വനിതാ ടി20 ലോകകപ്പിലെ മൂന്നാം പോരാട്ടത്തിൽ ഇന്ത്യൻ വനിതകൾക്ക് തോൽവി. പാകിസ്ഥാനേയും നെതർലൻഡ്‌സിനേയും വീഴ്ത്തി മൂന്നാം പോരിനെത്തിയ ഹർമൻപ്രീത് കൗറിനേയും സംഘത്തേയും ദക്ഷിണാഫ്രിക്ക വനിതകൾ 6 വിക്കറ്റിനു വീഴ്ത്തുകയും ചെയ്തു.

ആദ്യം ബാറ്റ് ചെയ്ത ഇന്ത്യ നിശ്ചിത ഓവറിൽ 7 വിക്കറ്റ് നഷ്ടത്തിൽ 158 റൺസെടുത്തു. ദക്ഷിണാഫ്രിക്ക 19.1 ഓവറിൽ 4 വിക്കറ്റ് മാത്രം നഷ്ടത്തിൽ 161 അടിച്ചെടുത്താണ് ജയം സ്വന്തമാക്കിയത്. പരാജയപ്പെട്ടെങ്കിലും നിലവിൽ ഗ്രൂപ്പ് എയിൽ ഇന്ത്യ രണ്ടാം സ്ഥാനത്ത് തുടരുന്നു. ഇന്ത്യക്കും ദക്ഷിണാഫ്രിക്കയ്ക്കും 4 പോയിന്റുകൾ.

45 പന്തിൽ 4 സിക്‌സും 7 ഫോറും സഹിതം 81 റൺസെടുത്ത മരിസാന കാപിന്റെ മികച്ച ബാറ്റിങാണ് പ്രോട്ടീസ് വനിതകൾക്ക് ജയം സമ്മാനിച്ചത്. താരം പുറത്താകാതെ നിന്നു.

കളി അവസാനിക്കുമ്പോൾ 4 പന്തിൽ 10 റൺസുമായി ക്ലോ ട്രിയോണും പുറത്താകാതെ നിന്നു. ക്യാപ്റ്റൻ ലോറ വോൾവാർട് (20), ഓപ്പണർ തസ്മിൻ ബ്രിറ്റ്‌സ് (40) എന്നിവരും തിളങ്ങി. നേരത്തെ ആദ്യം ബാറ്റ് ചെയ്ത ഇന്ത്യക്കായി ഷെഫാലി വർമ, ദീപ്തി ശർമ, ഹർമൻപ്രീത് കൗർ എന്നിവർക്കു മാത്രമാണ് അൽപ്പം പിടിച്ചു നിൽക്കാനായത്. ഷെഫാലി 31 റൺസെടുത്തു. ദീപ്തി 21 പന്തിൽ 29 റൺസെടുത്തു. ഹർമൻപ്രീത് 24 റൺസും സ്വന്തമാക്കുകയും ചെയ്തു.