കിടന്നിട്ട് ഉറക്കം വരുന്നില്ല... ഭരണപക്ഷത്തായിരുന്നാലും പ്രതിപക്ഷത്തായിരുന്നാലും അഴിമതികള് നോക്കിനില്ക്കുന്ന ആളല്ല വി.എസ്.; ഫ്ളാറ്റ് മുതലാളിമാര്ക്ക് വേണ്ടി രാഷ്ട്രീയ പാര്ട്ടികള് മത്സരിക്കുമ്പോള് കനത്ത വിമര്ശനവുമായി വി.എസ് അച്യുതാനന്ദന്
സാധാരണക്കാരുടെ മനസറിഞ്ഞ നേതാവാണ് വി.എസ്. അച്യുതാനന്ദന്. അദ്ദേഹത്തിന്റെ ജനകീയ നിലപാടുകളാണ് ഈ 96 ആം വയസിലും സജീവമാക്കുന്നത്. അല്ലെങ്കില് തന്നെ മരട് വിഷയത്തില് എല്ലാ രാഷ്ട്രീയ പാര്ട്ടികളും ഒറ്റക്കെട്ടാണ്. എന്നാല് അഴിമതി നടത്തിയ മുതലാളിമാര്ക്കെതിരെ ആരും മിണ്ടുന്നില്ല. അതിനെ പൊളിച്ചടുക്കുകയാണ് വി.എസ്.
മരട് ഫ്ളാറ്റ് വിഷയത്തില് നിര്മ്മാതാക്കള്ക്കെതിരെ രൂക്ഷ വിമര്ശനമാണ് വി.എസ് അച്യുതാനന്ദന് ഉന്നയിക്കുന്നത്. ഉപഭോക്താക്കളെ വഞ്ചിച്ച ഫ്ളാറ്റ് നിര്മാതാക്കളെ കരിമ്പട്ടികയില് ഉള്പ്പെടുത്തണമെന്ന് അദ്ദേഹം ആവശ്യപ്പെട്ടു. ഈ ഫ്ളാറ്റുകള്ക്ക് വഴിവിട്ട് അനുമതികള് നല്കിയവര്ക്കും അവര്ക്ക് പ്രചോദനം നല്കിയവര്ക്കുമെതിരെ നിയമ നടപടി സ്വീകരിക്കണമെന്നും വി.എസ് ആവശ്യപ്പെട്ടു.
മരടിലെ ഫ്ളാറ്റ് സമുച്ചയം പൊളിക്കണമെന്ന സുപ്രീംകോടതിയുടെ വിധി രാജ്യത്തെ നിയമ വ്യവസ്ഥയുടെ അടിസ്ഥാനത്തിലാണ് ഉണ്ടായത്. എന്നാല്, നിയമങ്ങള് ലംഘിച്ച് ഇത്തരം നിര്മാണ പ്രവര്ത്തനങ്ങള് നടക്കുകയും അക്കാര്യം ചൂണ്ടിക്കാട്ടപ്പെടുമ്പോഴെല്ലാം നീതിപീഠങ്ങളില് നിന്ന് സ്റ്റേ സമ്പാദിച്ച് നിര്മ്മാണ പ്രവര്ത്തനങ്ങള് പൂര്ത്തിയാക്കുന്നു. പിന്നീട് അത് വിറ്റഴിക്കുകയും ചെയ്യുകയാണ് ഒരു കൂട്ടം ബില്ഡര്മാര് ചെയ്യുന്നതെന്നും അദ്ദേഹം പറഞ്ഞു.
സമൂഹത്തിലെ ചില വമ്പന്മാര്ക്ക് സൗജന്യമായി ഫ്ളാറ്റുകള് നല്കുകയും അവരെ ചൂണ്ടിക്കാട്ടി മറ്റ് ഫ്ളാറ്റുകള് വിറ്റഴിക്കുകയുമാണ് ഇക്കൂട്ടരുടെ വിപണന തന്ത്രമെന്നും ഈ രീതി തുടരുന്ന നിരവധി ബില്ഡര്മാര് വേറെയുമുണ്ടെന്നും അദ്ദേഹം പറഞ്ഞു.
