സംസ്ഥാനത്താകമാനം അപകടത്തില്‍പ്പെടുന്നവരെ അടിയന്തരമായി ആശുപത്രികളിലേക്ക് എത്തിക്കുന്നതിനുള്ള സൗജന്യ ആംബുലന്‍സ് ശൃംഖലയായ 'കനിവ്108'ന്റെ (Kerala Ambulance Network for Indisposed Victims)െ സംസ്ഥാനതല ഉദ്ഘാടനം തിരുവനന്തപുരം സെന്‍ട്രല്‍ സ്‌റ്റേഡിയത്തില്‍ നിര്‍വഹിച്ച് സംസാരിക്കുകയായിരുന്നു മുഖ്യമന്ത്രി. രക്ഷാ പ്രവര്‍ത്തകര്‍ക്കൊപ്പമാവും സര്‍ക്കാരെന്ന് മുഖ്യമന്ത്രി പിണറായി വിജയന്‍. അപകടത്തില്‍പ്പെടുന്നവര്‍ക്ക് സമയനഷ്ടം കൂടാതെ വിദഗ്ധ ചികിത്സ ഉറപ്പാക്കാനാകുംവിധമാണ് സര്‍ക്കാര്‍ സമഗ്ര ട്രോമകെയര്‍ സംവിധാനം വിഭാവനം ചെയ്തിട്ടുള്ളതെന്ന് മുഖ്യമന്ത്രി പറഞ്ഞു. നിരവധി ഘടകങ്ങള്‍ ഈ പദ്ധതിയില്‍ ഉള്‍ച്ചേര്‍ന്നിട്ടുണ്ട്. അപകടത്തില്‍പ്പെടുന്നവരെ അപകടസ്ഥലത്തുനിന്നും ചികിത്സാകേന്ദ്രത്തിലേക്ക് എത്രയുംവേഗം എത്തിക്കുന്നതിനാവശ്യമായ സൗജന്യ ആംബുലന്‍സ് ശൃംഖല.

അപകടത്തില്‍പ്പെടുന്നവരെ രക്ഷിക്കാനും ആശുപത്രിയിലെത്തിക്കാനും പലരും തയ്യാറാകാത്തത് തുടര്‍ന്നുള്ള നടപടികളുടെ കുരുക്കുകളെ ഭയന്നിട്ടാണ്. എന്നാല്‍ ഇനിയുള്ള ഘട്ടങ്ങളില്‍ അത്തരം കുരുക്കുകളൊന്നും രക്ഷകര്‍ക്കു നേരിടേണ്ടിവരില്ല. കേന്ദ്രീകൃത സംവിധാനത്തിലൂടെ കുറ്റമറ്റ രീതിയില്‍ ഏറ്റവും ഗുണനിലവാരമുള്ള സേവനം ലഭ്യമാകുന്ന തരത്തിലാണ് ആംബുലന്‍സ് സേവനം ഒരുക്കിയിട്ടുള്ളത്. കനിവ് 108 പദ്ധതിയുടെ ഭാഗമായി സംസ്ഥാനത്തെ മുഴുവന്‍ ജില്ലകളിലും അത്യാധുനിക ഉപകരണ സംവിധാനങ്ങളും പരിശീലനം സിദ്ധിച്ച ഉദ്യോഗസ്ഥരുമടങ്ങുന്ന 315 ആംബുലന്‍സുകള്‍ ലഭ്യമാക്കുകയാണ്. ആദ്യഘട്ടമെന്ന നിലയില്‍ 101 ആംബുലന്‍സുകളാണ് ഫഌഗ് ഓഫ് ചെയ്തത്. ബാക്കിയുള്ളവ എത്രയുംവേഗം സജ്ജമാകും. ഒക്‌ടോബര്‍ മാസം മുതല്‍ ഈ പദ്ധതി പൂര്‍ണതോതില്‍ സജ്ജമാകുന്നതാണ്.

അടിയന്തിര ചികിത്സ ഏറ്റവും ഫലവത്തായി നല്‍കുവാന്‍ കഴിയുന്നവിധത്തിലുള്ള സര്‍ക്കാര്‍ ആരോഗ്യസ്ഥാപനങ്ങളുടെ ശാക്തീകരണം, അപകടത്തില്‍പ്പെട്ടവര്‍ക്ക് ആദ്യ 48 മണിക്കൂറിനുള്ളില്‍ സൗജന്യ ചികിത്സ ലഭ്യമാക്കുന്ന 'ഗോള്‍ഡന്‍ അവര്‍ ട്രീറ്റ്‌മെന്റ് പാക്കേജ്', തുടങ്ങിയവ ഉള്‍ക്കൊള്ളുന്നതാണ് ഈ പദ്ധതി. അപകടങ്ങള്‍ കുറയ്ക്കുന്നതിനും അപകടത്തില്‍പ്പെട്ടവര്‍ക്ക് പ്രാഥമിക ശുശ്രൂഷ ഉറപ്പുവരുത്തുന്നതിനുമുതകുന്ന ബോധവത്ക്കരണവും കൂടി ഇതിന്റെ ഭാഗമായി നടത്തുന്നുണ്ട്.



ആരോഗ്യവകുപ്പിന്റെ മേല്‍നോട്ടത്തിലുള്ള ഈ സൗജന്യ ആംബുലന്‍സ് സംവിധാനം, പൊലീസ്, ഗതാഗതം, റവന്യൂ എന്നീ വകുപ്പുകളുടെ കൂട്ടായ പ്രവര്‍ത്തനങ്ങളിലൂടെയാകും നടപ്പിലാക്കുക. 108 എന്ന സൗജന്യ നമ്പര്‍ വഴിയോ മൊബൈല്‍ ആപ്ലിക്കേഷന്‍ വഴിയോ ആംബുലന്‍സ് സേവനം ആവശ്യപ്പെടാം. കോളുകള്‍ സ്വീകരിക്കുന്നതിനായി 24 മണിക്കൂറും പ്രവര്‍ത്തിക്കുന്ന കോള്‍ സെന്റര്‍ സജ്ജമാണ്. പ്രത്യേക പരിശീലനം ലഭിച്ച 70 എമര്‍ജന്‍സി റെസ്‌പോണ്‍സ് ഓഫീസര്‍മാരും അവിടെയുണ്ടാകും.