സമൂഹമാധ്യമങ്ങളില്‍ പ്രചരിക്കുന്ന നുണകളിലൊന്നാണ്, പ്രളയത്തിന് ഇക്കൊല്ലം ആരുമൊന്നും കൊടുക്കുന്നില്ലെന്ന്! വയനാട്, നിലമ്പൂര്‍ എന്നിവിടങ്ങളിലെ ക്യാംപുകളിലേക്ക് വസ്ത്രം ശേഖരിക്കാന്‍ ഇറങ്ങിയവര്‍ക്ക് കടയിലുള്ളതെല്ലാം വാരിനല്‍കിയ നൗഷാദും സ്വന്തം കുഞ്ഞിന്റെ കാന്‍സര്‍ ചികിത്സയ്ക്കായി കടം വാങ്ങിയതും സ്വരൂപിച്ചു കൂട്ടിയതുമെല്ലാം എടുത്ത് മഴവെള്ളപ്പാച്ചിലില്‍ എല്ലാം നഷ്ടപ്പെട്ടവര്‍ക്കായി നല്‍കാന്‍ മടികാണിക്കാത്ത അനസുമെല്ലാം നമുക്കു ചുറ്റുമുള്ളപ്പോള്‍ നാം തോറ്റ ജനതയല്ല. ഉറപ്പാണ്്, പുരോഗതിയിലേക്കുള്ള നാടിന്റെ പ്രയാണത്തെ ഒന്നു സാവധാനത്തിലാക്കുമെങ്കിലും ഈ സാഹചര്യത്തേയും നാം അതിജീവിച്ച് മുന്നോട്ട് കുതിയ്ക്കുക തന്നെ ചെയ്യും.

ചില മനുഷ്യരുടെ തീരുമാനങ്ങളെ എത്ര തന്നെ അഭിനന്ദിച്ചാലും മതിയാകില്ല. സ്വന്തം മകന്റെ ചികിത്സയ്ക്കായി മാറ്റി വച്ച പണം മുഖ്യമന്ത്രിയുടെ ദുരിതാശ്വാസ നിധിയിലേക്ക് അയക്കാന്‍ തീരുമാനിച്ച അനസ് അക്കൂട്ടത്തില്‍ പെടുന്ന ഒരാളാണ്.

അതുകൊണ്ടാണ് ആരോഗ്യമന്ത്രി കെ.കെ. ശൈലജ ടീച്ചര്‍ അനസ്സിന് അഭിനന്ദനങ്ങളുമായി സമൂഹമാധ്യമങ്ങളില്‍ കുറിപ്പിട്ടത്. 'ടീച്ചറമ്മ എന്നെ വിളിച്ചിരുന്നു. സര്‍ക്കാര്‍ കൂടെയുണ്ടെന്ന് പറഞ്ഞു. കുഞ്ഞിനുള്ള എല്ലാ ചികിത്സയും നല്‍കാമെന്നു പറഞ്ഞു. കണ്ണുകള്‍ അറിയാതെ തന്നെ നിറയുന്നു. പ്രശസ്തിക്കു വേണ്ടിയല്ല അത്തരമൊരു പോസ്റ്റിട്ടത്. കവളപ്പാറയിലെയും പുത്തുമലയിലെയും കാഴ്ചകള്‍ കാണുമ്പോള്‍ സങ്കടം വരുന്നു, നമ്മുടെ സങ്കടങ്ങള്‍ എറെ ചെറുതാണെന്ന് തിരിച്ചറിഞ്ഞതോടെയാണ് ഞാനും ഭാര്യ റെജിലയും ചേര്‍ന്ന് ഇത്തരമൊരു തീരുമാനമെടുത്തതെന്ന് അനസ് പറഞ്ഞു.

പത്തനംതിട്ട എഴംകുളം സ്വദേശിയായ അനസിന് മൂന്ന് മക്കളാണ് ഉള്ളത്. 4 വയസുള്ള രണ്ടാമത്തെ മകനാണ് കാന്‍സര്‍ ബാധിച്ചു ചികിത്സയിലുള്ളത്. ജന്‍മനാ മാനസിക ദൗര്‍ബല്യമുള്ള കുഞ്ഞ് കാന്‍സര്‍ ബാധിതനാണെന്ന് ആറുമാസം മുന്‍പാണ് തിരിച്ചറിഞ്ഞത്. നാലുമാസമായി ആര്‍സിസിയില്‍ ചികിത്സയിലാണ്. നാഗര്‍കോവില്‍ ആസ്ഥാനമായ ഒരു സ്വകാര്യ കമ്പനിയിലുള്ള ജോലിയാണ് വരുമാനമാര്‍ഗം. പത്തുലക്ഷത്തോളം രൂപ ലോണ്‍ എടുത്താണ് മകന്റെ ചികിത്സ നടത്തിയിരുന്നത്. വീണ്ടും ഈ വെള്ളിയാഴ്ച ആര്‍സിസിയില്‍ ചികിത്സ തുടങ്ങുകയാണ്. സാമ്പത്തികമായി ഏറെ ബുദ്ധിമുട്ടിലാണെന്ന് അനസ് തുടര്‍ന്ന് പറയുന്നു.

കുട്ടിയുടെ ചികിത്സയ്ക്കായി സ്വന്തം നിലയില്‍ സ്വരൂപിച്ച തുകയും രണ്ട് പേര്‍ സഹായിച്ച തുകയും ചേര്‍ത്താണ് മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കാന്‍ തീരുമാനിച്ചത്. ഫെയ്‌സ്ബുക്കില്‍ കുറിപ്പിട്ടതോടെ നിരവധി പേര്‍ എന്നെ തേടിയെത്തി. ആശ്വാസവാക്കുകള്‍ പറഞ്ഞു. റീജിയണല്‍ കാന്‍സര്‍ സെന്ററില്‍ ചികിത്സ ഉറപ്പുവരുത്താനാവശ്യമായ നടപടികള്‍ സ്വീകരിക്കുമെന്ന ശൈലജ ടീച്ചറുടെ വാക്കുകള്‍ നല്‍കുന്ന ആത്മവിശ്വാസം വലുതാണ്. നാം ഒറ്റക്കെട്ടായി അതിജീവിക്കുമെന്ന് അനസ് ഉറച്ച ആത്മവിശ്വാസത്തോടെ പറഞ്ഞു.