ഇനിയല്ലേ കളികള്... യുഎഇയില് ചെക്ക് കേസില് അറസ്റ്റിലായ തുഷാര് വെള്ളാപ്പള്ളി കേരളത്തിലെത്തി; തുഷാറിന് പാര്ട്ടി പ്രവര്ത്തകരുടേയും എസ്എന്ഡിപി പ്രവര്ത്തകരുടേയും ഉജ്ജ്വല സ്വീകരണം; നാസില് അബ്ദുള്ളയ്ക്കെതിരെ നിയമപരമായി നീങ്ങുമെന്ന് തുഷാര്
ശരിക്കും പറഞ്ഞാല് ഇങ്ങനെയൊരു സംഭവം ജീവിതത്തില് ഉണ്ടാകുമെന്ന് തുഷാര് വെള്ളാപ്പള്ളി ഒരിക്കലും കരുതിയില്ല. ദൈവത്തെ നേരിട്ട് കണ്ട പ്രതീതിയാണ് യുഎഇയില് തുഷാറിനെ സംബന്ധിച്ചടുത്തോളം സംഭവിച്ചത്. അപ്രതീക്ഷിതമായി അന്യദേശത്ത് ചെക്ക്കേസില്പ്പെട്ട് ജയിലിലാകുക, കോടിക്കണക്കിന് രൂപ നല്കി സെറ്റില് ചെയ്യാന് ശ്രമിക്കുക, ഒരു രൂപ പോലും നല്കാതെ കേസില് നിന്നൂരുക... എല്ലാം ഒരു യോഗം പോലെയാണ് തുഷാര് വെള്ളാപ്പള്ളിയെ സംബന്ധിച്ച്.
യുഎഇയില് ചെക്ക് കേസില് അറസ്റ്റിലായ തുഷാര് വെള്ളാപ്പള്ളി അവസാനം കേരളത്തിലെത്തി. കേസില് നിന്ന് മോചിതനായതിനെ തുടര്ന്നാണ് തുഷാറിന് കേരളത്തിലേക്ക് തിരിക്കാന് സാധിച്ചത്. കൊച്ചി നെടുമ്പാശേരി വിമാനത്താവളത്തിലാണ് രാവിലെ 9.15 നാണ് തുഷാര് നെടുമ്പാശേരിയിലെത്തിയത്. വിമാനത്താവളത്തില് വലിയ വരവേല്പ്പാണ് തുഷാറിന് ലഭിച്ചത്. എസ്എന്ഡിപി, ബിഡിജെഎസ് പ്രവര്ത്തകര് ചേര്ന്നാണ് സ്വീകരണമൊരുക്കിയത്.
വ്യാഴാഴ്ച ദുബായില് നിന്ന് തിരിക്കാനാണ് തുഷാര് ആദ്യം തീരുമാനിച്ചത്. എന്നാല് വിമാനം വൈകിയതോടെ യാത്ര മാറ്റിവയ്ക്കുകയായിരുന്നു. വെള്ളിയാഴ്ച കേരളത്തില് ചതയദിനാഘോഷങ്ങള് നടക്കുന്നതിനാല് യാത്ര ഞായറാഴ്ചത്തേക്ക് മാറ്റുകയായിരുന്നു.
തുഷാര് വെള്ളാപ്പള്ളിയ്ക്കെതിരായ ചെക്ക് കേസ് അജ്മാന് കോടതി തള്ളിയതോടെയാണ് നാട്ടിലേക്ക് മടങ്ങാനുള്ള അവസരമുണ്ടായത്. തുഷാറിന്റെ പാസ്പോര്ട്ട് നേരത്തെ കോടതിയില് ജാമ്യമായി സമര്പ്പിച്ചിരുന്നെങ്കിലും അതും കഴിഞ്ഞദിവസം തിരിച്ചുനല്കി. പരാതിക്കാരനായ നാസില് അബ്ദുള്ളയ്ക്ക് കേസ് തെളിയിക്കാനാവശ്യമായ രേഖകള് സമര്പ്പിക്കാനായില്ലെന്ന് ചൂണ്ടിക്കാണിച്ചാണ് അജ്മാന് കോടതി കേസ് തള്ളിയത്. ചെക്ക് കേസ് നല്കിയ തൃശ്ശൂര് സ്വദേശി നാസില് അബ്ദുള്ളയ്ക്കെതിരേ തുഷാര് യുഎഇയില് നിയമനടപടി സ്വീകരിക്കുമെന്നാണ് തുഷാര് വ്യക്തമാക്കിയത്. ഗൂഢാലോചന, കൃത്രിമ രേഖ ചമക്കല് എന്നീ വകുപ്പുകള് ചുമത്തിയായിരിക്കും നാസിലിനെതിരെ കേസ് നല്കുക.
