ഇങ്ങനൊരു മനസ്സ് ലോകത്ത് മലയാളിക്കേ കാണൂ. ദുരന്തമുഖത്തെത്തി സാഹസികമായി രണ്ടു സെല്‍ഫിയെടുക്കുക, എന്നിട്ടത് സാമൂഹ്യ മാധ്യമങ്ങളില്‍ പങ്കു വയ്ക്കുക. സെല്‍ഫി ടുറിസത്തിനായി പുത്തുമലയിലും കവളപ്പാറയിലുമെത്തുന്ന സന്ദര്‍ശകര്‍ ചില്ലറയല്ല.
ഉരുള്‍പൊട്ടലുണ്ടായ ഭൂദാനം കവളപ്പാറയിലേക്കുള്ള സന്ദര്‍ശകരുടെ പ്രവാഹം രക്ഷാപ്രവര്‍ത്തനത്തെ ശരിക്കും ബാധിക്കുന്നു. ഇന്നലെ ഉച്ചകഴിഞ്ഞതോടെ പാലുണ്ട- മുണ്ടേരി റോഡില്‍ വരെ ഗതാഗതം തടസ്സപ്പെട്ടു. പാലുണ്ടയിലും ഞെട്ടിക്കുളത്തും പനങ്കയത്തും ഗതാഗതം നിയന്ത്രിക്കാന്‍ പൊലീസും നാട്ടുകാരും പാടുപ്പെട്ടു. എങ്കിലും കാഴ്ച്ചക്കാരായെത്തുന്നവര്‍ക്ക് ഒരു കൂസലുമില്ല.
പനങ്കയം പാലത്തിനു മുന്നോട്ട് വാഹനങ്ങള്‍ വിടുന്നില്ല. സന്നദ്ധ പ്രവര്‍ത്തനത്തിനെത്തുന്നവരുടെ വാഹനങ്ങള്‍ മാത്രമേ കവളപ്പാറയിലേക്ക് വിടുന്നുള്ളൂ. സന്ദര്‍ശകരെത്തുന്ന വാഹനങ്ങള്‍ കാരണം മൃതദേഹവുമായെത്തുന്ന ആംബുലന്‍സുകള്‍ക്ക് വരെ തടസ്സം നേരിടുന്നുണ്ട്.

ടുറിസം മാഫിയയുടെ ആര്‍ത്തി തന്നെയാണ് പുത്തുമലയെ തകര്‍ത്തെറിഞ്ഞത്. പച്ചക്കാട് മലയില്‍ ഓരോ റിസോര്‍ട്ട് വരുമ്പോഴും ഞങ്ങളുടെ ജീവന് ഭീഷണിയാണെന്ന് പറഞ്ഞുകൊണ്ടിരുന്നതാണ്. വലിയ പാറകള്‍ തോട്ട വച്ച് പൊട്ടിച്ചാണ് അവര്‍ നിര്‍മാണം നടത്തിയിരുന്നത്. പത്തോളം റിസോര്‍ട്ടുകള്‍ അവിടെ പണിതു. മല ഇളകിയിട്ടുണ്ടാകും. ഒടുവില്‍ എല്ലാംകൂടി ഇളകി ഞങ്ങളുടെ തലയില്‍ വീണു'. പുത്തുമല പ്രളയത്തില്‍ അച്ഛന്‍ പനീര്‍സെല്‍വത്തെയും അമ്മ റാണിയെയും നഷ്ടമായ നെഹ്‌റു(37)വിന്റെ വാക്കുകളില്‍ രോഷം. നെഹ്രുവിനു മാത്രമല്ല നിരവധി പേര്‍ക്കുണ്ട് ഈ പരാതി.

കഴിഞ്ഞ പ്രളയകാലത്തുണ്ടായ ഉരുള്‍പൊട്ടലിനു ശേഷവും ഖനന പ്രവര്‍ത്തനങ്ങള്‍ക്ക് യാതൊരു വിധത്തിലുമുള്ള നിയന്ത്രണങ്ങളും കൊണ്ടുവരാന്‍ സംസ്ഥാന സര്‍ക്കാര്‍ തയ്യാറായില്ല. ഇത്തവണത്തെ ഉരുള്‍പ്പൊട്ടലുകള്‍ക്കുള്ള കാരണവും സര്‍ക്കാര്‍ വേണ്ട നടപടി സ്വീകരിക്കാത്തതാണെന്നും റിപ്പോര്‍ട്ടുണ്ട്. ദൂരപരിധിയില്‍ പോലും ഇളവുനല്‍കി ക്വാറിമാഫിയയെ പ്രോത്സാഹിപ്പിച്ചു. പരിസ്ഥിതി ആഘാതപഠനമില്ലാതെ ഖനനാനുമതി നല്‍കരുതെന്ന സുപ്രീം കോടതി വിധിപോലും മറികടന്ന് സര്‍ക്കാര്‍ ഉത്തരവിറക്കി. ക്വാറി മാഫിയയും ടൂറിസവുമൊക്കെച്ചേര്‍ന്നു നമ്മുടെ മലനിരകള്‍ തകര്‍ത്തു. ഒടുവില്‍ ദുരന്തമുഖത്തെ സെല്‍ഫി ആഘോഷവും, എന്തേ ഈ മലയാളി ഒരിക്കലും നന്നാവാത്തേ .