ഒരിടവേളയ്ക്ക് ശേഷം ശബരിമല യുവതീ പ്രവേശനം വീണ്ടും സജീവ ചര്‍ച്ചയാകുകയാണ്. ശബരിമലയ്ക്ക് വേണ്ടി വാദിച്ച് തോറ്റ കേസിലെ ഫീസിനെ ചൊല്ലിയാണ് തര്‍ക്കം വന്നത്. ശബരിമല സ്ത്രീ പ്രവേശന കേസില്‍ ദേവസ്വം ബോര്‍ഡിന് വേണ്ടി സുപ്രീം കോടതിയില്‍ വാദിച്ചതിന് 62 ലക്ഷം രൂപ ഫീസ് ആവശ്യപ്പെട്ട് മുതിര്‍ന്ന കോണ്‍ഗ്രസ് നേതാവും അഭിഭാഷകനുമായ മനു അഭിഷേക് സിങ്‌വിയാണ് രംഗത്തെത്തിയിരിക്കുന്നത്.

അതേസമയം ദേവസ്വം ബോര്‍ഡിന്റെ അനുമതിയില്ലാതെയാണ് സിങ്‌വിയെ കേസ് ഏല്‍പ്പിച്ചതെന്ന് ദേവസ്വം ബോര്‍ഡ് പ്രസിഡന്റ് പത്മകുമാര്‍ പറഞ്ഞു. എന്നാല്‍ കേസ് വാദിച്ച സ്ഥിതിക്ക് ഭീമമായ ഫീസില്‍ ഇളവ് വരുത്തണമെന്ന് അദ്ദേഹത്തോട് ആവശ്യപ്പെടും. ശബരിമലയിലെ വരുമാനം കുറഞ്ഞതടക്കം ചൂണ്ടിക്കാട്ടി സിംഗ്‌വിയോട് ഇളവ് തേടും. 

ശബരിമല യുവതീ പ്രവേശനക്കേസ് മോഹന്‍ പരാശരനെയോ, ഗോപാല്‍ സുബ്രഹ്മണ്യത്തെയോ ഏല്‍പ്പിക്കാനായിരുന്നു ബോര്‍ഡിന്റെ തീരുമാനം. എന്നാല്‍ യു.ഡി.എഫ് ഭരണകാലത്ത് നിയമിച്ച അഭിഭാഷക ബോര്‍ഡിന്റെ അനുമതിയില്ലാതെ കേസ് സിങ്‌വിയെ ഏല്‍പ്പിക്കുകയായിരുന്നു.

അതേസമയം ഭക്തരുടെ കാണിക്കയെടുത്ത് ഇത്രയും തുക തോറ്റ വക്കീലിന് നല്‍കുന്നതിനെതിരെ ശക്തമായ പ്രതിഷേധമാണ് ശബരിമല കര്‍മ്മസമിതി പ്രവര്‍ത്തകര്‍ ഉയര്‍ത്തുന്നത്. ദേവസ്വം ബോര്‍ഡ് ഭക്തര്‍ക്കെതിരായി എടുക്കുന്ന തീരുമാനത്തില്‍ പ്രതിഷേധിച്ച് കാണിക്കയിടരുതെന്ന നിര്‍ദേശവും അവര്‍ നല്‍കിയിരുന്നു. അതിന് പിന്നാലെ ശബരിമലയില്‍ വലിയ വരുമാന കുറവുണ്ടായി. 

കാണിക്ക വരുമാനം കുറഞ്ഞതു കാരണം സാമ്പത്തിക പ്രതിസന്ധിയിലായ തിരുവിതാംകൂര്‍ ദേവസ്വംബോര്‍ഡിന് ആശ്വാസമായി സര്‍ക്കാര്‍ സഹായമായി 30 കോടി രൂപയാണ് അടുത്തിടെ അനുവദിച്ചത്. ബജറ്റില്‍ പ്രഖ്യാപിച്ച 100 കോടിയുടെ ആദ്യ ഗഡുവാണിത്. പണം സ്വീകരിക്കുന്നതിന് ബോര്‍ഡിന്റെ ആവശ്യങ്ങള്‍ സൂചിപ്പിച്ചുള്ള ബോര്‍ഡ് ധനകാര്യ ഓഫീസറുടെ കത്ത് ധനകാര്യവകുപ്പിന് കൈമാറി. ബജറ്റ് വിഹിതം സ്വീകരിക്കുന്നതിനുള്ള നടപടിക്രമങ്ങള്‍ അറിയാതെവന്നതിനാല്‍ ബോര്‍ഡ് കത്ത് നല്‍കാതെ പണം കാത്തിരിക്കുകയായിരുന്നു. ഈ അപാകം ചൂണ്ടിക്കാട്ടിയതിനെ തുടര്‍ന്ന് ജൂലായ് ആദ്യമാണ് കത്ത് കൈമാറിയത്.

ശമ്പളം, പെന്‍ഷന്‍ എന്നിവയ്ക്കുപോലും പണം ഇല്ലാതെ വരുന്ന സാഹചര്യത്തിലേക്ക് ബോര്‍ഡ് നീങ്ങുകയായിരുന്നു. 25 കോടി രൂപയാണ് ഒരു മാസം പെന്‍ഷന്‍, ശമ്പളം എന്നിവയ്ക്ക് വേണ്ടത്. 1200 കോടി രൂപ ബോര്‍ഡിന്റെ സ്ഥിരം സാമ്പത്തിക ആസ്തിയായി ഉണ്ട്. ഇതിന്റെ പലിശയാണ് കാര്യങ്ങള്‍ നടത്താനായി ഉപയോഗിക്കുന്നത്. ഇതില്‍ 800 കോടി രൂപയും പെന്‍ഷന്‍ നല്‍കാനുള്ള കരുതല്‍ ധനമാണ്. യുവതീപ്രവേശനത്തെ ദേവസ്വം ബോര്‍ഡ് അനുകൂലിച്ചതിനെ തുടര്‍ന്ന് ഹൈന്ദവ സംഘടനകള്‍ കാണിക്ക ബഹിഷ്‌കരണം ആഹ്വാനം ചെയ്തിരുന്നു. ഇതോടെ ശബരിമല വരുമാനം ഇടിഞ്ഞു. മുന്‍ സീസണെ അപേക്ഷിച്ച് 98 കോടി രൂപയുടെ കുറവാണുണ്ടായത്. മറ്റ് ഗ്രൂപ്പുകളുടെ പരിധിയിലും വലിയ വരുമാനനഷ്ടം ഉണ്ടായി. പോയ വര്‍ഷത്തെ അപേക്ഷിച്ച് മൊത്തം 3.77 കോടിയാണ് കുറവ് വന്നത്.

ഇങ്ങനെ വല്ലാത്തൊരു പ്രതിസന്ധിയിലായ ഘട്ടത്തിലാണ് വക്കീല്‍ ഫീസ് ചോദിച്ച് കോണ്‍ഗ്രസ് നേതാവ് വരുന്നത്. കോണ്‍ഗ്രസ് സര്‍ക്കാര്‍ വച്ച വക്കീലായതിനാല്‍ കോണ്‍ഗ്രസുകാരും പ്രതിരോധത്തിലാകുകയാണ്.