അജ്മാന് കോടതിയില് തുഷാറിനെതിരേ ഉണ്ടായിരുന്ന ചെക്ക് കേസില് പരാതിക്കാരനായ നാസില് അബ്ദുള്ള സമര്പ്പിച്ച രേഖകള് വിശ്വാസയോഗ്യമല്ലെന്ന് കണക്കിലെടുത്ത് കോടതി തള്ളിയിരുന്നു. പിന്നാലെയാണ് നാസിലിനെതിരേ തുഷാര് നിയമ നടപടിക്കൊരുങ്ങുന്നത്. മൂന്ന് മുതല് അഞ്ച് വര്ഷംവരെ തടവും നാടുകടത്തലും ശിക്ഷലഭിക്കാവുന്ന കുറ്റങ്ങളില് നാസിലെനെതിരേ നിയമ പോരാട്ടം നടത്താനാണ് നീക്കം. തനിക്കെതിരായ ഗൂഢാലോചനയില് പങ്കാളികളായവരെക്കൂടി നിയമത്തിന് മുന്നില് കൊണ്ടുവരാനാണ് തുഷാറിന്റെ ശ്രമം. അതേസമയം തന്നെ കേരളത്തിലും നാസിലിനെ കുടുക്കാനുള്ള നീക്കം നടത്താനും സാധ്യതയേറെയാണ്.
തുഷാര് വെള്ളാപ്പള്ളി പത്തുവര്ഷം മുമ്പ് നിര്ത്തിപ്പോയ ബോയിങ് കണ്സ്ട്രക്ഷന് കമ്പനിയുടെ പേരിലുള്ള ചെക്കാണ് പ്രശ്നമായത്. കമ്പനിയുടെ ഉപകരാര് നല്കിയിരുന്നത് തൃശൂര് സ്വദേശി നാസില് അബ്ദുല്ലയുടെ ഉടമസ്ഥതയിലുള്ള കമ്പനിക്കായിരുന്നു. പത്തു ദശലക്ഷം ദിര്ഹം (19 കോടി രൂപ) നല്കാനുണ്ടായിരുന്നെന്നാണ് നാസില് അബ്ദുല്ല ചൂണ്ടിക്കാണിച്ചിരിക്കുന്നത്. അതാണിപ്പോള് പൊളിഞ്ഞത്.
തുഷാര് വെള്ളാപ്പള്ളിയ്ക്ക് ജാമ്യം ലഭിക്കാന് ഏറെ സഹായിച്ചത് പ്രമുഖ പ്രവാസി വ്യവസായിയായ ലുലു ഗ്രൂപ്പ് ചെയര്മാന് എം.എ.യൂസഫലിയുടെ ഇടപെടലിനെ തുടര്ന്നാണ്. ആവശ്യമായ ജാമ്യത്തുക കെട്ടിവച്ചാണ് തുഷാര് ജയില് മോചിതനായത്. തുഷാര് അറസ്റ്റിലായെന്ന വിവരം കിട്ടിയ ഉടനെ വെള്ളാപ്പള്ളി നടേശന് മുഖ്യമന്ത്രിയുമായി ബന്ധപ്പെട്ടു. മുഖ്യമന്ത്രിയുടെ അഭ്യര്ത്ഥന മാനിച്ചാണ് യൂസഫലി പ്രശ്നത്തില് ഇടപെട്ടത്. അതേസമയം യൂസഫലിക്ക് ഇതിന്റെ പേരില് വലിയ പേരുദോഷവും കേള്ക്കേണ്ടി വന്നു. സോഷ്യല് മീഡിയയില് ഉള്പ്പെടെ അധിഷേപം കടുക്കുകയും ചിലര് അതിന്റെ പേരില് ഗള്ഫില് അറസ്റ്റിലാകുകയും ചെയ്തു. അങ്ങനെ സംഭവ ബഹുലമായ ദിവസങ്ങള്ക്ക് ശേഷമാണ് തുഷാര് നാട്ടിലെത്തിയത്.
https://www.facebook.com/Malayalivartha
