ആശങ്കപടര്ത്തി പാക്കിസ്ഥാന് ജീവനക്കാരുമായി വിദേശ ചരക്കുകപ്പല് വിഴിഞ്ഞം കടല് വഴി; കപ്പലിനെ വിഴിഞ്ഞത്തെ കോസ്റ്റ് ഗാര്ഡ് ചെറുകപ്പലുകള് രഹസ്യമായി പിന്തുടര്ന്നു
ഏറെ ആശങ്കപടര്ത്തി പാക്കിസ്ഥാന് ജീവനക്കാരുമായി വിദേശ ചരക്കുകപ്പല് വിഴിഞ്ഞം കടല് വഴി പോയി എന്ന വാര്ത്തയാണ് പുറത്തുവരുന്നത്. അതീവ ജാഗ്രതാ മുന്നറിയിപ്പിനിടെ നടന്ന ഈ സംഭവം അതീവ സൂക്ഷ്മതയോടെയാണ് സുരക്ഷാ ഉദ്യോഗസ്ഥര് അതിനെ നിരീക്ഷിച്ചത്. കപ്പലില് നിന്നും ആരെങ്കിലും തീരത്ത് ഇറങ്ങിയോ എന്നകാര്യവും സൂക്ഷ്മമായാണ് നിരീക്ഷിച്ചത്. കപ്പലിനെ വിഴിഞ്ഞത്തെ കോസ്റ്റ് ഗാര്ഡ് ചെറുകപ്പലുകള് രഹസ്യമായി പിന്തുടര്ന്നു നിരീക്ഷിക്കുകയായിരുന്നു. കേരള അതിര്ത്തി പിന്നിട്ടുവെങ്കിലും വ്യോമസേനയുള്പ്പെടെ വിവിധ വിഭാഗങ്ങള് കപ്പലിനെ അതിസൂക്ഷ്മമായി നിരീക്ഷിക്കുന്നു. പാനമ റജിസ്ട്രേഷനുള്ള 'അരിയാന' എന്ന ചരക്കു കപ്പലാണ് കഴിഞ്ഞ ദിവസം വിഴിഞ്ഞം തീരത്തു നിന്നു ഏകദേശം 60 കിലോ മീറ്റര് അകലെ കടന്നുപോയത്. 21 ജീവനക്കാരുള്ള കപ്പലില് 20 പേരും പാക്കിസ്ഥാനികളാണെന്നു കോസ്റ്റ് ഗാര്ഡ് അധികൃതര് പറഞ്ഞു. ഒരാള് ഇത്യോപ്യയില് നിന്നുള്ളയാള്. കെമിക്കല് ടാങ്കര് ആയ കപ്പല് കറാച്ചി തുറമുഖത്തുനിന്നാണ് ഇന്ത്യന് അതിര്ത്തിയിലേക്കു കടന്നതെന്നതും കപ്പലിലുള്ളവരില് ഭൂരിഭാഗവും പാക്കിസ്ഥാന് സ്വദേശികളെന്നതുമാണ് സംശയത്തിനിട നല്കിയത്.
ഗുജറാത്ത് തീരത്ത് സിര് ക്രീക്ക് അതിര്ത്തി മേഖലയില് ഉപേക്ഷിക്കപ്പെട്ട നിലയില് പാക്കിസ്ഥാന് ബോട്ടുകള് കണ്ടെത്തിയതിനെ തുടര്ന്ന് കേരളമടക്കമുള്ള ദക്ഷിണേന്ത്യന് സംസ്ഥാനങ്ങളില് ഭീകരാക്രമണത്തിനു സാധ്യതയെന്ന കരസേനയുടെ മുന്നറിയിപ്പ് കൂടി വന്നതോടെ സംശയം ഇരട്ടിച്ചു. കപ്പല് ഇന്ത്യന് അതിര്ത്തിയിലേക്കു പ്രവേശിച്ചതു മുതല് കര്ശന നിരീക്ഷണത്തിലായി.
