്ണവം സ്വദേശി ശ്യാം പ്രസാദിനെ (24)വെട്ടികൊലപ്പെടുത്തിയിരുന്നു. കാക്കയംങ്ങാട് ഗവ. ഐടിഐ വിദ്യാര്‍ത്ഥിയായിരുന്നു. ബൈക്കില്‍ കോളേജില്‍ നിന്ന് മടങ്ങവേ കൊമ്മേരി വച്ച് കാറിലെത്തിയ മുഖമൂടിസംഘം ശ്യാംജിത്തിനെ ഇടിച്ചുവീഴ്ത്ത്തുകയായിരുന്നു. വെട്ടു കൊണ്ട് ഓടിയ ശ്യാംപ്രസാദ് സമീപത്തെ വീട്ടിലേക്ക് ഓടിക്കയറി. എന്നാല്‍ വരാന്തയില്‍ വെട്ടി വീഴ്ത്തുകയായിരുന്നു. നാട്ടുകാര്‍ ഓടിയെത്തിയെങ്കിലും അക്രമിസംഘം ഇവരെ ആയുധം കാണിച്ചു വിരട്ടിയോടിച്ചു. പിന്നീട് കാറില്‍ത്തന്നെ അക്രമികള്‍ രക്ഷപ്പെടുകയായിരുന്നു. കൂത്തുപറമ്പ് സഹകരണ ആശുപത്രിയിലേക്കു കൊണ്ടുപോകും വഴി ശ്യാംപ്രസാദ് മരിച്ചു. കണ്ണവം പതിനേഴാം മൈല്‍ വിദ്യാര്‍ത്ഥി ശാഖാ മുഖ്യ ശിക്ഷകായിരുന്നു ശ്യാംപ്രസാദ്.

മുഖ്യമന്ത്രി പിണറായി അധാകാരത്തില്‍ വന്ന് ഏതാനും മാസങ്ങള്‍ക്ക് ശേഷം പിണറായിയില്‍ ബിജെപി പ്രവര്‍ത്തകനെ വെട്ടിക്കൊലപ്പെടുത്തിയിരുന്നു. ബിജെപി പ്രവര്‍ത്തകനായ പിണറായി സ്വദേശി രമിത്ത് ആണ് കൊല്ലപ്പെട്ടത്. പിണറായി ടൗണില്‍ പെട്രോള്‍ പമ്പിനു സമീപത്തു വെച്ചാണ് ഒരു സംഘം ആളുകള്‍ രമിത്തിനെ വെട്ടിക്കൊലപ്പെടുത്തിയത്. ഇന്നലെ സിപിഐഎം പ്രവര്‍ത്തകന്‍ എം മോഹന്‍ കൊല്ലപ്പെട്ടതിനു മണിക്കൂറുകള്‍ക്കുള്ളിലാണ് ബിജെപി പ്രവര്‍ത്തകന്‍ പട്ടാപ്പകല്‍ വെട്ടേറ്റു മരിച്ചത്. സിപിഎം ബ്രാഞ്ച് സെക്രട്ടറി കൂടിയായ എം മോഹന്‍ കൊല്ലപ്പെട്ടതിനെ തുടര്‍ന്ന് കൂത്തുപറമ്പ് മേഖലയില്‍ വ്യാപക സംഘര്‍ഷം ഉണ്ടായിരുന്നു. പ്രദേശത്ത് നിരോധനാഞ്ജയും പ്രഖ്യാപിച്ചിരുന്നു. അതിനിടെയായിരുന്നു കൊലപാതകം.