എച്ച്.ഐ.വി ബാധിതരായ കുട്ടികളെ മുഖ്യമന്ത്രിയായിരുന്ന എ.കെ ആന്റണി അകറ്റി നിര്ത്തിയപ്പോള് അവരെ വാരിപ്പുണര്ന്ന് ചുംബിച്ച ആരോഗ്യമന്ത്രിയായിരുന്നു ഇന്നലെ അന്തരിച്ച ബി.ജെ.പി നേതാവ് സുഷമാ സ്വരാജ്
എച്ച്.ഐ.വി ബാധിതരായ കുട്ടികളെ മുഖ്യമന്ത്രിയായിരുന്ന എ.കെ ആന്റണി അകറ്റി നിര്ത്തിയപ്പോള് അവരെ വാരിപ്പുണര്ന്ന് ചുംബിച്ച ആരോഗ്യമന്ത്രിയായിരുന്നു ഇന്നലെ അന്തരിച്ച ബി.ജെ.പി നേതാവ് സുഷമാ സ്വരാജ്. ഹിന്ദുസ്ഥാന് ലാറ്റക്സില് പി.ആര്.ഒ ആയിരുന്ന ലാലു ജോസഫ് അക്കാര്യം ഓര്മിക്കുകയാണ്. മാധ്യമപ്രവര്ത്തകരായ റോയി മാത്യുവും സനല്കുമാറും വഴിയാണ് കൊല്ലത്തുള്ള എച്ച്.ഐ.വി ബാധിതരായ ബെന്സനും ബെന്സിയും ഹിന്ദുസ്ഥാന് ലാറ്റക്സിലെത്തിയത്.
എച്ച് ഐ വി രോഗബാധയെ തുടര്ന്ന് ബെന്സനെയും ബെന്സിയേയും സ്കൂളില് നിന്ന് പുറത്താക്കിയിരുന്നു. ഇവരുടെ മാതാപിതാക്കള് എയിഡ്സ് വന്നു മരിച്ചുപോയിരുന്നു. അമ്മയില് നിന്നാണ് കുട്ടികള്ക്ക് രോഗം പകര്ന്നത്. അപ്പൂപ്പന്റെയും അമ്മൂമ്മയുടെയും സംരക്ഷണയിലായിരുന്നു കുരുന്നുകള്. രോഗവിവരം നാട്ടിലും സ്കൂളിലും അറിഞ്ഞതോടെയാണ് പ്രശ്നങ്ങള് ആരംഭിച്ചത്.
അതോടെ ബെന്സനേയും ബെന്സിയേയും സ്കൂളില് നിന്ന് പുറത്താക്കി. കുട്ടികള്ക്ക് ചികിത്സയ്ക്ക് പണമില്ലാതെ വലയുകയാണ് അപ്പൂപ്പനും അമ്മൂമ്മയും. ഒപ്പം നാട്ടിലെ ഒറ്റപ്പെടലും കുട്ടികളുടെ മാനസികാവസ്ഥ വല്ലാതാക്കി. അങ്ങനെ മാധ്യമപ്രവര്ത്തകരായ സനല്കുമാര്, റോയ് മാത്യു, ബോബി നായര്, രാജേഷ് ദിവാകര് , വിനു വി ജോണ് എന്നിവര് കൊല്ലത്തെത്തി സംഭവം റിപ്പോര്ട്ട് ചെയ്തു. കുട്ടികള് പഠിക്കുന്ന ചാത്തന്നൂരിനടുത്തുള്ള സ്കൂളിലുമെത്തി. അവിടെ പി ടി ഏ മീറ്റിങ് നടക്കുകയായിരുന്നു. സ്ഥലം എം എല് എ യും കോണ്ഗ്രസ് നേതാവുമായ പ്രതാപവര്മ്മ തമ്പാനും മീറ്റിംഗില് പങ്കെടുക്കുന്നുണ്ട്. പ്രശ്നം പരിഹരിക്കാനല്ല വഷളാക്കാനാണ് അയാള് ശ്രമിച്ചത്. കുട്ടികളെ ഒരു കാരണവശാലും സ്കൂളില് തുടര്ന്ന് പഠിക്കാന് അനുവദിക്കില്ലെന്ന് എം എല് എ നിലപാട് എടുത്തു. മറ്റു കുട്ടികള്ക്ക് രോഗം പകരുമത്രേ. ഇതോടെ രക്ഷിതാക്കളും ഒറ്റക്കെട്ടായി.
