സംസ്ഥാനത്ത് സ്വര്‍ണക്കള്ളക്കടത്ത് വ്യാപകമെന്ന് കസ്റ്റംസ്. ഈ വര്‍ഷം ഇതുവരെ അനധികൃതമായി കടത്തിയ 150.479 കിലോ സ്വര്‍ണം പിടിച്ചെടുത്തെന്ന് കസ്റ്റംസ് കമ്മിഷണര്‍ സുമിത് കുമാര്‍. 277 കേസുകളിലായാണ് 43.28 കോടി രൂപ മൂല്യം വരുന്ന 150.479 കിലോ സ്വര്‍ണം പിടിച്ചെടുത്തത്. കഴിഞ്ഞ വര്‍ഷം ഇതെ കാലയളവില്‍ പിടിച്ചെടുത്തത് 301 കേസുകളിലായി 101.209 കിലോ സ്വര്‍ണമാണ്. കൊച്ചിയില്‍ ഈ മാസം 16 മുതല്‍ കസ്റ്റംസ് പ്രത്യേക സംഘം അന്വേഷണം ആരംഭിച്ചിട്ടുണ്ട്. ട്രെയിനുകളിലും ബസുകളിലും കള്ളക്കടത്ത് നടത്തിയിരുന്ന 15 കാരിയര്‍മാരെയും ഓപ്പറേറ്റര്‍മാരെയും അറസ്റ്റ് ചെയ്തതായും, ഏകദേശം 21 കിലോ സ്വര്‍ണവും രണ്ട് വാഹനങ്ങളും പിടിച്ചെടുത്തതായും കമ്മീഷണര്‍ അറിയിച്ചു.

കള്ളക്കടത്തുകളുടെയും സ്വര്‍ണം ആഭരണങ്ങളാക്കി മാറ്റലിന്റെയും സംശയാസ്പദമായി വ്യാജ രേഖകളുപയോഗിച്ചുള്ള വില്‍പ്പനകളുടെയും വിവരങ്ങള്‍ കസ്റ്റംസ് ഉദ്യോഗസ്ഥര്‍ ശേഖരിക്കുകയാണ്. അനധികൃതമായി സ്വായത്തമാക്കിയ സ്വര്‍ണം ഉത്സവ സീസണുകളില്‍ കൈമാറ്റം ചെയ്യുന്നുവെന്നാണ് കസ്റ്റംസ് ഉദ്യോഗസ്ഥര്‍ ശേഖരിച്ച വിവരങ്ങളില്‍ നിന്ന് വ്യക്തമാകുന്നത്. കാരിയറുമാര്‍ സ്വര്‍ണം കടത്താന്‍ അന്തര്‍സംസ്ഥാന ബസുകള്‍, ട്രെയിനുകള്‍ തുടങ്ങിയവയാണ് പൊതുവായി ഉപയോഗിക്കുന്നത്. സ്വര്‍ണം മറ്റ് സംസ്ഥാനങ്ങളില്‍ നിന്നാണ് പ്രധാനമായും കേരളത്തില്‍ എത്തുന്നത്. ഇത്തരത്തില്‍ സ്വര്‍ണം കടത്തിയ 12 പേരെ ഇതുവരെ അറസ്റ്റ് ചെയ്തിട്ടുണ്ട്. തുടര്‍നടപടികളും അന്വേഷണങ്ങളും നടക്കുന്നുണ്ടെന്നും, അറസ്റ്റിലായവരെല്ലാം തൃശൂര്‍, ട്രിച്ചി, കോയമ്പത്തൂര്‍, ചെന്നൈ എന്നിവിടങ്ങള്‍ക്കിടയില്‍ സ്വര്‍ണം കടത്തല്‍ കാരിയറുമാരായി പ്രവര്‍ത്തിക്കുന്നവരാണെന്നും കമ്മീഷണര്‍ അറിയിച്ചു.

റയില്‍വേ സ്റ്റേഷനുകള്‍, ബസ് സ്റ്റാന്‍ഡുകള്‍ എന്നിവിടങ്ങളില്‍ പരിശോധനയ്ക്ക് പ്രത്യേക ഗ്രൂപ്പുകളെയും ഒരേസമയം വീടുകളില്‍ പരിശോധനയ്ക്കായി പ്രത്യേക ടീമുകളെയും ചുമതലപ്പെടുത്തിയാണ് കസ്റ്റംസ് സംഘം പ്രവര്‍ത്തിക്കുന്നത്. തൃശൂരിലെ 21 സ്ഥലങ്ങളില്‍ ഒരേസമയം വീടുകളില്‍ നടന്ന പരിശോധനയില്‍ ഏകദേശം 102 കിലോഗ്രാം കണക്കില്‍പ്പെടാത്ത സ്വര്‍ണം വിവിധ രൂപങ്ങളില്‍ (ആകെ 123 കിലോഗ്രാം സ്വര്‍ണം) പിടിച്ചെടുത്തു. കൃത്യമായ രേഖകളില്ലാത്ത രണ്ടു കോടി ഇന്ത്യന്‍ രൂപയും 1900 യുഎസ് ഡോളറും പിടിച്ചെടുക്കുകയും ചെയ്തു. പിടിച്ചെടുത്ത സ്വര്‍ണം കട്ട് പീസുകള്‍, ക്രൂഡ് ആഭരണങ്ങള്‍, ബിസ്‌കറ്റുകള്‍ എന്നിങ്ങനെ വിവിധ രൂപങ്ങളിലായിരുന്നു സൂക്ഷിച്ചിരുന്നത്. അവയില്‍ ചിലത് തറയുടെ അടിയിലും എയര്‍കണ്ടീഷണറിനുള്ളിലും കമ്പാര്‍ട്ടുമെന്റുകളിലും ഒളിപ്പിച്ച നിലയിലായിരുന്നു.

സ്വര്‍ണ്ണക്കടത്ത് കണ്ടെത്തുവാന്‍ സഹായിക്കുന്ന ഇന്‍ഫോര്‍മര്‍മാര്‍ക്ക് ഡിപ്പാര്‍ട്ട്‌മെന്റ് പ്രതിഫലം നല്‍കാറുണ്ടെന്നും സുമിത് കുമാര്‍ അറിയിച്ചു. നിലവില്‍ ഒരു കിലോയ്ക്ക് ഒരു ഇന്‍ഫോര്‍മറിനുള്ള ആകെ റിവാര്‍ഡ് തുക 1,50,000 രൂപയാണ്, അതില്‍ 50 ശതമാനം അഡ്വാന്‍സ് റിവാര്‍ഡ് ആയി നല്‍കും. കഴിഞ്ഞ വര്‍ഷം വിവരം നല്‍കിയവര്‍ക്ക് 19 ലക്ഷം രൂപയും ഈ വര്‍ഷം ഇതുവരെ 30 ഇന്‍ഫോര്‍മര്‍മാര്‍ക്ക് 19.89 ലക്ഷവും വിതരണം ചെയ്തതായി കമ്മിഷണര്‍ അറിയിച്ചു.