മാധ്യമപ്രവര്‍ത്തകനെ കാറിടിച്ച് കൊലപ്പെടുത്തിയ കേസില്‍ ഐ.എ.എസ് ഉദ്യോഗസ്ഥന്‍ ശ്രീറാം വെങ്കിട്ടരാമന്റെ ജാമ്യം റദ്ദാക്കണമെന്ന സര്‍ക്കാരിന്റെ ആവശ്യം ഹൈക്കോടതി തള്ളി. ശ്രീറാമിനെ കസ്റ്റഡിയിലെടുത്ത് ചോദ്യം ചെയ്യേണ്ടെന്നും കോടതി പറഞ്ഞു. ഇതോടെ മുഖ്യമന്ത്രി പിണറായി വിജയനും സര്‍ക്കാരിനും വലിയ തിരിച്ചടിയായി. അതേസമയം അന്വേഷണത്തില്‍ വീഴ്ച വരുത്തിയ പൊലീസിനെതിരെ കോടതി ഇന്നും വിമര്‍ശിച്ചു. കേസ് അന്വേഷിക്കുന്നതില്‍ പൊലീസിന് വീഴ്ച പറ്റി. രക്തപരിശോധന വൈകിച്ചത് ഉദ്യോഗസ്ഥന്റെ വീഴ്ചയാണ്. സര്‍ക്കാരിന്റെ അപ്പീല്‍ തള്ളിയാണ് ഹൈക്കോടതി ഇക്കാര്യം വ്യക്തമാക്കിയത്. ഒരു മണിക്കൂര്‍ പ്രതിയെ കയ്യില്‍ കിട്ടിയിട്ടും പൊലീസ് നടപടി ക്രമങ്ങള്‍ പൂര്‍ത്തിയാക്കിയില്ല. ഒരു സാക്ഷിമൊഴിയുടെ അടിസ്ഥാനത്തില്‍ കേസ് എടുക്കാനാകില്ലെന്നും കോടതി. മദ്യപിച്ചെന്ന കാര്യം രേഖാമൂലം തെളിയിക്കാനാകില്ലെന്നും കോടതി. ജാമ്യം അനുവദിച്ച തിരുവനന്തപുരം മജിസ്‌ട്രേട്ട് കോടതി ഉത്തരവിനെതിരെയാണ് സര്‍ക്കാര്‍ ഹൈക്കോടതിയെ സമീപിച്ചത്. 

പൊലീസ് നിയമാനുസൃതം സ്വീകരിക്കേണ്ട നടപടികള്‍ എടുത്തില്ല. ഭാവിയില്‍ ഇത്തരം വീഴ്ചകള്‍ ഉണ്ടാകാതിരിക്കാന്‍ മാര്‍ഗ്ഗനിര്‍ദ്ദേശം പുറപ്പെടുവിക്കണം. പൊലീസിന്റെ വീഴ്ചയ്ക്ക് സര്‍ക്കാര്‍ കോടതിയില്‍ വന്ന് പരിഹാരം തേടേണ്ടെന്നും ഹൈക്കോടതി പറഞ്ഞു. കഴിഞ്ഞ വെള്ളിയാഴ്ച ജാമ്യാം റദ്ദാക്കണമെന്ന ഹര്‍ജി പരിഗണിച്ചപ്പോഴും സര്‍ക്കാരിനെ കോടതി വിമര്‍ശിച്ചിരുന്നു. തെളിവ് ശേഖരണം അടക്കം നടത്തേണ്ടതുണ്ട്. അന്വേഷണം നടക്കുകയാണ്. എന്നീ കാര്യങ്ങള്‍ പ്രോസിക്യൂഷന്‍ ചൂണ്ടിക്കാട്ടിയിരുന്നെങ്കിലും കോടതി അത് മുഖവിലയ്ക്ക് എടുത്തില്ല. തെളിവുശേഖരണത്തിലടക്കം പൊലീസിനുണ്ടായ വീഴ്ച കഴിഞ്ഞദിവസവും കോടതി ചൂണ്ടിക്കാട്ടിയിരുന്നു. വീഴ്ച വരുത്തിയ ഉദ്യോഗസ്ഥനെ സസ്‌പെന്റ് ചെയ്‌തെന്നും സര്‍ക്കാര്‍ ചൂണ്ടിക്കാണിച്ചിരുന്നു. 

