കോട്ടയം നഗരത്തിലെ തിരുനക്കര പോസ്റ്റ് ഓഫിസ് റോഡില്‍ പ്രവര്‍ത്തിക്കുന്ന എക്‌സ്പ്രസ് ബ്ലീസ് എന്ന കൊറിയര്‍ സര്‍വീസ് സ്ഥാപനത്തിലെ ജീവനക്കാര്‍ക്കു നേരേ കുരുമുളക് സ്‌പ്രേ അടിച്ച് പണം തട്ടിയെടുത്ത പ്രതികള്‍ ഒളിവില്‍ കഴിഞ്ഞത് ഒരു മാരുതി കാറിലാണെന്ന് കണ്ടെത്തി. ഏറ്റുമാനൂര്‍, അതിരമ്പുഴ , ഏറ്റുമാനൂര്‍ റെയില്‍വേ സ്റ്റേഷന്‍ ഭാഗങ്ങളില്‍ കാറില്‍ കറങ്ങി നടക്കുകയായിരുന്ന പ്രതികളെ വാഹന പരിശോധനയ്ക്കിടെയാണ് പിടികൂടിയത്.

തിങ്കളാഴ്ച ഉച്ചയ്ക്കു 12-ന് കുരുമുളക് സ്‌പ്രേ ആക്രമണം നടത്തി ഒരു ലക്ഷം രൂപ തട്ടിയെടുത്ത് ഒളിവില്‍ പോയ തിരുവാര്‍പ്പ് സ്വദേശി ബാദുഷ, സുഹൃത്ത് അഖില്‍ എന്നിവരാണ് പിടിയിലായത്. നെഞ്ചുവേദന അനുഭവപ്പെട്ടതിനെ തുടര്‍ന്നു പ്രതികളില്‍ ഒരാളായ അഖിലിനെ മെഡിക്കല്‍ കോളജില്‍ പ്രവേശിപ്പിച്ചു. പരിശോധനയില്‍ ഇയാള്‍ക്ക് അസുഖമൊന്നും ഇല്ലെന്നും കഞ്ചാവ് ലഹരിയുടെ അസ്വസ്ഥതയാണെന്നും കണ്ടെത്തി. ഇന്നു ഡിസ്ചാര്‍ജ് ചെയ്യുന്നതോടെ അറസ്റ്റ് രേഖപ്പെടുത്തി രണ്ടു പേരെയും കോടതിയില്‍ ഹാജരാക്കും.

തട്ടിയെടുത്ത പണത്തില്‍ 80,000 രൂപ പ്രതികള്‍ സഞ്ചരിച്ച കാറില്‍ നിന്ന് കണ്ടെടുത്തു. ബാക്കി പണം മദ്യവും ഭക്ഷണവും വാങ്ങാനാണ് ഉപയോഗിച്ചത്.

പിടിച്ചുപറി, അടിപിടി, മോഷണം തുടങ്ങി നിരവധി കേസുകളില്‍ ഉള്‍പ്പെട്ട പ്രതികള്‍ ഇതാദ്യമാണ് കുരുമുളക് സ്‌പ്രേയടിച്ച് കവര്‍ച്ച നടത്തുന്നത്. ബാദുഷയെ കാപ്പ നിയമ പ്രകാരം അകത്താക്കിയതാണ്. പ്രതികളെ കണ്ടെത്താന്‍ ജില്ലാ പോലീസ് ചീഫിന്റെ നേതൃത്വത്തിലുള്ള സംഘം നടത്തിയ അന്വേഷണത്തിനൊടുവിലാണു പ്രതികളെ കസ്റ്റഡിയിലെടുത്തത്.