സഹിക്കാന് പറ്റുന്നില്ല... വി.എസ്. അച്യുതാനന്ദന്റെ സഹായികള്ക്കു മുഖ്യമന്ത്രി ഇടപെട്ട് യാത്രാച്ചെലവ് നിഷേധിച്ചതിന് പിന്നാലെ ഋഷിരാജ് സിങ്ങിന്റെ ഔദ്യോഗിക യാത്രയ്ക്ക് അനുമതിയില്ല; മുന്കൂര് അനുമതി വാങ്ങാതെ കേന്ദ്ര ആഭ്യന്തര മന്ത്രാലയത്തിന്റെ യോഗത്തിന് പോയി
31 JULY 2019 10:13 AM IST
മലയാളി വാര്ത്ത
മുഖ്യമന്ത്രിയുടെ അനുമതിയോടെയാണു നടപടി. സംസ്ഥാന ഭരണപരിഷ്കാര കമ്മിഷന് ചെയര്മാന് വി.എസ്. അച്യുതാനന്ദന്റെ സഹായികള്ക്കു മുഖ്യമന്ത്രി ഇടപെട്ട് യാത്രാച്ചെലവ് നിഷേധിച്ചതും വിവാദമായിരുന്നു. സര്ക്കാരിന്റെ മുന്കൂര് അനുമതിയില്ലാതെ ഡി.ജി.പി. നടത്തിയ ഡല്ഹി യാത്ര ഔദ്യോഗിക ചട്ടലംഘനമാണെന്നാണ് ആഭ്യന്തരവകുപ്പിന്റെ നിലപാട്. കഴിഞ്ഞ ജൂണ് 14നു കേന്ദ്ര ആഭ്യന്തരമന്ത്രാലയം ജയില്വകുപ്പ് ഉദ്യോഗസ്ഥര്ക്കായി സംഘടിപ്പിച്ച യോഗത്തില് പങ്കെടുക്കാനാണു ഋഷിരാജ് ഡല്ഹിക്കു പോയത്.
യാത്രയ്ക്ക് അദ്ദേഹം അനുമതി തേടിയിരുന്നെങ്കിലും തീരുമാനമാകുന്നതിനു മുമ്പ് ഡല്ഹിക്കു പറന്നതാണു സര്ക്കാരിനെ ചൊടിപ്പിച്ചത്. അനുമതി ലഭിക്കാത്ത സാഹചര്യത്തില് യാത്ര റദ്ദാക്കാന് ഋഷിരാജും തയാറായില്ല. യോഗത്തില് പങ്കെടുത്ത് തിരികെ തിരുവനന്തപുരത്തെത്തിയപ്പോഴാണു സര്ക്കാര് അനുമതി വെട്ടിയവിവരം അറിഞ്ഞത്.
പങ്കെടുത്തത് ഔദ്യോഗിക പരിപാടിയിലാണെങ്കിലും യാത്രാച്ചെലവ് സര്ക്കാരിനു നിഷേധിക്കാം. അനധികൃതമായി ജോലിക്കു ഹാജരാകാതിരുന്നതിന്റെ പേരില് ഡി.ജി.പിക്കെതിരേ നടപടിയെടുക്കാനും കഴിയും. ഋഷിരാജിന്റെ യാത്ര ചട്ടപ്രകാരമല്ലാത്തതിനാല് അനുമതി നല്കാനാവില്ലെന്ന് ആഭ്യന്തരവകുപ്പിന്റെ ഉത്തരവില് ചൂണ്ടിക്കാട്ടുന്നു.
കണ്ണൂര് ജയിലില് ഉള്പ്പെടെ മിന്നല് പരിശോധന നടത്തുകയും ഉദ്യോഗസ്ഥരെ തലങ്ങും വിലങ്ങും സ്ഥലംമാറ്റുകയും ചെയ്തതോടെയാണു ഋഷിരാജ് സര്ക്കാരിന് അനഭിമതനായത്. രാജ്കുമാര് കസ്റ്റഡി മരണക്കേസിലും ജയില് ഉദ്യോഗസ്ഥര്ക്കെതിരേ അദ്ദേഹം കര്ശനനടപടി സ്വീകരിച്ചു. ഈ കേസില് ആരോപണവിധേയനായ ഇടുക്കി മുന് എസ്.പി: കെ.ബി. വേണുഗോപാല് തന്നെ സല്യൂട്ട് ചെയ്തില്ലെന്നാരോപിച്ച് മാസങ്ങള്ക്കുമുമ്പ് ഋഷിരാജ് പരാതിപ്പെട്ടിരുന്നു.
തടവുകാരില് നിന്ന് ലഹരിമരുന്നും ആയുധങ്ങളും മൊബൈല്ഫോണുകളും പവര്ബാങ്കുകളും വന്തോതില് പിടിച്ചെടുത്തതിനെത്തുടര്ന്ന് സെന്ട്രല് ജയിലുകളില് ഋഷിരാജ് സിങ്ങ് ശുദ്ധികലശം നടത്തിയിരുന്നു. മൂന്നു വര്ഷത്തിലേറെയായി ഒരേ ജയിലില് ജോലി ചെയ്തിരുന്ന 150 ഉദ്യോഗസ്ഥരെ സ്ഥലംമാറ്റി. പലരും പത്തും പതിനഞ്ചും വര്ഷമായി ഒരേ ജയിലില് തന്നെയുണ്ടായിരുന്നവരാണ്. കണ്ണൂരില് നിന്ന് 50 പേരെയാണ് മാറ്റിയത്. ജയില് ജീവനക്കാരുടെ സംഘടനയുടെ സംസ്ഥാന നേതാക്കളെയും സ്ഥലംമാറ്റി.
അതേസമയം ജയില് ശുദ്ധീകരണത്തിന് ഋഷിരാജ് സിംഗിന് മുഖ്യമന്ത്രിയുടെ പൂര്ണ പിന്തുണയുണ്ടെന്നാണ് പറയുന്നത്. തെറ്റു തിരുത്തല് കേന്ദ്രങ്ങളാകേണ്ട ജയിലുകളില് നിയമവിരുദ്ധ പ്രവര്ത്തനങ്ങള് നടത്തുന്നവര്ക്കെതിരെ കര്ശന നടപടിയെടുക്കുമെന്നും മുഖ്യമന്ത്രി മുന്നറിയിപ്പു നല്കിയിരുന്നു. ജില്ലാ ജയിലുകളിലെയും സബ്ജയിലുകളിലെയും ഉദ്യോഗസ്ഥരെയും സ്ഥലം മാറ്റുന്നത് അടക്കമുള്ള നടപടികളും ആലോചിക്കുന്നുണ്ട്. എന്നാല് ഇതിന് പിന്നാലെ ഋഷിരാജ് സിങ്ങിനെതിരെ നടപടി വന്നതാണ് എല്ലാവരേയും അമ്പരപ്പിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെ ഫേസ്ബുക്ക് പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
