അമ്പൂരിയില്‍ രാഖിയെ കൊന്ന കേസിലെ പ്രധാന പ്രതികളായ അഖിലും രാഹുലും ദൃശ്യം സിനിമാ മോഡലില്‍ പൊലീസിനെ ആശയക്കുഴപ്പത്തിലാക്കാന്‍ നോക്കുന്നു. അതിനാല്‍ ഇരുവരെയും ഒന്നിച്ചിരുത്തി ചോദ്യം ചെയ്യാന്‍ അന്വേഷണ സംഘം തീരുമാനിച്ചു. വീട്ടില്‍ നിന്ന് വിഷം കണ്ടെത്തിയതോടെ തങ്ങള്‍ ആത്മഹത്യ ചെയ്യാന്‍ തീരുമാനിച്ചിരുന്നതായി ഇരുവരും പറഞ്ഞത് തന്നെ വലിയ തട്ടിപ്പാണെന്നാണ് അറിയുന്നത്. ഇരുവരും പരസ്പ്പരവിരുദ്ധമായി മൊഴി നല്‍കിയെങ്കിലും മറ്റൊരു പ്രതിയായ ആദര്‍ശ് നല്‍കിയ മൊഴി രണ്ട് പേരെയും കുടുക്കുന്നതാണ്. രാഖി ഉപയോഗിച്ച വസ്ത്രം ഇതുവരെ കണ്ടെടുക്കാനായില്ല എന്നത് അന്വേഷണ സംഘത്തെ കുഴയ്്ക്കുന്നു. കഴിഞ്ഞ ദിവസം അഖിലിനെ സംഭവ സ്ഥലത്തെത്തിച്ച് തെളിവെടുക്കാന്‍ നോക്കിയെങ്കിലും നാട്ടുകാരുടെ പ്രതിഷേധം കാരണം പൂര്‍ത്തിയാക്കാനായില്ല. അതിനാല്‍ വിശദമായ തെളിവെടുപ്പിന് താമസിക്കാതെ കൊണ്ടുപോകുമെന്ന് നെയ്യാറ്റിന്‍കര ഡിവൈ.എസ്.പി പറഞ്ഞു. 

സംഭലത്തില്‍ അഖിന്റെയും രാഹുലിന്റെയും പിതാവ് മണിയന് പങ്കുണ്ടെന്ന് നാട്ടുകാര്‍ ആരോപിക്കുന്നു. ഇത് സംബന്ധിച്ച് മൊഴി നല്‍കാന്‍ പലരും തയ്യാറാണ്. എന്നാല്‍ പ്രതികളെ ഒന്നിച്ചിരുത്തി ചോദ്യം ചെയ്ത ശേഷമേ കൂടുതല്‍ പ്രതികളെ ചേര്‍ക്കണോ എന്ന കാര്യത്തില്‍ അന്തിമതീരുമാനം ഉണ്ടാകൂ. നാട്ടുകാരില്‍ ചിലരെയും പൊലീസ് ചോദ്യം ചെയ്യും. ഇത് സംബന്ധിച്ച് നോട്ടീസ് താമസിക്കാതെ നല്‍കും. അന്വേഷണവുമായി സഹകരിക്കാന്‍ നാട്ടുകാര്‍ തയ്യാറാണ്. കൊല്ലാന്‍ ഉപയോഗിച്ച കയര്‍, രാഖിയുടെ വസ്ത്രങ്ങള്‍, ചെരിപ്പ്, ആഭരണങ്ങള്‍, മൊബൈല്‍ ഫോണ്‍ എന്നിവ ഇതുവരെയും കണ്ടെത്തിയിട്ടില്ല. സിം മാത്രമാണ് കിട്ടിയത്. രാഖിയെ കൊണ്ടുപോയ കാറില്‍ നിന്ന് മുടി കണ്ടെത്തിയിട്ടുണ്ട്. ഇത് ഫോറന്‍സിക് പരിശോധനയ്ക്ക് അയച്ചിട്ടുണ്ട്. 

അന്വേഷണം വഴിതിരിച്ചുവിടാന്‍ പ്രതികളുടെ പിതാവ് പല അസത്യങ്ങളും പൊലീസിന് നല്‍കുന്നുണ്ടെന്ന് നാട്ടുകാര്‍ ആരോപിക്കുന്നു. അന്യ മതത്തില്‍പ്പെട്ട പെണ്‍കുട്ടിയെ വിവാഹം കഴിക്കുന്നതില്‍ പിതാവ് മണിയനും മാതാവിനും സഹോദരന്‍ രാഹുലിനും മറ്റു ബന്ധുക്കള്‍ക്കും എതിര്‍പ്പുണ്ടായിരുന്നു. അതിനാലാണ് രാഖിയെ ഒഴിവാക്കാന്‍ ശ്രമിച്ചത്. എന്നാല്‍ രാഖി തയ്യാറായില്ല. അതിനാലാണ് കൊല്ലേണ്ടിവന്നതെന്ന് പ്രതികള്‍ മൊഴി നല്‍കിയിട്ടുണ്ട്. കൊലപാതകക്കേസില്‍ പിടിക്കപ്പെടുമെന്നു തോന്നിയതിനാല്‍ ആത്മഹത്യചെയ്യാന്‍ വാങ്ങിവച്ചിരുന്ന വിഷം പോലീസ് കണ്ടെടുത്തിയെന്ന വാര്‍ത്തകള്‍ മണിയന്‍ മനപ്പൂര്‍വം പ്രചരിപ്പിക്കുകയാണെന്നും അത് സഹതാപ തരംഗം സൃഷ്ടിക്കാനുള്ള ശ്രമത്തിന്റെ ഭാഗമാണെന്നും നാട്ടുകാര്‍ ആരോപിക്കുന്നു. 

കൊലയാളികള്‍ക്കു പുറത്തുനിന്നും സഹായങ്ങളുണ്ടായിരുന്നെന്നും ചില ഉന്നതര്‍ക്ക് പ്രതികളുമായി ബന്ധമുണ്ടെന്നും നാട്ടുകാരും രാഖിയുടെ ബന്ധുക്കളും പറയുന്നു. അന്വേഷണം ശരിയായ വഴിക്ക് നടക്കണമെന്ന് ആവശ്യപ്പെട്ട് ഉന്നത പോലീസധികാരികള്‍ക്ക് പരാതിനല്‍കാന്‍ രാഖിയുടെ വീട്ടുകാര്‍ തീരുമാനിച്ചിട്ടുണ്ട്. 
പ്രതികളെ ഇന്ന് കസ്റ്റഡിയില്‍ വാങ്ങും. ഇതിനായുള്ള കോടതിയില്‍ അപേക്ഷ നല്‍കിയിട്ടുണ്ട്. മൃതദ്ദേഹം മറവു ചെയ്തശേഷം മറ്റെവിടേക്കെങ്കിലും മാറ്റാനും പദ്ധതിയിട്ടിരുന്നതായി സൂചനയുണ്ട്. അതിന്റെ ഭാഗമായാണ് മൃതദേഹം കുഴിച്ചുമൂടിയപ്പോള്‍ ഉപ്പിട്ടതെന്ന് കരുതുന്നു.