മാര്ക്ക് ദാനത്തിന്റെ പേരില് വലിയ കച്ചവടം നടക്കുന്നെന്ന് യു.ഡി.എഫ്
എം.ജി സര്വകലാശാലയിലെ മാര്ക്ക് ദാനത്തിന്റെ പേരില് വലിയ കച്ചവടം നടക്കുന്നുണ്ടെന്നും യു.ഡി.എഫ് കണ്വീനര് ബെന്നി ബഹ്നാന് ആരോപിച്ചു. മാര്ക്ക് ദാനവിവാദത്തില് ഉന്നത വിദ്യാഭ്യാസ വകുപ്പുമന്ത്രി കെ.ടി. ജലീല് വിവരക്കേടാണ് വിളിച്ചുപറയുന്നതെന്നും ധാര്മ്മികതയുണ്ടെങ്കില് ഈ തെറ്റിന് മാപ്പ് പറഞ്ഞ് മന്ത്രി രാജിവെക്കണമെന്നും യു.ഡി.എഫ് കണ്വീനര് ആവശ്യപ്പെട്ടു. യൂണിവേഴ്സിറ്റിയുടെ ചരിത്രത്തില് ഇന്നുവരെയുണ്ടാകാത്ത മാര്ക്ക് ദാന തട്ടിപ്പാണ് പുറത്തായിരിക്കുന്നതെന്നും കേരള ഗവര്ണര് ഇക്കാര്യത്തില് ഗൗരവമായ അന്വേഷണത്തിന് നടപടിയെടുക്കാമെന്ന് പ്രതിപക്ഷ നേതാവ് രമേശ് ചെന്നിത്തലക്ക് ഉറപ്പു നല്കിയിട്ടുണ്ടെന്നും ബെന്നി ബഹ്നാന് അറിയിച്ചു. മന്ത്രിയുടെ പ്രൈവറ്റ് സെക്രട്ടറി അദാലത്തിനെത്തിയാണ് മാര്ക്ക് ദാനത്തിന് വഴിവിട്ട് തീരുമാനമെടുപ്പിച്ചത്.
ഉന്നത വിദ്യാഭ്യാസമന്ത്രി മാര്ക്ക് ദാനത്തില് തനിക്കെതിരെയുള്ള കുരുക്ക് അഴിക്കുകയല്ല; കുരുക്ക് മുറുക്കുകയാണ്. സിലബസിന് പുറത്തുനിന്നും ചോദ്യങ്ങള് ഉണ്ടാകുന്ന ഘട്ടത്തിലാണ് മോഡറേഷനെക്കുറിച്ച് ചട്ടപ്രകാരം ആലോചിക്കുന്നത്. മന്ത്രിയോ സിന്ഡിക്കേറ്റോ വി.സിയോ, ചാന്സലറോ പോലും മാര്ക്ക് ദാനം നടത്താറില്ല. അതിന് അവര്ക്ക് അധികാരവുമില്ല. പുനര് മൂല്യനിര്ണയത്തിലൂടെ മെരിറ്റിന്റെ അടിസ്ഥാനത്തിലാണ് ഇക്കാര്യം തീരുമാനിക്കുന്നത്. പുനര് മൂല്യനിര്ണയ സമയത്ത് കുട്ടിയുടെ സാമ്പത്തിക മാനദണ്ഡം പരിഗണിക്കാറില്ല. പാവപ്പെട്ട കുട്ടിക്കാണ് മാര്ക്ക് ദാനം നടത്തിയതെന്നാണ് മന്ത്രിയുടെ വാദം. യൂണിവേഴ്സിറ്റി പരീക്ഷകളുടെ വിശ്വാസ്യത കാത്തുസൂക്ഷിക്കാന് മന്ത്രിക്കും ബാധ്യതയുണ്ട്.
പരീക്ഷ എഴുതിയ വിദ്യാര്ത്ഥിയുടെ യഥാര്ത്ഥ പേരും രജിസ്റ്റര് നമ്പരും ഇടുന്നതിന് മുമ്പ് പുറത്തറിയില്ല. രഹസ്യം കാത്തുസൂക്ഷിക്കുന്നതിന് വേണ്ടിയാണ് റീവാല്യൂവേഷന് മുമ്പ് തെറ്റായ നമ്പരും രജിസ്ട്രേഷന് കോഡും നല്കുന്നത്. യൂണിവേഴ്സിറ്റി നിയമത്തിന്റെയും ചട്ടത്തിന്റെയും പരീക്ഷാ മാന്വലിന്റെയും അടിസ്ഥാനത്തില് രഹസ്യ സ്വഭാവം കാത്തുസൂക്ഷിക്കുന്നതിന് നല്കുന്ന നമ്പരിന് പകരം യഥാര്ത്ഥ വിദ്യാര്ത്ഥികളുടെ രജിസ്ട്രേഷന് നമ്പര് ഒരു സിന്ഡിക്കേറ്റ് മെമ്പര് രേഖാമൂലം ആവശ്യപ്പെടുകയുണ്ടായി. എം.കോം അക്കൗണ്ടന്സി പരീക്ഷ എഴുതിയ 30 വിദ്യാര്ത്ഥികളുടെ യഥാര്ത്ഥ രജിസ്ട്രേഷന് നമ്പരാണ് ഇദ്ദേഹം ആവശ്യപ്പെട്ടത്. ആരോപണ വിധേയനായ സിന്ഡിക്കേറ്റ് മെമ്പറെ അടിയന്തിരമായി പുറത്താക്കമെന്നും ഇദ്ദേഹത്തിനെതിരെ കേസെടുത്ത് നടപടി സ്വീകരിക്കണമെന്നും യു.ഡി.എഫ് കണ്വീനര് ആവശ്യപ്പെട്ടു.
https://www.facebook.com/Malayalivartha
