സാക്ഷാല് ജഡായു, ജഡായുപ്പാറയില് എത്തിയതായി പ്രചരിക്കുന്നതിന്റെ സത്യം ഇങ്ങനെ...
ട്വിറ്ററിലും ഫെയ്സ്ബുക്കിലും വ്യാപകമായി പ്രചരിക്കുന്ന ഒരു വിഡിയോയില് പറയുന്നത് കൊല്ലം ചടയമംഗലത്തെ ജഡായുപ്പാറയില് രാമായണത്തില് പറയുന്ന ജഡായു എത്തിയെന്നാണ്. ഭീമന് പക്ഷി ചിറക് വിടര്ത്തി പറക്കാനൊരുങ്ങുന്നതും അതിന് ചുറ്റും ആളുകള് കൂടി നില്ക്കുന്നതുമാണ് വിഡിയോയിലുള്ളത്. രാമായണത്തിലെ ജടായു എന്ന പക്ഷിയുടെ ശില്പ്പം വന്നതോടെ ജഡായുപ്പാറ ലോകത്തിന്റെ തന്നെ ശ്രദ്ധ നേടിയിരുന്നു. ഇതിനൊപ്പം ചേര്ത്ത് നിര്ത്തിയാണ് ഈ വിഡിയോ പ്രചരിക്കുന്നത്.
എന്നാല് സത്യം അതൊന്നുമല്ല. ഈ വിഡിയോയിലെ സ്ഥലം കേരളമല്ല. 2014 മുതല് യൂട്യൂബില് ലഭ്യമായ ഈ വിഡിയോ അര്ജന്റീനയില് നിന്നുള്ളതാണ്. കഴുകന് വിഭാഗത്തില്പ്പെടുന്ന കോണ്ടൂര് എന്ന ഭീമന് പക്ഷിയുടെ ഈ വിഡിയോ വൈറലായിരുന്നു. ഈ വിഡിയോയുടെ ഒരു ഭാഗമാണ് ജഡായുപ്പാറയിലെത്തിയ ജഡായു പക്ഷി എന്ന തരത്തില് പ്രചരിപ്പിക്കുന്നത്.
ആയിരം അടി ഉയരമുള്ള പാറയുടെ മുകളില് നിര്മിക്കുന്ന ജടായുവിന്റെ ശില്പ്പം ലോകത്തെ ഏറ്റവും വലിയ പക്ഷി ശില്പ്പമാണ്. സിനിമാ സംവിധായകനും ശില്പ്പിയുമായ രാജീവ് അഞ്ചലാണ് ഈ കൗതുകത്തിന്റെ സ്രഷ്ടാവ്. പ്രതിമയുടെ ഉള്ഭാഗം ബഹുനിലകളുള്ള കെട്ടിടത്തിന്റെ മാതൃകയിലാണ് നിര്മിച്ചിരിക്കുന്നത്. അതിന്റെ ചുമരുകള് വലിയ സ്ക്രീനുകളാണ്. സീതാപഹരണ കഥ 6 ഡി ഇമേജാണ് പടുകൂറ്റന് സ്ക്രീനില് പ്രദര്ശിപ്പിക്കുക. മൂന്നാം നിലയില് ജഡായുവിന്റെ കണ്ണിന്റെ ദ്വാരത്തിലെത്തുമ്പോള് 360 ഡിഗ്രി ആംഗിളില് മലനാടിന്റെ ഭംഗി കണ്ടാസ്വദിക്കാം.
ഇടതു ചിറകറ്റ് വലതു ചിറകു വിടര്ത്തി കൊക്കും കാല് നഖങ്ങളുമുയര്ത്തി കിടക്കുന്ന രൂപത്തിലാണ് ജടായു ശില്പ്പം. പുറത്തു നിന്നു നോക്കിയാല് ശില്പ്പമെന്നും അകത്തു കയറിയാല് വലിയൊരു സിനിമാ തിയെറ്ററെന്നും തോന്നുംവിധമാണ് സൃഷ്ടി. ചടയമംഗലത്തുകൂടി വാഹനത്തില് കടന്നു പോകുമ്പോള് പാറയുടെ മുകളിലെ ശില്പ്പത്തിന്റെ ഒരു വശം കാണാം. മലയോളം വലുപ്പമുള്ള കരിമ്പാറകളുടെ കാടാണ് ചടയമംഗലം. അതിനിടയില് ഏറ്റവും ഉയരമേറിയ പാറയ്ക്കു മുകളിലുള്ള കുഴി ജടായുവിന്റെ കൊക്കുരഞ്ഞുണ്ടായതാണെന്ന് ഐതിഹ്യം പറയുന്നു. പാറയുടെ മുകളില് പതിഞ്ഞിട്ടുള്ള കാല്പ്പാദത്തിന്റെ അടയാളം ശ്രീരാമ പാദ സ്പര്ശത്താല് ഉണ്ടായതാണെന്നും വിശ്വസിക്കപ്പെടുന്നു.
https://www.facebook.com/Malayalivartha
