കേരളത്തിലെ പി.എസ്.സി ,പിണറായി സര്വീസ് കമ്മീഷനായി മാറിയിരിക്കുകയാണ് എന്ന് യുവമോര്ച്ച. സി.പി.എമ്മിനും, അവര് നേതൃത്വം നല്കുന്ന സര്ക്കാരിനും സ്തുതി പാടുന്നവര്ക്ക് സര്ക്കാര് ജോലി തീറെഴുന്നതാണ് സാക്ഷര കേരളം കണ്ടത്
കേരളത്തിലെ പി.എസ്.സി ,പിണറായി സര്വീസ് കമ്മീഷനായി മാറിയിരിക്കുകയാണ് എന്ന് യുവമോര്ച്ച. സി.പി.എമ്മിനും, അവര് നേതൃത്വം നല്കുന്ന സര്ക്കാരിനും സ്തുതി പാടുന്നവര്ക്ക് സര്ക്കാര് ജോലി തീറെഴുന്നതാണ് സാക്ഷര കേരളം കണ്ടതെന്ന് സംസ്ഥാന വൈസ് പ്രസിഡന്റ് ശ്രീരാജ് ശ്രീവിലാസം ആരോപിച്ചു. പോലീസ് റാങ്ക് ലിസ്റ്റില് ആദ്യസ്ഥാനങ്ങള് നേടിയെടുത്ത ശിവരഞ്ജിത്തിനും, പ്രണവിനും, നസീമിനും പരീക്ഷയില് പുറത്തു നിന്ന് സഹായം ലഭിച്ചുവെന്ന ആഭ്യന്തര വിജിലന്സ് കണ്ടെത്തല് ഞെട്ടിപ്പിക്കുന്നതാണ്. തൊഴിലന്വേഷകരായ ലക്ഷക്കണക്കിന് യുവജനങ്ങളെ വിഡ്ഡികളാക്കിയ ഈ സംഭവത്തില് ഡി.വൈ.എഫ്.ഐ നിലപാട് വ്യക്തമാക്കണം. ഇപ്പോള് നടത്തുന്ന യാത്ര പിണറായി വിജയന്റെ വീട്ടിലേക്ക് തിരിച്ചുവിടുകയാണ് അവര് ചെയ്യേണ്ടതെന്നും അദ്ദേഹം ആവശ്യപ്പെട്ടു.
ഉദ്യോഗസ്ഥ രാഷ്ട്രീയ കൂട്ടുകെട്ടിലൂടെ പി.എസ്.സി യിലൂടെ നടത്തുന്ന അഴിമതി CBI യെക്കൊണ്ട് അന്വേഷിപ്പിക്കാന് സര്ക്കാര് തയ്യാറാകണം.
കഴിഞ്ഞ 10 വര്ഷക്കാലത്തെ നിയമനങ്ങള് സംബന്ധിച്ച് ഇതോടൊപ്പം അന്വേഷിക്കണമെന്നും യുവമോര്ച്ച ആവശ്യപ്പെട്ടു. യൂണിവേഴ്സിറ്റി കോളജില് സഹപ്രവര്ത്തകനെ കുത്തികൊലപ്പെടുത്താന് ശ്രമിച്ച എസ്.എഫ്.ഐ നേതാക്കളായ ശിവരഞ്ജിത്ത്, നിസാം പ്രണവ് എന്നിവരെ പൊലീസ് റാങ്ക് പട്ടികയില് നിന്ന് പി.എസ്.സി ഒഴിവാക്കിയെന്ന് ചെയര്മാന് അറിയിച്ചതോടെയാണ് യുവമോര്ച്ച പ്രതിഷേധത്തിന് ഒരുങ്ങുന്നത്. ഇവര് മൂന്ന് പേരും പരീക്ഷ തട്ടിപ്പ് നടത്തിയെന്ന് പിഎസ്സി സ്ഥിരീകരിച്ചതോടെയാണ് നടപടി. പിഎസ്സി വിജിലന്സ് വിഭാഗം നടത്തിയ പരിശോധനയുടെ അടിസ്ഥാനത്തിലാണ് എസ്എഫ്ഐ നേതാക്കളെ റാങ്ക് ലിസ്റ്റില് നിന്നും പുറത്താക്കിയത്.
റാങ്ക് ലിസ്റ്റില് ഇടംനേടിയവര് പരീക്ഷസമയത്ത് മൊബൈല് ഫോണ് ഉപയോഗിച്ചിരുന്നതായി കണ്ടെത്തിയിട്ടുണ്ട്. ഉത്തരങ്ങള് ഫോണില് എസ്എംഎസായി ലഭിച്ചെന്നാണ് നിഗമനം. പരീക്ഷക്കിടെ മൂന്ന് പേരുടെ മൊബൈല് ഫോണുകളിലേക്കും നിരവധി തവണ എസ്എംഎസുകള് വന്നു. ആ നമ്പരുകളും ചെയര്മാന് വെളിപ്പെടുത്തി. ഇതേക്കുറിച്ച് കേസെടുത്ത് വിശദമായി അന്വേഷിക്കാനും പിഎസ്സി സര്ക്കാരിനോട് ശുപാര്ശ ചെയ്യ്തു. പൊലീസ് കോണ്സ്റ്റബിള് റാങ്ക് പട്ടികയില് നിന്നും നീക്കിയത് കൂടാതെ മൂവരേയും ആജീവനാന്ത കാലത്തേക്ക് പിഎസ്സി പരീക്ഷ എഴുതുന്നതില് നിന്നും വിലക്കിയിട്ടുണ്ട്. യു.പി.എസ്.സി പരീക്ഷകളിലും ഇവരെ പ്ങ്കെടുപ്പിക്കരുതെന്ന് ആവശ്യപ്പെട്ട് കത്തും നല്കും. പി.എസ്.സിയുടെ വിശ്വാസ്യത നിലനിര്ത്തുകയാണ് ലക്ഷ്യമെന്നും ചെയര്മാന് പറഞ്ഞു.
കാസര്ഗോഡ് പരീക്ഷകേന്ദ്രം ചോദിച്ചിട്ട് പ്രത്യേക അനുമതി വാങ്ങി മൂന്ന് പേരും തിരുവനന്തപുരത്താണ് പരീക്ഷ എഴുതിയത്. മൂന്ന് പേര്ക്കും ഒരേസമയം മൊബൈല് ഫോണുകളിലേക്ക് എസ്എംഎസായി എത്തിയത് കണ്ടെത്തിയതോടെയാണ് പട്ടികയില് നിന്ന് ഒഴിവാക്കിയത്. ഡിഗ്രി, പി.ജി സെമിസ്റ്റര് പരീക്ഷകളില് ജയിക്കാത്ത പ്രതികള് റാങ്ക് പട്ടികയില് ഇടംനേടിയപ്പോഴേ യുവമോര്ച്ച സംശയം പ്രകടിപ്പിച്ചിരുന്നു. പി.എസ്.സി ആസ്ഥാനത്തേക്ക് മാര്ച്ചും നടത്തിയിരുന്നു. എന്നാല് ഭരണഘടനാ സ്ഥാപനങ്ങളെ ബി.ജെ.പി അട്ടിമറിക്കാന് ശ്രമിക്കുന്നു എന്നാണ് മുഖ്യമന്ത്രി പിണറായി വിജയന് അന്ന് ആരോപിച്ചത്. അതെല്ലാം തെറ്റെന്ന് തെളിയിക്കുന്നതാണ് പി.എസ് .സി ചെയര്മാന്റെ വാര്ത്താസമ്മേളനം.
https://www.facebook.com/Malayalivartha
