കര്‍ണാടകത്തിലെ ജാതിഭ്രാന്ത് വീണ്ടും വിവാദമാകുന്നു. കേന്ദ്രം ഭരിക്കുന്ന ബി.ജെ.പിയുടെ എം.പി പോലും അവിടുത്തെ ജാതിവെറിക്ക് മുന്നില്‍ മുട്ടുകുത്തി മടങ്ങേണ്ടിവന്നു. തുംകുര്‍ ജില്ലയിലെ പവഗട താലൂക്കിലാണ് സംഭവം നടന്നത്. ദളിത് വിഭാഗത്തില്‍ പെട്ട എം.പി എ. നാരായണസ്വാമി സ്വന്തം മണ്ഡലത്തില്‍ പ്രവേശിക്കുന്നത് ഗൊള്ള സമുദായ അംഗങ്ങള്‍ തടയുകയായിരുന്നു. ചിത്രദുര്‍ഗ മണ്ഡലത്തിലെ എം.പിയാണ് ഇദ്ദേഹം.
ഡോക്ടര്‍മാരും ഫാര്‍മസ്യൂട്ടിക്കല്‍ രംഗത്തുള്ളവരും ഉള്‍പ്പെടുന്ന സംഘവുമായി ഗൊള്ള സമൂഹം തിങ്ങിപ്പാര്‍ക്കുന്ന ഗൊള്ളരഹാട്ടി സന്ദര്‍ശിക്കാന്‍ എത്തിയപ്പോഴായിരുന്നു എംപിക്ക് അധിക്ഷേപം നേരിടേണ്ടിവന്നത്.

ഗൊള്ളരഹാട്ടിയില്‍ താഴ്ന്ന ജാതിക്കാരെ കയറ്റാനാകില്ലെന്ന് പറഞ്ഞ് പ്രദേശവാസികള്‍ ഇവര്‍ എംപിയെ തടയുകയായിരുന്നു. നീണ്ട സമയത്തെ തര്‍ക്കത്തിന് ശേഷം എം.പി നാരാശനായി മടങ്ങുകയായിരുന്നു. ഇന്ത്യാ ടുഡേ ഉള്‍പ്പെടെയുള്ള മാധ്യമങ്ങള്‍ ഇക്കാര്യം റിപ്പോര്‍ട്ട് ചെയ്തു. ഇതേ തുടര്‍ന്ന് സംഭവത്തെ കുറിച്ച് അന്വേഷിച്ച് റിപ്പോര്‍ട്ട് നല്‍കാന്‍ ജില്ലാ പൊലീസ് മേധാവി നിര്‍ദ്ദേശം നല്‍കി. തടഞ്ഞത് ആരാണെന്നും ആരുടെ നേതൃത്വത്തിലാണെന്നും ഇതുവരെ അറിവായിട്ടില്ലെന്ന് എസ്.പി പ്രതികരിച്ചു. ഡോക്ടര്‍മാരും ഫാര്‍മസ്യൂട്ടിക്കല്‍ വിദഗ്ധരും ഉള്‍പ്പെടെയുള്ള സംഘവുമായി പവഗട സന്ദര്‍ശിക്കാന്‍ എത്തിയതായിരുന്നു എംപി. ഗൊള്ള സമൂഹത്തിന്റെ നിലപാടിനെതിരെ കര്‍ണാടകയിലെ ദളിത് സംഘനടകള്‍ രംഗത്തെത്തി.

പിന്നോക്ക സമുദായക്കാരായ ഗൊള്ള വിഭാഗം താമസിക്കുന്ന പ്രദേശത്തേക്ക് മറ്റ് താഴ്ന്ന ജാതിക്കാര്‍ക്ക് പ്രവേശനമില്ല. കര്‍ണാടക ഉപമുഖ്യമന്ത്രി സി.എന്‍ അശ്വന്ത് നാരായണന്‍ സംഭവത്തില്‍ അപലപിച്ചു. നടപടി എടുക്കണമെന്നും അദ്ദേഹം ആവശ്യപ്പെട്ടു. എല്ലാവര്‍ക്കും ഒരേ ചോരയും മാംസവുമാണ്. അതിനാല്‍ യാതൊരുതരത്തിലുമുള്ള വിവേചനവും ഇല്ലെന്നും അദ്ദേഹം പ്രതികരിച്ചു. താന്‍ ജാതീയ അധിഷേപത്തിന് ഇരയായെന്നും അതീവ ദുഖിതനാണെന്നും എം.പി എ നാരായണ സ്വാമി ദ ഹിന്ദു പത്രത്തോട് പ്രതികരിച്ചു. ദളിതനായത് കൊണ്ട് മാത്രമാണ് പ്രദേശത്ത് തന്നെ തടഞ്ഞത്. അവിടെയുള്ളവരുടെ പ്രശ്‌നങ്ങള്‍ നേരിട്ട് മനസിലാക്കാനും സൗകര്യങ്ങള്‍ ഒരുക്കാനുമാണ് സന്ദര്‍ശനം നടത്താന്‍ തീരുമാനിച്ചത്. ഗൊള്ള സമുദായത്തില്‍ പെട്ടവര്‍ വര്‍ഷങ്ങളായി യാതൊരുവിധ അടിസ്ഥാനസൗകര്യങ്ങളും ഇല്ലാതെ കുടിലുകളിലാണ് കഴിയുന്നതെന്നും എം.പി പറഞ്ഞു.

എം.പിക്കെതിരെയുള്ള പ്രതിഷേധം ശക്തമായതോടെ ഗൊള്ള സമുദായത്തിലെ ചുരുക്കം ചിലര്‍ അദ്ദേഹത്തിന് പിന്തുണയുമായി എത്തി. ഗ്രാമം സന്ദര്‍ശിക്കണമെന്ന് അവര്‍ ആവശ്യപ്പെട്ടു. എന്നാല്‍ ഗൊള്ള സമുദായക്കാര്‍ ചേരിതിരിഞ്ഞ് ആക്രമിക്കുന്ന സാഹചര്യം ഒഴിവാക്കാന്‍ താന്‍ പിന്തിരിയുകയായിരുന്നെന്ന് എം.പി പറഞ്ഞു. പൊലീസിന്റെ സഹായത്തോടെ, പ്രതിഷേധക്കാരെ ഒഴിപ്പിച്ച് തനിക്ക് സന്ദര്‍ശനം നടത്താമായിരുന്നു, അല്ലെങ്കില്‍ പൊലീസില്‍ പരാതി നല്‍കാമായിരുന്നു. അതുകൊണ്ട് ആളുകളുടെ മനോഭാവം മാറില്ല. അതിനാല്‍ ഇക്കാര്യത്തില്‍ ബോധവല്‍ക്കരണം നടത്താനുമാണ് ഉദ്ദേശിക്കുന്നത്. ദളിത് വിഭാഗത്തില്‍ പെട്ട മുന്‍ എം.എല്‍.എ തിമ്മരായപ്പയേയും ഇത്തരത്തില്‍ ഗൊള്ള സമൂഹം തടഞ്ഞിട്ടുണ്ടെന്ന് അവരുടെ കൂട്ടത്തിലുള്ളവര്‍ തന്നോട് വെളിപ്പെടുത്തിയെന്നും എം.പി നാരായണസ്വാമി പറഞ്ഞു.