എന്റെ വക അഞ്ഞൂറ് രൂപക്കാര്‍ ഊരാക്കുടുക്കില്‍... മയക്കുമരുന്ന് കേസില്‍ ഭര്‍ത്താവിനെയും ഭാര്യയെയും ഫഹദിനെയും ചോദ്യം ചെയ്യും
സര്‍ക്കാരിനെ കളിയാക്കി എന്റെ വക 500 രൂപ എന്ന പേരില്‍ ഫെയ്‌സ് ബുക്കില്‍ വിവാദ പോസ്റ്റിട്ട പ്രശസ്ത ന്യൂജനറേഷന്‍ സംവിധായകന്‍ ആഷിക് അബുവും ഭാര്യ റീമ കല്ലിങ്കലും ഊരാക്കുടുക്കില്‍. മയക്ക് മരുന്ന് കേസില്‍ ആഷിക് അബു, ഭാര്യ റീമ കല്ലിങ്കല്‍, ഫഹദ് ഫാസില്‍ എന്നിവര്‍ക്കെതിരെ അന്വേഷണം നടക്കുന്നുണ്ടെന്ന് മംഗളം ദിനപത്രമാണ് റിപ്പോര്‍ട്ട് ചെയ്തത്. കൊക്കെയ്ന്‍ കേസ് ചര്‍ച്ചയായതോടെയാണ് പുതുതലമുറയിലെ താരങ്ങള്‍ക്കെതിരെയും അന്വേഷണം നടത്താന്‍ തീരുമാനിച്ചത്. നടന്‍ ഷൈന്‍ ടോം ചാക്കോയും മറ്റ് മോഡലിംഗ് രംഗത്തെ നാല് യുവതികളും മയക്ക് മരുന്ന് കേസിന് അറസ്റ്റിലായതോടെയാണ് അന്വേഷണം കൂടുതല്‍ താരങ്ങളിലേക്ക് വ്യാപിച്ചത്.
പ്രമുഖ താരങ്ങളായ ഫഹദ് ഫാസില്‍, സംവിധായകന്‍ ആഷിക് അബു, ഭാര്യയും നടിയുമായ റിമാ കല്ലിങ്കല്‍ എന്നിവരില്‍ നിന്ന് കേസില്‍ തെളിവെടുക്കാന്‍ പോലീസ് ഉന്നതതലയോഗം തീരുമാനിച്ചു. ശോഭാ സിറ്റിയില്‍ സുരക്ഷാജീവനക്കാരനെ വാഹനമിടിപ്പിച്ചു കൊലപ്പെടുത്താന്‍ ശ്രമിച്ച കേസിലെ പ്രധാനപ്രതി മുഹമ്മദ് നിഷാമിന്റെ കൊച്ചിയിലെ ഫ്ലാറ്റില്‍ നിന്നാണു കഴിഞ്ഞ 31ന് ഷൈന്‍ ടോം ചാക്കോയേയും മോഡലുകളെയും കൊക്കെയ്ന്‍ ഉപയോഗിക്കുന്നതിനിടെ പിടികൂടിയത്. മോഡലിംഗ് രംഗത്തെ സാന്നിധ്യമായ രേഷ്മാ രംഗസ്വാമിയാണു കേസിലെ മുഖ്യകണ്ണി. രേഷ്മയുടെ പേഴ്‌സണല്‍ കമ്പ്യൂട്ടറില്‍നിന്നു ചിത്രങ്ങളടക്കമുള്ള വിവരങ്ങള്‍ പോലീസ് കണ്ടെടുത്തു. ഇവരുടെ പാസ്‌പോര്‍ട്ടും പിടിച്ചെടുത്തു. രേഷ്മയ്ക്കു വിദേശികളുമായി അടുത്തബന്ധമുണ്ടെന്നും പോലീസ് കണ്ടെത്തിയിരുന്നു.
അപ്രതീക്ഷിതമായാണ് പ്രമുഖ ന്യൂജനറേഷന്‍ താരങ്ങളില്‍ അന്വേഷണം നടത്താന്‍ തീരുമാനിച്ചിരിക്കുന്നത്. കേരളത്തില്‍ ആദ്യമായി രജിസ്റ്റര്‍ ചെയ്ത കൊക്കെയ്ന്‍ കേസില്‍ ന്യൂജനറേഷന്‍ സിനിമാരംഗത്തെ പ്രമുഖരെ ചോദ്യംചെയ്യാന്‍ അനുമതി തേടിക്കൊണ്ടുള്ളതായിരുന്നു തിരുവനന്തപുരത്തെ പോലീസ് ആസ്ഥാനത്തേക്കു കൊച്ചി പോലീസ് അയച്ച കത്തിന്റെ ഉള്ളടക്കം. കൊച്ചിയിലെ പ്രമുഖ വ്യവസായിയും ഒരു യുവരാഷ്ട്രീയനേതാവും ഇവര്‍ക്ക് ഒത്താശ ചെയ്തിരുന്നതായി പോലീസിന്റെ രഹസ്യ റിപ്പോര്‍ട്ടില്‍ വ്യക്തമാക്കുന്നു. ബൊളീവിയ സ്വദേശിയായ യുവതിയുമായി ഇവര്‍ക്കുള്ള അടുപ്പം പരിശോധിച്ചുവരികയാണ് ഇപ്പോള്‍. മലയാളത്തിലെ പുതുതലമുറയില്‍ പ്രവര്‍ത്തിക്കുന്ന മുഴുവന്‍ സിനിമ പ്രവര്‍ത്തകരെയും സാങ്കേതിക വിദഗ്ദ്ധരെയും നിരീക്ഷിക്കാന്‍ പോലീസ് തീരുമാനിച്ചിട്ടുള്ളതായാണ് റിപ്പോര്‍ട്ട്.
മലയാളത്തിലെ ന്യൂജനറേഷന്‍ താരങ്ങള്‍ മയക്കുമരുന്നിന്റെ പിടിയിലാണെന്ന് ഇതിന് മുമ്പ് നടന്‍ ശ്രീനിവാസന്‍ വെളിപ്പെടുത്തിയിരുന്നു. മലയാള സിനിമ ലോകത്ത് നടന്‍ ശ്രീനിവാസന്റെ വെളിപ്പെടുത്തല്‍ ഏറെ ചര്‍ച്ച ചെയ്യപ്പെട്ടിരുന്നു. കൊക്കെയ്ന്‍ കേസിന്റെ അന്വേഷണച്ചുമതല എറണാകുളം ഡെപ്യൂട്ടി കമ്മീഷണര്‍ നിശാന്തിനിക്കാണ്. നര്‍കോട്ടിക് കണ്‍ട്രോള്‍ ബ്യൂറോയുടെ സഹായത്തോടെയാകും തുടരന്വേഷണം നടത്തുക എന്നും റിപ്പോര്‍ട്ടുണ്ട്. മലയാളത്തില്‍ കത്തി നില്‍ക്കുന്ന താരങ്ങളിലേക്ക് അന്വേഷണം നീളുന്നതോടെ മറ്റ് യുവ താരങ്ങളും ഭീതിയിലാണ്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
