വിശുദ്ധ ഹജ്ജ് ദിനങ്ങള്‍ വന്നണഞ്ഞതോടെ പ്രാര്‍ഥന നിറഞ്ഞ മനസ്സുമായി ഹാജിമാര്‍ കര്‍മഭൂമിയിലേക്ക് യാത്ര തിരിക്കാനുള്ള ഒരുക്കത്തില്‍. നാളെ രാത്രിയോടെ തീര്‍ഥാടകര്‍ മിനാ താഴ്‌വരയില്‍ സജ്ജമായ കൂടാരങ്ങളിലേക്ക് പുറപ്പെടും. അവിടെ രാപ്പാര്‍ത്താണ് ഹജ്ജിന്റെ പ്രധാന കര്‍മങ്ങള്‍ അനുഷ്ഠിക്കാന്‍ യാത്രകള്‍ നടത്തുക. വെള്ളിയാഴ്ച പകല്‍ മിനായിലായിരിക്കും ഹാജിമാര്‍. പ്രധാന ചടങ്ങായ അറഫ സംഗമം ശനിയാഴ്ചയാണ്. അന്ന് പുലര്‍ച്ച മുതല്‍ അറഫയിലേക്ക് നീങ്ങും. മുഴുവന്‍ ഇന്ത്യന്‍ ഹാജിമാരും മക്കയിലെത്തിക്കഴിഞ്ഞു.

കേരളത്തില്‍നിന്ന് ഹജ്ജ് കമ്മിറ്റി വഴി 13,724 പേരാണുള്ളത്. സ്വകാര്യഗ്രൂപ് മുഖേന 12,000ത്തോളം പേരുമുണ്ട്. ഹജ്ജ് കമ്മിറ്റി ചെയര്‍മാന്‍ സി. മുഹമ്മദ് ഫൈസി മക്കയിലുണ്ട്. മസ്ജിദുല്‍ ഹറാം ജനസാഗരമായിരിക്കുകയാണ്. അവസാനമെത്തുന്ന ഹാജിമാര്‍ക്ക് ഉംറ നിര്‍വഹിക്കാന്‍ സൗകര്യം നല്‍കുകയാണ് അധികൃതര്‍. ഇന്ത്യന്‍ ഹാജിമാര്‍ താമസിക്കുന്ന അസീസിയ മേഖലയില്‍നിന്ന് ഹറമിലേക്കുള്ള ബസ് സര്‍വിസ് നിര്‍ത്തിവെച്ചു.

ഇനി എല്ലാവരും താമസ കേന്ദ്രങ്ങളില്‍തന്നെ കഴിയാനാണ് നിര്‍ദേശം. ഹജ്ജ് കര്‍മവുമായി ബന്ധപ്പെട്ട വിഷയങ്ങളിലും യാത്രാനടപടികള്‍ സംബന്ധിച്ചും അവസാനവട്ട ക്ലാസുകള്‍ നല്‍കുകയാണ് ബന്ധപ്പെട്ടവര്‍. അതിനിടെ, ഹജ്ജ് സര്‍വിസ് കമ്പനികള്‍ ഹാജിമാര്‍ക്കുള്ള ഇലക്‌ട്രോണിക് കൈവളകളും കൂപ്പണുകളും വിതരണം ചെയ്തു തുടങ്ങി. കമ്പനികളുടെ ഉത്തരവാദിത്തത്തിലാണ് ഇനി ഹാജിമാര്‍. കേരളത്തില്‍നിന്നുള്ള 70 ശതമാനം ഹാജിമാര്‍ക്കും ഇത്തവണ പുണ്യനഗരിയിലെ യാത്രക്ക് മശാഇര്‍ മെട്രോ ട്രെയിന്‍ യാത്ര സൗകര്യം ലഭിക്കും.