പാറ്റൂര് ഫ്ളാറ്റ് ഇത്തരത്തില് അനധികൃതമായി നിര്മിച്ചതാണെന്ന് ചൂണ്ടിക്കാട്ടി താന് നിയമ നടപടി സ്വീകരിച്ചു വരികയാണ്. മറ്റ് ചില കക്ഷികളും ഇതേ വിഷയത്തില് കേസ് നടത്തുന്നതായും അദ്ദേഹം പറഞ്ഞു. നിര്മാണത്തിന്റെയും വിറ്റഴിക്കലിന്റെയും ഘട്ടങ്ങളില് ഇടപെടാതിരിക്കുകയും പിന്നീട് നിയമ നടപടി പൂര്ത്തിയാവുമ്ബോള് അതിന്റെ ബാധ്യത പൊതുജനം ഏറ്റെടുക്കമെന്ന് വാദിക്കുകയും ചെയ്യുന്നത് അഴിമതിക്കും നിയമലംഘനത്തിനും കൂട്ടുനില്ക്കലാണെന്നും അദ്ദേഹം പ്രസ്താവനയില് പറയുന്നു.
ഈ വിഷയവുമായി ബന്ധപ്പെട്ട് നടക്കാനിരിക്കുന്ന സര്വകക്ഷി യോഗം ഇക്കാര്യം പരിഗണിക്കണമെന്നാണ് ഈ ഘട്ടത്തില് ആവശ്യപ്പെടാനുള്ളതെന്നും ഇപ്പോള് നിയമ നടപടി തുടരുന്ന ഫ്ളാറ്റുകളുടെ വില്പ്പനയുടെ കാര്യത്തിലും നിലപാട് ചര്ച്ച ചെയ്യണമെന്നും അദ്ദേഹം പറഞ്ഞു.
അതേ സമയം തന്നെയാണ് പാലാരിവട്ടം അഴിമതി കഥയും പൊങ്ങിവരുന്നത്. ഇതിനെതിരെ വിലയ ജനരോക്ഷമാണ് ഉയരുന്നത്. പാലാരിവട്ടത്തെ അഴിമതിപ്പാലം ജനങ്ങളുടെ നികുതിപ്പണം മുടക്കി പൊളിച്ചുപണിയാനാണ് സംസ്ഥാന സര്ക്കാര് തീരുമാനം. ഫ്ളാറ്റ് നിര്മാതാക്കളും ഉദ്യോഗസ്ഥ ലോബിയും ചേര്ന്നു കെട്ടിപ്പൊക്കിയ അഴിമതി ഫ്ളാറ്റുകള് പൊളിക്കാതിരിക്കാനും സംസ്ഥാന സര്ക്കാര് ആലോചിക്കുകയാണ്. മാഫിയകളുടെ ദുഷ് പ്രവൃത്തികള്ക്കു വിലകൊടുക്കുന്നതു പൊതുജനവും. യഥാര്ത്ഥ കുറ്റക്കാര് കാണാമറയത്തു സുരക്ഷിതരായിരിക്കുന്നു. അതിനെതിരെയാണ് വിഎസ് പ്രതികരിച്ചത്.
മരട് ഫ്ളാറ്റ് പ്രശ്നവുമായി ബന്ധപ്പെട്ട വിഷയത്തില് നിയമപരമായ പോംവഴിയില്ലെന്നും രാഷ്ട്രീയപരിഹാരം മാത്രമേ മുന്നിലുള്ളൂവെന്നുമാണ് സംസ്ഥാന സര്ക്കാര് പറയുന്നത്. തീരദേശ നിയന്ത്രണനിയമത്തില് ഭേദഗതി ആവശ്യപ്പെട്ട് കേന്ദ്രസര്ക്കാരിനെ സമീപിക്കുക എന്ന നിര്ദേശം സംസ്ഥാന സര്ക്കാര് ഇന്നു സര്വകക്ഷി യോഗത്തില് മുന്നോട്ടുവയ്ക്കും. കേന്ദ്ര തീരദേശനിയന്ത്രണ നിയമ(1991)ത്തിലെ വിജ്ഞാപനപ്രകാരം, മരട് പഞ്ചായത്തായിരിക്കേ കാറ്റഗറി മൂന്ന് മേഖലയിലായിരുന്നു. അവിടെ ഫ്ളാറ്റ് നിര്മാണം അനുവദനീയമല്ല. പാലം പൊളിച്ചതു പോലെ മരട് പ്രശ്നവും പരിഹരിക്കാമെന്നാണു സര്ക്കാര് നിലപാട്. അതിനു കേന്ദ്രസര്ക്കാര് നിയമഭേദഗതി നടത്തണം. ഇതോടെ രക്ഷപ്പെടുന്നത് ഫ്ളാറ്റുകള് നിര്മ്മിച്ചവരാണ്. നിരപരാധികളായ ഫ്ളാറ്റ് താമസക്കാരെ രക്ഷിക്കുമ്പോള് തന്നെ മുതലാളിമാരുടെ പൊയ്മുഖം വെളിച്ചത്തുകൊണ്ടുവരികയാണ് വി.എസ്.
https://www.facebook.com/Malayalivartha