ക്ഷിണേന്ത്യയില് ഭീകരാക്രമണത്തിനു സാധ്യതയെന്നു നേരത്തതേ മുന്നറിയിപ്പുണ്ടായിരുന്നു. ഗുജറാത്തില് അറബിക്കടലിലെ സര് ക്രീക്കില് ഉപേക്ഷിച്ച നിലയില് ബോട്ടുകള് കണ്ടെത്തിയ സാഹചര്യവും ഉണ്ടായിരുന്നു. കരസേന ദക്ഷിണമേഖല കമാന്ഡിങ് ഇന് ചീഫ് ലഫ്റ്റനന്റ് ജനറല് എസ്.കെ.സൈനിയായിരുന്നു മുന്നറിയിപ്പ് നല്കിയത്. ബോട്ടുകള് നിരീക്ഷണത്തിലാണെന്നും മുന്കരുതലുകള് സ്വീകരിച്ചിട്ടുണ്ടെന്നും അദ്ദേഹം പറഞ്ഞു.ഭീകരാക്രമണ മുന്നറിയിപ്പിനെത്തുടര്ന്നു കേരളത്തിലും കനത്ത ജാഗ്രതാ നിര്ദേശം പുറപ്പെടുവിച്ചു. ഓണാഘോഷവുമായി ബന്ധപ്പെട്ട തിരക്കുള്ളയിടങ്ങളില് സുരക്ഷാ പരിശോധന കര്ശനമാക്കി. സംശയാസ്പദമായി എന്തെങ്കിലും കണ്ടാല് 112 എന്ന നമ്പറില് അറിയിക്കണമെന്ന് ഡിജിപി ലോക്നാഥ് ബെഹ്റ അറിയിച്ചു.
നേരത്തെ, കടലിനടിയിലൂടെ ഇന്ത്യയെ ആക്രമിക്കാന് പാക്ക് ഭീകരസംഘടന ജയ്ഷെ മുഹമ്മദ് ഭീകരര്ക്കു പരിശീലനം നല്കുന്നതായി റിപ്പോര്ട്ടുണ്ടെന്നു നാവികസേനാ മേധാവി അഡ്മിറല് കരംബിര് സിങ് കഴിഞ്ഞ മാസം വെളുപ്പെടുത്തിയിരുന്നു. പുല്വാമയില് നടന്ന ഭീകരാക്രമണത്തിനു ശേഷം ആക്രമണ രീതിയില് കാര്യമായ മാറ്റങ്ങള് വരുത്താന് ഭീകരര് ഒരുങ്ങുന്നതായി ഇന്റലിജന്സ് റിപ്പോര്ട്ട് ലഭിച്ചിട്ടുണ്ടെന്നും നാവികസേനാ മേധാവി പറഞ്ഞു. കടല് വഴിയുള്ള ഏത് ആക്രമണത്തെയും നേരിടാന് നാവിക സേന സജ്ജമാണെന്നും കരംബിര് സിങ് പറഞ്ഞു. ജയ്ഷെ മുഹമ്മദിന്റെ മുങ്ങല് വിദഗ്ദരായ ചാവേറുകള് സമുദ്രത്തിനടിയില് കൂടി കൂടി ഏങ്ങനെ ആക്രമണം നടത്താമെന്നു പരിശീലനം നേടുന്നതായുള്ള ഇന്റലിജന്സ് വിവരങ്ങളാണ് ലഭിച്ചത്. ഭീകരവാദത്തിന്റെ മാറിയ മുഖമാണ് ഇതെന്നും ഏത് തരത്തിലുള്ള സാഹസവും ചെറുത്തു തോല്പ്പിക്കുമെന്നും നാവികസേനാ മേധാവി പറഞ്ഞിരുന്നു.
https://www.facebook.com/Malayalivartha