ജാമ്യം നല്‍കിയതില്‍ തിരുവനന്തപുരം മജിസ്‌ട്രേട്ട് കോടതിക്ക് വീഴ്ച പറ്റിയെന്ന് സര്‍ക്കാര്‍ കോടതിയില്‍ ചൂണ്ടിക്കാട്ടിയിരുന്നു. കേസില്‍ ശ്രീറാമിനെതിരെ 30 ദിവസത്തിനകം കുറ്റപത്രം സമര്‍പ്പിക്കണമെന്ന് ഡിജിപി നേരത്തെ നിര്‍ദേശം നല്‍കിയിരുന്നു. അപകടം നടന്ന സമയത്ത് വാഹനം ഓടിച്ചത് താനാണെന്നും താന്‍ മദ്യപിച്ചിട്ടില്ലെന്നും ശ്രീറാം വെങ്കിട്ടരാമന്‍ പൊലീസിനോട് പറഞ്ഞിരുന്നു. അപകട സമയത്ത് ശ്രീറാം മദ്യപിച്ചിരുന്നതായാണ് ദൃക്‌സാക്ഷി ജോബി അന്വേഷണ സംഘത്തിന് മൊഴി നല്‍കിയിരുന്നു. അതുപോലെ ശ്രീറാമിനെ തിരുവനന്തപുരം ജനറല്‍ ആശുപത്രിയില്‍ പരിശോധനയ്ക്ക് എത്തിച്ചപ്പോള്‍ മദ്യത്തിന്റെ മണം ഉണ്ടായിരുന്നതായി ഒ.പി ടിക്കറ്റില്‍ ഡോക്ടര്‍ രേഖപ്പെടുത്തിയിരുന്നു. ഇക്കാര്യങ്ങള്‍ കോടതിയില്‍ രേഖപ്പെടുത്താന്‍ പൊലീസിനായില്ല. 

അപകടത്തില്‍ പരിക്ക് പറ്റിയ ശ്രീറാം സ്വകാര്യ ആശുപത്രിയില്‍ ചികിത്സതേടിയിരുന്നു. അത് വിവാദമായതിനെ തുടര്‍ന്ന് മെഡിക്കല്‍ കോളജിലേക്ക് മാറ്റുകയായിരുന്നു. ഇന്നലെ ശ്രീറാമിനെ ഡിസ്ചാര്‍ജ്ജ് ചെയ്തു. അപകടത്തില്‍ ശ്രീറാമിന്റെ കൈയ്ക്കും നട്ടെല്ലിനും പരുക്കേറ്റിരുന്നു. എന്നാല്‍ സ്വകാര്യ ആശുപത്രിയിലെ ഡോക്ടര്‍മാര്‍ കാര്യമായ കുഴപ്പമില്ലെന്നാണ് പറഞ്ഞിരുന്നത്. മെഡിക്കല്‍കോളജിലെ മെഡിക്കല്‍ ബോര്‍ഡ് നടത്തിയ പരിശോധനയില്‍ ആരോഗ്യനില തൃപ്തികരമാണെന്ന് കണ്ടെത്തിയതിനെ തുടര്‍ന്നാണ് ഇന്നലെ ഡിസ്ചാര്‍ജ് ചെയ്തത്. നാലാഴ്ചത്തെ വിശ്രമം ഡോക്ടര്‍മാര്‍ ശ്രീറാമിന് നിര്‍ദേശിച്ചിട്ടുണ്ടെന്നാണ് അറിയുന്നു. അപകടം നടന്നതിന് പിന്നാലെ നരഹത്യയ്ക്ക് പൊലീസ് കേസ് എടുത്തിരുന്നു. തുടര്‍ന്ന് സര്‍വ്വീസില്‍ നിന്ന് സസ്‌പെന്റ് ചെയ്തിരുന്നു.