അതിവേഗതയില്‍ സഞ്ചരിക്കുന്ന വിമാനത്തില്‍ പക്ഷിയിടിച്ചാലുണ്ടാകുന്ന അപകടം വളരെ വലുതാണ്. വിമാനത്തിന്റെ നിയന്ത്രണം നഷ്ടപ്പെട്ടാല്‍ അത് നിയന്ത്രിക്കുക പൈലറ്റിനും വളരെ സാഹസമായിരിക്കും. കഴിഞ്ഞ ദിവസം ഇതേ അവസ്ഥയില്‍ നിന്നാണ് വിമാനത്തെ പൈലറ്റ് രക്ഷപ്പെടുത്തിയത്. 

233 യാത്രക്കാരുമായി പറന്നുയര്‍ന്ന റഷ്യന്‍ എയര്‍ബസ് വിമാനം പക്ഷിയിടിച്ചതിനെ തുടര്‍ന്ന് പാടത്ത് സുരക്ഷിതമയി ഇടിച്ചിറക്കി. മോസ്‌കോയുടെ തെക്ക്കിഴക്കന്‍ പാടത്താണ് യൂറല്‍ എയര്‍ലൈന്‍സിന്റെ എയര്‍ബസ് 321 വിമാനം അടിയന്തിര ലാന്‍ഡിങ് നടത്തിയത്. അപകടഘട്ടത്തിലും മനസാന്നിദ്ധ്യം കൈവിടാതെ വിമാനം സുരക്ഷിതമായി ഇറക്കിയ പൈലറ്റിന് ലോകത്തിന്റെ വിവിധ ഭാഗത്ത് നിന്ന് അഭിനന്ദന സന്ദേശങ്ങളുടെ പ്രവാഹമാണ്.

മോസ്‌കോയില്‍ നിന്ന് ക്രിമിയയിലേക്ക് പോവുകയായിരുന്നു വിമാനം. വ്യാഴാഴ്ച രാവിലെ മോസ്‌കോയിലെ സുകോവ്‌സ്‌കി വിമാനത്തവളത്തില്‍ നിന്നാണ് വിമാനം പറന്നുയര്‍ന്നത്. റണ്‍വേയില്‍ നിന്ന് ഒരു കിലോമീറ്റര്‍ പിന്നിട്ടപ്പോള്‍ വിമാനത്തില്‍ പക്ഷി ഇടിച്ചതിനെ തുടര്‍ന്ന് അടിയന്തിര ലാന്‍ഡിങ് നടത്താന്‍ പൈലറ്റ് തീരുമാനിക്കുകയായിരുന്നു.

തുടര്‍ന്ന് സമീപത്തെ കൃഷിപ്പാടത്ത് അടിയന്തിര ലാന്‍ഡിങ് നടത്തുകയായിരുന്നു. പ്രവര്‍ത്തിപ്പിക്കുന്നതിനിടെ നിന്നുപോയ എഞ്ചിനുമായാണ് വിമാനം പാടത്ത് ലാന്‍ഡ് ചെയ്തത്. 

വിമാനം ലാന്‍ഡ് ചെയ്തപ്പോള്‍ 23 യാത്രക്കാര്‍ക്ക് പരിക്കേറ്റതായി റഷ്യന്‍ ആരോഗ്യ മന്ത്രാലയം അറിയിച്ചു. ഒരാള്‍ക്ക് മാത്രമാണ് സാരമായ പരിക്കുള്ളത്. 41 കാരനായ ദാമിര്‍ യൂസുപോവായിരുന്നു വിമാനത്തിന്റെ പൈലറ്റ്. റൊമന്‍സ്‌കിലെ മഹത്ഭുതം എന്നാണ് റഷ്യന്‍ മാധ്യമങ്ങള്‍ സംഭവത്തെ വിശേഷിപ്പിച്ചത്.

പൈലറ്റ് ദാമിര്‍ യൂസുപവ് വീര നായകനാണെന്ന് റഷ്യന്‍ മാധ്യമമായ പ്രാവ്ദ വിശേഷിപ്പിച്ചു. 233 പേരുടെ ജീവന്‍ രക്ഷിച്ച യൂസുപോവും സഹപ്രവര്‍ത്തകരും നായകന്മാരാണെന്ന് ക്രെംലിന്‍ വക്താവ് ദിമിത്രി പെസ്‌കോവ് പ്രതികരിച്ചു. സംഭവത്തില്‍ സര്‍ക്കാര്‍ അന്വേഷണം പ്രഖ്യാപിച്ചു.

ഇക്കഴിഞ്ഞ ജൂണ്‍ 29 ന് ഇന്ത്യയിലും ഇതുപോലെ പക്ഷിയിടിച്ച് വിമാനാപകടമുണ്ടായി. പക്ഷിയിടിച്ച് എന്‍ജിന്‍ തകരാറിലായ വ്യോമസേനയുടെ ജാഗ്വര്‍ വിമാനം സുരക്ഷിതമായി നിലത്തിറക്കി പൈലറ്റ് അന്നും ഹീറോയായി. വ്യാഴാഴ്ച രാവിലെ അംബാലയിലെ വ്യോമസേന കേന്ദ്രത്തില്‍ നിന്ന് രാവിലെ പരിശീലനത്തിലായി വിമാനം പറന്നുയര്‍ന്ന് നിമിഷങ്ങള്‍ക്കുള്ളിലായിരുന്നു സംഭവം.

പരിശീലന ബോംബുകളും അധികമായി ഘടിപ്പിച്ചിരുന്ന ഇന്ധന ടാങ്കുകളും താഴേയ്ക്ക് എറിഞ്ഞാണ് പൈലറ്റ് വന്‍ ദുരന്തം ഒഴിവാക്കിയത്. വിമാനം തകര്‍ന്ന് വീണിരുന്നെങ്കില്‍ വ്യോമസേനാ കേന്ദ്രത്തിന് സമീപമുള്ള അനവധിയാളുകളുടെ ജീവന്‍ നഷ്ടമാകുമായിരുന്നു. ടേക്ക് ഓഫിന് പിന്നാലെയാണ് വിമാനത്തില്‍ പക്ഷികള്‍ ഇടിച്ചത്. ഇതുമൂലം വിമാനത്തിന്റെ ഒരു എന്‍ജിന്‍ തകരാറിലായി. അപകടം മണത്ത പൈലറ്റ് രണ്ട് ഇന്ധന ടാങ്കുകളും പരിശീലന ബോംബുകളും വിമാനത്തില്‍ നിന്ന് നിലത്തേക്കെറിഞ്ഞു. 

സംഭവത്തിന്റെ വീഡിയോയും വ്യോമസേന ട്വിറ്ററിലൂടെ പങ്കുവെച്ചിട്ടുണ്ട്. ബോംബുകളും ഇന്ധന ടാങ്കും നിലത്ത് പതിച്ചതോടെ അംബാല വ്യോമ കേന്ദ്രത്തിന് സമീപം വന്‍സ്‌ഫോടനമുണ്ടാവുകയും ജനങ്ങള്‍ പരിഭ്രാന്തരാവുകയും ചെയ്തു. സംഭവത്തില്‍ ആര്‍ക്കും പരിക്കില്ലെന്നും വന്‍ ദുരന്തമാണ് പൈലറ്റിന്റെ സമയോചിതമായ ഇടപെടല്‍ കൊണ്ട് ഒഴിവായതെന്നും വ്യോമസനേ അറിയിച്ചു.