സംഘാടകര്‍ അങ്കലാപ്പില്‍, ദേശീയ ഗെയിംസിലെ അഴിമതിയാരോപണങ്ങളെക്കുറിച്ച് സി.ബി.ഐ. പ്രാഥമിക അന്വേഷണം ആരംഭിച്ചു
ദേശീയ ഗെയിംസിലെ അഴിമതി ആരോപണങ്ങളെക്കുറിച്ച് സി.ബി.ഐ. പ്രാഥമികാന്വേഷണം ആരംഭിച്ചു. മത്സരങ്ങള്‍ കഴിഞ്ഞാലുടന്‍ സി.ബി.ഐ. അന്വേഷണം പ്രഖ്യാപിക്കുമെന്നാണ് സൂചന. തെളിവുകള്‍ നഷ്ടപ്പെടാനുള്ള സാധ്യത മുന്നില്‍ക്കണ്ട് വിവരങ്ങള്‍ ശേഖരിക്കാനാണ് സി.ബി.ഐ. കൊച്ചി യൂണിറ്റിനെ ചുമതലപ്പെടുത്തിയത്.
സി.ബി.ഐ. ചെന്നൈ ഓഫീസ് ഐ.ജി.ക്ക് ലഭിച്ച പരാതിയുടെ അടിസ്ഥാനത്തിലാണ് അന്വേഷണം. 50 പേജുള്ള വിശദമായ പരാതിയാണ് സി.ബി.ഐ.ക്ക് ലഭിച്ചത്. ചെന്നൈയിലെ നിര്‍ദേശപ്രകാരം കൊച്ചി യൂണിറ്റിലെ ആറംഗ സംഘത്തിനാണ് അന്വേഷണച്ചുമതല. ഗെയിംസ് കഴിഞ്ഞാല്‍ നടത്തിപ്പിലെ അപാകതകള്‍ പലതും കണ്ടെത്താനാവില്ല. തെളിവുകള്‍ നശിക്കുന്നതിനുമുമ്പ് വിവരങ്ങള്‍ ശേഖരിച്ച് സൂക്ഷിക്കാനാണ് തീരുമാനം. ഗെയിംസ് കഴിഞ്ഞാല്‍ രേഖകള്‍ നഷ്ടപ്പെടാനുള്ള സാധ്യതയും സി.ബി.ഐ. തള്ളിക്കളയുന്നില്ല.
സി.ബി.ഐ. കൊച്ചി യൂണിറ്റിലെ രണ്ടുപേര്‍ തിരുവനന്തപുരത്തെ ഗെയിംസ് സെക്രട്ടേറിയറ്റിലെത്തി വിവാദമായ കരാറുകളുടെ രേഖകള്‍ പരിശോധിച്ചു. ഇതിലെ വിവരങ്ങള്‍ ശേഖരിക്കുകയും ചെയ്തു. വരുംദിവസങ്ങളിലും രേഖകള്‍ പരിശോധിക്കും. കോടികള്‍ ചെലവഴിച്ച് നവീകരിച്ച സ്‌റ്റേഡിയങ്ങളും സി.ബി.ഐ. പരിശോധിച്ചിട്ടുണ്ട്. ഉദ്ഘാടന, സമാപന ചടങ്ങുകള്‍ക്കായി നിര്‍മിച്ച കാര്യവട്ടം ഗ്രീന്‍ഫീല്‍ഡ് സ്‌റ്റേഡിയം, കൊല്ലത്തെ ഹോക്കി സ്‌റ്റേഡിയം, പിരപ്പന്‍കോട് നീന്തല്‍ക്കുളം എന്നിവിടങ്ങളിലും പരിശോധന സിബിഐ സംഘം പരിശോധന നടത്തി. ഗെയിംസിന്റെ ചിത്രങ്ങളടക്കമുള്ള തെളിവുകള്‍ ശേഖരിച്ചിട്ടുണ്ട്. ഗെയിംസ് നടക്കുന്ന വേദികളിലും സിബിഐ സാന്നിധ്യമുണ്ട്.
ഉദ്ഘാടനദിവസത്തെ കലാപരിപാടികളടക്കമുള്ളവയ്ക്ക് പതിനഞ്ചര കോടിയോളം രൂപ ചെലവഴിച്ചതില്‍ അഴിമതിയുണ്ടെന്നും പരാതിയുയര്‍ന്നിരുന്നു. ഗെയിംസിനെക്കുറിച്ചുയരുന്ന അഴിമതിയാരോപണങ്ങളെല്ലാം സംഘം പരിശോധിക്കുന്നുണ്ട്.
ഗെയിംസിലെ അഴിമതിയെക്കുറിച്ച് സംസ്ഥാനത്തെ ബി.ജെ.പി. നേതൃത്വം കേന്ദ്രസര്‍ക്കാരിനെ ധരിപ്പിച്ചിരുന്നു. ഇതിന്റെയടിസ്ഥാനത്തിലാണ് ഉദ്ഘാടനച്ചടങ്ങില്‍ പ്രധാനമന്ത്രി പങ്കെടുക്കാഞ്ഞതെന്ന് സൂചനയുണ്ട്. ഗെയിംസ് സംഘാടനത്തെക്കുറിച്ച് വ്യാപക അഴിമതിയാരോപണങ്ങളാണ് ഉയര്‍ന്നത്. സ്‌റ്റേഡിയം നിര്‍മാണത്തിലും കരാറുകള്‍ നല്‍കിയതിലും ഉപകരണങ്ങള്‍ വാങ്ങിയതിലുമെല്ലാം കോടികളുടെ വെട്ടിപ്പ് നടന്നുവെന്നാണ് ആരോപണം. 611 കോടിയോളം രൂപയാണ് നടത്തിപ്പിന് ചെലവഴിച്ചത്. എന്നാല്‍, പല പ്രധാന സ്‌റ്റേഡിയങ്ങളുടെയും പണി ഇനിയും പൂര്‍ത്തിയായിട്ടില്ല. കോടിക്കണക്കിന് രൂപയുടെ
ഉപകരണങ്ങള്‍ വാങ്ങിയെങ്കിലും ഇവയില്‍ ഭൂരിഭാഗവും ഇതുവരെയും എത്തിയിട്ടില്ല. അവസാന മാസങ്ങളില്‍ തിരക്കിട്ടാണ് നിര്‍മാണ പ്രവര്‍ത്തനങ്ങള്‍ പൂര്‍ത്തിയാക്കിയത്. ഇതെല്ലാം വേണ്ടത്ര ഗുണനിലവാരമില്ലാതെയുമാണ്. ഉപകരണങ്ങളുടെ ഗുണനിലവാരവും പരിശോധിക്കാനായില്ല. വളന്റിയേഴ്‌സിനും ഒഫീഷ്യല്‍സിനും നല്‍കിയ കിറ്റുകളടക്കമുള്ളവയിലും വന്‍ തട്ടിപ്പാണ് നടന്നതെന്നും പരാതിയുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
