ഭര്‍തൃവീട്ടില്‍ 24 വയസ്സുകാരിയെ ജീവനൊടുക്കിയ നിലയില്‍ കണ്ടെത്തി. ഔട്ടര്‍ ഡല്‍ഹിയിലെ നംഗ്ലോയിയിലാണ് സംഭവം. ഭര്‍തൃവീട്ടുകാരുടെ പീഡനമാണ് തന്റെ മരണത്തിനു കാരണമെന്ന് വ്യക്തമാക്കുന്ന വിഡിയോ റെക്കോര്‍ഡ് ചെയ്ത ശേഷമാണ് ടീന എന്ന യുവതി ജീവനൊടുക്കിയത്. വീട്ടിനുള്ളിലെ സീലിങ് ഫാനില്‍ തൂങ്ങിമരിച്ച നിലയില്‍ ടീനയെ കണ്ടെത്തുകയായിരുന്നുവെന്ന് പൊലീസ് അറിയിച്ചു.

സംഭവസ്ഥലത്തുനിന്നും ആത്മഹത്യാക്കുറിപ്പുകളൊന്നും ലഭിച്ചിട്ടില്ല. എന്നാല്‍ ടീനയുടെ മൊബൈല്‍ ഫോണില്‍ നിന്നും മൂന്ന് മിനിറ്റിലധികം ദൈര്‍ഘ്യമുള്ള വിഡിയോ ക്ലിപ്പ് അന്വേഷണസംഘം കണ്ടെടുത്തു. താന്‍ നേരിട്ട ക്രൂരമായ പീഡനങ്ങളെക്കുറിച്ചും ദുരവസ്ഥയെക്കുറിച്ചും മാതാപിതാക്കളോടും ഭര്‍ത്താവിനോടും മറ്റ് കുടുംബാംഗങ്ങളോടും സംസാരിക്കുന്നതാണ് വിഡിയോ.

''എനിക്കൊരു ചെറിയ കുടുംബം മാത്രമാണ് വേണ്ടിയിരുന്നത്. ഞാന്‍ ഒരിക്കലും മന്ത്രവാദമൊന്നും ചെയ്തിട്ടില്ല''– കരഞ്ഞുകൊണ്ട് യുവതി വിഡിയോയില്‍ പറയുന്നുണ്ട്. മാനസിക വെല്ലുവിളി നേരിടുന്ന ഭര്‍ത്താവിനൊപ്പം ഇനി ജീവിക്കാന്‍ കഴിയില്ലെന്നും യുവതി വ്യക്തമാക്കുന്നു. താന്‍ ഈ ലോകം വിട്ടുപോവുകയാണെന്ന് പിതാവിനോട് പറയുന്ന ടീന, തന്റെ മരണത്തിന്റെ പേരില്‍ ആരും വഴക്കിടരുതെന്നും ഒന്നരവയസ്സുള്ള മകളെ നന്നായി നോക്കണമെന്നും അഭ്യര്‍ഥിക്കുന്നുണ്ട്. കുഞ്ഞിനെ ഭര്‍ത്താവടക്കം മറ്റാര്‍ക്കും വിട്ടുകൊടുക്കരുതെന്നും വിഡിയോയില്‍ പറയുന്നുണ്ട്.

രണ്ടര വര്‍ഷം മുമ്പായിരുന്നു ടീനയുടെ വിവാഹം. സ്വകാര്യ മേഖലയില്‍ ജോലി ചെയ്യുന്ന ഭര്‍ത്താവിനൊപ്പം നംഗ്ലോയിയിലായിരുന്നു താമസം. ഇവര്‍ക്ക് ഒന്നര വയസ്സുള്ള ഒരു പെണ്‍കുഞ്ഞുണ്ട്. മൃതദേഹം പോസ്റ്റ്‌മോര്‍ട്ടം നടപടികള്‍ക്ക് അയച്ചു. സബ് ഡിവിഷണല്‍ മജിസ്‌ട്രേറ്റിനു മുന്നില്‍ രേഖപ്പെടുത്തിയ മൊഴികളുടെ അടിസ്ഥാനത്തില്‍ പൊലീസ് കേസെടുത്തിട്ടുണ്ട്.