. എം എല് എയോട് മാധ്യമപ്രവര്ത്തകര് കാര്യം പറഞ്ഞു മനസ്സിലാക്കാന് മാധ്യമപ്രവര്ത്തകര് ശ്രമിച്ചെങ്കിലും അയാള് വഴങ്ങിയില്ല. പിന്നീട് മാധ്യമസംഘം ബെന്സന്റെയും ബെന്സിയുടെയും വീട്ടില് പോയി. മരുന്നില്ല, ഭക്ഷണമില്ല...കടക്കാരും നാട്ടുകാരും അടുപ്പിക്കുന്നില്ല. ഒറ്റപ്പെടലില് ഒരു കുടുംബം. മരണം മുന്നില് കാണുന്ന രണ്ട് കുരുന്നുകള്. വാര്ത്ത എല്ലാ ചാനലുകളിലും വന്നു. എ കെ ആന്റണിയായിരുന്നു മുഖ്യമന്ത്രി. സനല്കുമാറും റോയ് മാത്യുവും എ.കെ ആന്റണിയെ കണ്ടു. കുട്ടികള്ക്കും കുടുംബത്തിനും മുഖ്യമന്ത്രിയെ ഒന്നു സന്ദര്ശിക്കണം എന്ന ആവശ്യം ഉന്നയിച്ചു. മുഖ്യമന്ത്രി സമ്മതിച്ചു. ബെന്സനും ബെന്സിയും ഒപ്പം റോയിമാത്യുവും സനല്കുമാറും രാജേഷ് ദിവാകറും മുഖ്യമന്ത്രിയുടെ ചേംബറില് എത്തി. കസേരയില് ഇരിക്കുകയായിരുന്നു അദ്ദേഹം. റോയി മാത്യു കുട്ടികളെ മുഖ്യമന്ത്രിയുടെ കസേരയ്ക്ക് അരികിലേക്ക് നീക്കി നിര്ത്തി. പെട്ടെന്ന് ആന്റണി ചാടി എഴുനേറ്റു. അദ്ദേഹം കുട്ടികളില് നിന്ന് അകലം പാലിച്ച് ദൂരേയ്ക്ക് മാറി ഒതുങ്ങി നിന്നു. അങ്ങനെ നിന്നാണ് ആന്റണി അവരോട് സംസാരിച്ചത്. കുട്ടികളെ തൊടാനോ ഒന്നു തലോടി ആശ്വസിപ്പിക്കാന് പോലുമോ അദ്ദേഹം മുതിര്ന്നില്ല. മാധ്യമപ്രവര്ത്തകര് അവിടെ നിന്ന് ഇറങ്ങി ഹിന്ദുസ്ഥാന് ലാറ്റക്സിന്റെ പി ആര് ഓ ആയ ലാലു ജോസഫിനെ ബന്ധപ്പെട്ടു.
കുട്ടികളുടെ ചികിത്സയ്ക്ക് ആവശ്യമായ സഹായം ലാറ്റക്സിന് ചെയ്തുകൊടുക്കാന് കഴിയുമോ എന്നായിരുന്നു അന്വേഷണം. അപ്പോള് ലാലു പറഞ്ഞു. കേന്ദ്ര ആരോഗ്യമന്ത്രി സുഷമ സ്വരാജ് അടുത്ത ദിവസം ലാറ്റക്സ് സന്ദര്ശിക്കാന് എത്തുന്നുണ്ട്. വിഷയം അവരുടെ ശ്രദ്ധയില് പെടുത്താം. അങ്ങനെ സുഷമ ലാറ്റക്സിലെത്തി. സന്ദര്ശനത്തിനിടെ ലാലു ബെന്സന്റെയും ബെന്സിയുടെയും കാര്യം ആരോഗ്യമന്ത്രിയുടെ ശ്രദ്ധയില് പെടുത്തി. കുട്ടികളുടെ ചികിത്സ ഏറ്റെടുക്കാമെന്ന് അപ്പോള്ത്തന്നെ സുഷമ വ്യക്തമാക്കി. പിറ്റേന്ന് തിരുവനന്തപുരം പ്രസ് ക്ലബ്ബില് സുഷമയുടെ പത്രസമ്മേളനം. സമ്മേളനത്തിനായി അവര് ഡയസ്സില് ഇരുന്നപ്പോള് ഞങ്ങള് ബെന്സനെയും ബെന്സിയും കൊണ്ട് അവരുടെ അടുത്തെത്തി പരിചയപ്പെടുത്തി. ഒരു നിമിഷം വൈകിയില്ല...സുഷമ സ്വരാജ് രണ്ടുകുട്ടികളെയും വാരിപ്പുണര്ന്നു. നെറുകയില് മാറി മാറി ചുംബിച്ചു.ഞങ്ങളുടെ മനസ്സ് നിറഞ്ഞു. ആ ഒരു നിമിഷം നഷ്ടപ്പെട്ട മാതൃ വാത്സല്യം ആ കുരുന്നുകള് അനുഭവിച്ചിട്ടുണ്ടാകും. ബെന്സനും ബെന്സിക്കുമുള്ള സഹായം പത്രസമ്മേളനത്തില് പ്രഖ്യാപിച്ചിട്ടാണ് സുഷമ മടങ്ങിയത്- ലാലു ജോസഫ് ഓര്ക്കുന്നു.
https://www.facebook.com/Malayalivartha
