ഓടുന്ന തീവണ്ടിയില് ചാടിക്കയറുകയോ ചാടിയിറങ്ങുകയോ ചെയ്യുന്നവര്ക്കെതിരേ കര്ശന നടപടികള്ക്കൊരുങ്ങി റെയില്വേ
തീവണ്ടി ഓടിക്കൊണ്ടിരിക്കെ ചാടിക്കയറുകയോ ചാടിയിറങ്ങുകയോ ചെയ്യുന്നവര്ക്കെതിരേ കര്ശന നടപടികള്ക്കൊരുങ്ങി റെയില്വേ. അനധികൃതമായി പാളം മുറിച്ചുകടക്കുന്നവര്ക്കെതിരേയും കര്ശന ശിക്ഷാനടപടികളുണ്ടാവും. തീവണ്ടിയില് ചാടിക്കയറുന്നതിനിടെ പാളത്തില് വീണും വണ്ടിയിടിച്ചും കഴിഞ്ഞവര്ഷം തിരുവനന്തപുരം ഡിവിഷനുകീഴില് 280 പേരും ഈവര്ഷം ജൂണ്വരെ 167 പേരും മരിച്ച പശ്ചാത്തലത്തിലാണിത്. റെയില്വേ നിയമപ്രകാരം ആറുമാസം തടവും 1000 രൂപ പിഴയും ലഭിക്കാവുന്ന കുറ്റമാണിതെന്ന് റെയില്വേ പ്രൊട്ടക്ഷന് ഫോഴ്സ് എറണാകുളം അസിസ്റ്റന്റ് കമ്മിഷണര് ടി.എസ്. ഗോപകുമാര് പറഞ്ഞു.
അപകടങ്ങളെക്കുറിച്ച് ആര്.പി.എഫിന്റെ നേതൃത്വത്തില് ബോധവത്കരണം നടത്തുന്നുണ്ട്. ജീവന് അമൂല്യമാണെന്ന സന്ദേശവുമായാണ് ബോധവത്കരണം. നിയമം ലംഘിച്ചവരെ വിവിധ സ്റ്റേഷനുകളില് പിടികൂടിയെങ്കിലും ആദ്യതവണ നടപടിയെടുത്തില്ല. കുറ്റം ആവര്ത്തിച്ചാല് കര്ശന നടപടിയെടുക്കാനാണ് തീരുമാനം. ഇതിന്റെ ഭാഗമായി എല്ലാ റെയില്വേ സ്റ്റേഷനുകളിലും നിരീക്ഷണം കര്ശനമാക്കി.
തീവണ്ടിയിടിച്ചുള്ള അപകടങ്ങളിലേറെയും വില്ലന് മൊബൈല് ഫോണുകളാണ്. ഓടുന്ന വണ്ടിയില് കയറാനും ഇറങ്ങാനും ശ്രമിക്കുമ്പോഴും അപകടമുണ്ടാകുന്നുണ്ട്. അപകടം ഒഴിവാക്കാന് പലയിടത്തും പാളത്തിലേക്കുള്ള പ്രവേശനം നിരോധിച്ചിട്ടുണ്ട്. ഇവ മറികടന്ന് പലരും അനധികൃതമായി പാളത്തിലേക്കു പ്രവേശിക്കുന്നതായും റെയില്വേ.
https://www.facebook.com/Malayalivartha
